أسامة الشاذلى's Blog, page 27

طرطرة

عيل راح عالحيطة يطرطر .... يرسم قال بالشخة مدينة



صاحبه معدى عاكسه وهزر



طرطش خلى مدينته... بقت عالحيطة مدينة حزينة



حفرة فى جنب الحيطة.... حفرها واحد غيره



نقرة فى قلب مدينته صريحة



واحد تانى كتر خيره



جاب طباشيرة كتبها صريحة



"يسقط يسقط حكم العسكر"



كشر لحظة صاحبنا وفكر



بص وراه اتعفرت صفر



شافهم حاصروا الحيطة اتحصر



رصوا كلام جامد فى المحضر



ان صاحبنا "حمامته" وسيلة



لقلب نظام الحكم العالى



قال يطاوعهم تبقى جميلة



مد دراعه وجاب سكينة



وضحى بحلم رجولته الغالى



تانى يوم الصبح وبدرى



دهنوا الحيطة زيت وفخيم



عدى صاحبنا المخصى الفقرى



كتب بالدوكو ... كلام مفهوم



"عاش المجلس يسقط غيره



الفاتحة لذكرى المرحوم"

إيمان قدري

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ' رمضان 2011









ايمان قدري، شابة مصرية مختلفة، علاقة اي بني أدم بيها بتتوقف على قدرته على السمع، وطولة باله، وصبره لأنه بمجرد ما حتشوفك أو حتكلمك في التليفون انت يادوب حتقول ألو وخد عندك" انت فين من زمان، كنت في سيرتك امبارح مع مروة، مروة خطيبة ماجد، عارف ماجد اللي كان بيلعب بنج بونج في نادي الزمالك اللي كان عيان، بس خلاص اتعالج عند الدكتور حازم، اصل الدكتور حازم شاطر قوي على فكرة عيادته في وسط البلد، بمناسبة وسط البلد تخيل أول امبارح وانا ماشية هناك في حرامي سرق شنطتي، تخيل الناس بقت عاملة ازاي، بس الحمد لله عادل الظابط خطيب شريهان جابهالي، عارف شريهان مين اخت مروة اللي كنت بجيب في سيرتك معاها امبارح"

واتحداك يا مسكين لو لحقت تفتح بقك ونطقت كلمة، وبغض النظر عن انك ممكن تكون متعرفش ولا اسم من اللي اتقالوا في المكالمة، وان دي يادوب الافتتحاية بس وانا شخصياً مش حقدر اكملها علشان وقت البرنامج، بس ايمان عقاب الهي بيصيب كل اللي يعرفوها، وبتلاقي اودانهم بعد فترة كده بتدلدل، وياحرام بيجيلهم فوبيا التليفونات.

ايمان مكنة رغي متنقلة، اول ما بتدوس على الزرار بتنطلق، وللاسف نسيوا يعملولها زرار ايقاف، لما بشوف نمرتها على تليفوني بابقى متأكد اني عملت حاجة غلط النهاردة وربنا بيعاقبني.

عارف انكم مستغربين وبتسألوا " طيب بترد ليه يا فالح.

نسيت أقولكم ايمان دي مديرتي في الشغل، ايه ده أنا أصلاً مقولتلكوش أنا شغال ايه، أنا شغال مدرس اشارة في مدرسة للصم والبكم.

استبدلنا كلبا يسرق طعامنا، بقطيع من الكلاب لا يكف عن النباح، ويستطعم لحمنا

يحكي في الاثر، أن عائلة كانت تحيا بجوار نهر عظيم، في أرض خصبة تطرح قمحها وفاكهتها وترعى فيها قطعانها، وان تلك العائلة اقتنت كلبا، لتأمن على أملاكها، واستئمنته على كل ما في أرضها.



وتمر الايام والسنون وتعاني العائلة الفقر والجفاف، يتهادى ماء النهر امام أعينهم، وهم يشتكون جفاف الحلق، تطرح اشجارهم فاكهة وخضارا وهو يعانون الجوع، تنبت ارضهم قمحا، وهم يشحذون القمح من المارة والجيران، والكل في ضيق وهم وكمد، حتى يكتشفون أن الكلب يسرقهم، ويبيعهم ويبيع كل خيراتهم ، فيثورون ويطردون الكلب ويحبسونه.



لكن رب العائلة استبدل الكلب بقطيع من الكلاب لا يكف عن النباح، ويستطعم لحم العائلة ذاتها، يملك الجينات نفسها في الكلب السجين، الا أن اكتافه تنوء تحت حمل نجوما من نحاس، وضعوها في الاعناق وفي الاكتاف كي لا تتوه الكلاب في مراع الخراف الاخرى، ونسى الجميع ان كلاب المراعي لا تصلح لسكنى الديار، وان الكلب الذي ينبح كثيرا ويعض صاحبه لابد من موته

محسن القليوبي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ' رمضان 2011









محسن القليوبي، هو بيحب ينطقها كده، بيعتبر أليوبي دي شتيمة وميصحش واحد في ثقافته يتنازل عن انه يتنادى باسمه صح، محسن بقى مثقف اصلي من مثقفين وسط البلد، اللي هما مطولين شعورهم، لابسين بنطلونات جينز مسمعتش عن اختراع الغسالة، لابسين نضارة ودقنهم دايماً طويلة، ضاربين تحت باطهم كتاب أو اتنين، ومعلقين على ضهرهم شنطة فيها اللاب توب بتاعهم، ومتسألنيش ليه مش حاطين الكتب في الشنظة لاني معرفش.

محسن القليوبي لازم لما يتكلم ينظر، تحس كده وهو قاعد على القهوة البلدي بيضرب القهوة في كوباية طبعا، انه واقف على مسرح بيخطب في المعجبين، ولازم يستشهد في كلامه بأراء فلاسفة وكتاب مشاهير، وياسلام لو اتريق على رأي واحد فيهم بس علشان يأكد للمستمعين ان عنده وجهة نظر.

محسن عادة مبيبقاش في جيبه اكتر من 3 جنيه، بيدفع بيهم حق القهوة، اللي هو اتنين جنيه ونص، ويروح بالنص جنيه اجرة اي توك توك.

من مستلزمات اي محسن برضو مزة من مزز وسط البلد، اللي هما برضو بيشبهوا بعض كتير، جينز وكوتشي وشعرها لاماه ببندانه، وعلى كتافها شال علشان القضية الفلسطينية، وطبعا بتشرب شيشة، محسن بيشرب سجاير برضو بس حسب الظروف، مصري مستورد مش مهم، المهم انه ينفخ الدخان في وش اللي بيكلمه.

محسن واحد من مئات المحاسن، قصدي المساوىء بتاعة مدعين وسط البلد، اللي عمق ثقافتهم ميزيدش عن رغيف كايزر، حافظين كام كلمة وبيرددوها من غير فهم ولا معنى، معارضين كل شىء حتى وجودهم.

لو حصل وشفتوه يوم في الأيام، متحاولوش تقنعوه يسرح شعره، ولا يغسل بنطلونه.

بس نادوا عليه بصوت عالي وقولوا يا أليووووووووووووووووبي

الثغرة .... لامؤاخذة ( الجزء 2)

يمتد اللون الأصفر في كل مكان، لا يكسر حدته وملله سوى تلك السماء الزرقاء، التي عبثت بها شمس الظهيرة وأحالتها بمعاونة رمال الصحراء الى زرقة مصفرة، مريضة، وصاحبنا يجر قدميه جرا، غير قادر على رفعها عن الارض، متشبث بزمزميته وذلك الماء القليل بداخلها، يدرك هذه المرة أن الانسحاب والعودة مختلفة.

في يونيو 67 مشى لمسافة اكثر من 300 كم مهددا بالموت بين لحظة واخرى، تحرقه شمس يوينو حين ينام مستترا عن طيران العدو، ويخنقه ظلام الليل الذى عاد فيه الى الضفة الغربية للقناة، مع الاف العائدين الذين قهرهم قرار انسحاب عشوائي قبل ان يقهرهم العدو الصهيوني، أما اليوم فهو يعود وحيدا بصحبة الضابط علي ، ضابط اشارة الكتيبة، يستخدمه عكازا حين تخونه قدماه، ينعي ما حدث امامه دون خجل، ولكن هذه المرة المسافة لن تزيد عن 3 ساعات من السير، حتى يعود للضفة الغربية للقناة، الجيش منتصر هذه المرة، ولكنه ينسحب، بعد أن خسر كتيبته بالكامل ، وفشل في تأمين الجانب الأيمن للجيش الثاني الميداني، واخترقته الدبابات الاسرائيلية.

**********

جلس الضابط ذو البشرة الداكنة أمام وحدته الجديدة مبتسما، صار يؤمن أن شيئاً ما يحميه، فعندما قام الفريق محمد فوزي بتطهير القوات المسلحة عقب هزيمة يونيو، وقام ناصر باستبعاد كل رجال المشير عامر من الجيش، بقى هو دون استبعاد، على الرغم من أن المشير عامر هو "واسطته" في دخول الكلية الحربية، وانه من رعاه في بداية حياته حفظا لجميل والده الذي كان يعمل لدى المشير عامر، وها هو الان بعد تسببه في الخطأ الفادح الذي كان احد الاسباب الرئيسية في ثغرة الدفرسوار، ينال ترقيته الجديدة ويتسلم رئاسة اركان أحد وحدات سلاح المشاة، في تسلسل طبيعي لوظائفه القيادية، لرغبة الرئيس السادات في تكتم احداث الثغرةن وعدم محاسبة المسئولين عنها، كي لا يستغل الاعلام هذا في تضخيمها عسكريا، حتى لا يفسد الانتصار.



*********

الليل تلك المرة مختلف، الليل قد اضاء واشتعل، اشعلته قذائف الدبابات، صاحبنا يرتعد في مركبته، فقد الاتصال بسرية الجانب الايمن، التي تتعرض لاختراق شديد، يحاول معاونتها بسرية النسق الثاني، الا انها تنهار تحت التفوق الرهيب للعدو في تلك اللحظات، تتوقف راسه عن التفكير، تتسارع ضربات قلبه ليعلو صوتها فوق صوت القذائف، يغادر مركبته مستكشفا، فيقذفه انفجار المركبة اثر قذيفة من العدو لعدة امتر، يدرك عقب السقوط أن الله قد كتب له الحياة، يتمنى نهارا، لا يعلم كيف يكون شكله



**********

يتأمل صاحبنا تجاعيده في المرآة ، يبتسم مرة اخرى، ويقول لنفسه : ما زال نفس الشيء يحميني، سقط النظام بالكامل وبقيت أنا ، بل ويهتف الثوار لي في كل مكان، مازال ملاكي الحارس يعمل بكفاءة.



*********



في الصباح اصاب صاحبنا الهلع، بين أكثر من 400 جثة لشهداء كانوا يوما افرادا وضباطاً في كتيبته، تحسس البعض، والبعض الاخر بحثاً عن حي، تجمد قلبه الى الابد من مصافحة وجوه الموتى، قرر العودة للضفة الغربية للقناة وفي اذنه يتردد بلاغا اتاه عبر جهاز اللاسلكي منذ عدة ساعات ، لم يعره اهتماما ساعتها " من فهد الى نسر هناك 7 دبابات اسرائيلية تتقدم في الجانب الايمن من قطاع مسئولية الكتيبة، حول".

*******

الراديو في تل ابيب يذيع البيان التالي يوم 15 اكتوبر : قامت قوات المظلات الإسرائيلية بالوصول للمواقع المتاخمة لمياه قناة السويس وعبرت القناة في قوارب مطاطية وكان ذلك يوم 15 أكتوبر وكان من المفترض أن تتصل بها قوات إريل شارون ليلا لإقامة المعبر على قناة السويس تمهيدا لعبور القوات الإسرائيلية إلى الضفة الشرقية لقناة السويس.

*******

الراديو في تل ابيب يوم 16 اكتوبر : تم قطع الطريق يوم 16 أكتوبر على قوات أريل شارون بعدما وصلت لمياة القناة وأصبح من المتعذر وصول معدات العبور وكذلك الجسور وأصبحت قواته معزولة تماماً بل ومهددة بالقضاء عليها فأصبح لزاماً على القوات الإسرائيلية القيام بمحاولة لفتح الطريق للإتصال بقوات إريل شارون المدرعة

******

الراديو في تل ابيب 17 اكتوبر : قامت قوات القائد الإسرائيلي " برن " بالهجوم على ثلاثة محاور المحور الأول شمالا للضغط على الحد اليمين للجيش الثاني الميداني و المحور الثاني جنوباً للضغط على الحد اليسار للجيش الثالث الميداني والمحور الثالث غرباً للهجوم على المزرعة الصينة وذلك لفتح الطريق والإتصال بقوات إريل شارون وبعد قتال ليلي عنيف ومعركة مدرعات تصادمية وقتال مباشر إستطاعت قوات " برن " فتح الطريق والإتصال بقوات إريل شارون عند ساحل القناة ومن ثم توصيل معدات وجسور العبور وفي يوم 17 أكتوبر 1973 وصلت القافلة إلى حدود قناة السويس وبدأ عبور المدرعات الإسرائيلية إلى الضفة الشرقية لقناة السويس وحدث ما يعرف بـ " ثغرة الدفرسوار " في الجيش المصري.

خالد زكي

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ' رمضان 2011







خالد زكي.. الشهير بـ"بعلزبول"، وبعلزبول دي يعني ابن الشيطان، بس ده كان وهو صغير، لان خالد بعد ما كبر قدر يثبت ان الشيطان نفسه مبقاش شاطر، لا ويمكن كمان يطلع معاش قريب.

خالد بيحب أي حاجة غلط، أو شمال يعني زي ماهو بيقول، يعملها من غير مايفكر، وعنده قدرة كمان يخللي اللي حواليه يعملوها وهما مقتنعين، لدرجة ابليس يا جماعة شخصياً كان بيكلمه يستشيره في حاجات كتير، وخالد لأنه مجدع وصاحب صاحبه بجد، كان بينصحه بكل اخلاص.

حتى زي اليومين دول في رمضان وابليس متسلسل في جهنم، بيبقى عامل حسابه وسايب لخالد ليستة بالحاجات اللي مخلصتش علشان يعملها مكانه، ولما بيرجع في العيد مبيسألوش لأنه متأكد ان خالد اكيد عملها احسن منه، ثقة متبادلة بين الاتنين.

خالد اساساً بيشتغل سلزجي، اه سلزجي يعني سيلز مان، مبيعات يعني بس هو بينطقها كده، وعلشان امكانياته المذهلة في الشيطنة يقدر يبعلك بيتك مرتين وتلاتة، رغم انه اصلا ملكك،ويبقى كمان عاجبك السعر وعايز تزودله بعلزبول ياجدعان.

ولكن برضو لانه في الاساس بني ادم، فميخلاش من كام حاجة حلوة، مثلاً يعني أي سفرية للساحل متحلاش من غيره، أي عطاية كده عطاية كده يا سلام لو هو فيها، النفسين من غيره ولايسووا.

خالد علامة مميزة حيفتكرها التاريخ لان زي ما كلنا عارفين ان اسلحة الشيطان في الاغراء تلاتة و هما الفلوس والستات والكيف زاد عليهم اليومين دول السلاح الأهم اللي هو خالد زكي.

اللي قبل ما تفكر في يوم انك تعمل حاجة شمال غلط يعني ، حتلاقيه واقف جنبك بيساعدك بس انت قرر وانوي وسيب الباقي عليه.

حسني مبارك

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ' رمضان 2011







فلان الفلاني... السن كتيييير تقريبا كده معدي التمانين، لا بيفهم ولا عايز يفهم، يمكن بحكم السن، ويمكن بحكم الغرور المهم انه دايما راكب دماغه والسلام.

فصيلة دمه ميم، ولما سألنا عليها الدكاترة قالوا يعني مفيش، مواصفاته ايد طويلة وضنير معدوم

بس الحقيقة هو عنده هوايتين كل واحدة فيهم اغرب من التانية، الهواية الاولى انه يبني كباري، في كل تقاطع، أو ميدان عمل كوبري، ولما سالنا دكاترة علم النفس قالوا ده دليل انه اتحرم يلعب بالميكانو وهو صغير، وزي ما احنا عارفين عقد الطفولة بتأثر فينا لما نكبر.

الهواية التانية الكراسي، واقع في غرام كرسيه، لدرجة انه لزق عليه سنين،وبيقول اسطوات النجارة عن الهواية دي ان اللزقة دي ميكفيهاش ولا ألف كيلو غرة، أما أصحاب المكتبات فبيقولوا انه علشان اللزقة دي كان محتاج يستورد كل انتاج العالم من الصمغ ييجي عشر سنين.

سمعه ضعيف، مبيسمعش غير نفسه، نظره اضعف من سمعه، فمشافش اي حاجة صح، اما احساسه فشبه معدوم علشان كده كان مستحيل يحس باللي بيحصل حواليه.

واللي حواليه ما بين قواد وطبال وحرامي، بيلاقي نفسه وسطهم ، وكأنهم بالظبط عصابة مافيا، وبيقول في ده العصبجية القدام اصحاب الخبرة الاجرامية انه راجع لكونه وهو صغير مكانش العيال زمايله في المدرسة بيرضوا يلعبوه معاهم عسكر وحرامية.

كمان وهو صغير المدرس بتاعه قاله والله ما انت نافع، ولما جاب تمانية واربعين في الميه في ثانوية عامة، اتاكد ان كلام المدرس كان صح، والايام بعد كده اثبتت ده جدا.

بصراحة انا نفسي مجبتنيش أقول اسمه في أول الحلقة ولا اخرها، وانتم برضو أكيد عرفتوه، اللي فقرنا وهبرنا وخرب البلد على دماغنا

اقولكم لو مش عارفينه، حتلاقوه في شرم الشيخ

هند ياثين

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ' رمضان 2011









هند ياثين، شابة مصرية طموحة جدا، من وهي صغيرة وهي بتحلم تبقى مذيعة، والبنت بصراحة عملت كل اللي عليها، ذاكرت واجتهدت وجابت مجموع دخلها كلية الاعلام واتخرجت وطلعت من الاوائل.

بس هند كان عندها مشكلة واحدة بس، هي صحيح مشكلة بسيطة بس وريتها الويل، المشكلة دي ان هند لذغة في السين اللي بتنطقها ثه، وكمان في الريه اللي بتنطقها لام.

علشان مده مفيش ولا قناة ولامحطة ولا اذاعة ولا حتى كوباية زبادي رضيت تشغلها مذيعة، جابت ييجي فدانين كوسة، علشان تشتغل بس ياحرام منفعش، بس هي عمرها ما يأست.

وفي عز ما كانت الثورة مشعللة ، وهند بتهتف في ميدان التحرير من كل قلبها "الشعب يليد اثقاط النظام" اتعرفت على أحمد ثلي مراسل قناة من قنوات الاخبار الاجنبية، وكيوبيد عمل عمايله وحبوا بعض خلال أيام بسيطة.

أحمد كأي حبيب يعني قرر يساعدها في تحقيق امنياتها، سجل معاها تقرير عن الثورة، اتشاف على اليوتيوب حوالي اربعين ألف مرة في يوم واحد ، كسر الدنيا يعني، صحيح الناس كانت بتشوفه علشان تضحك وهند بتقول " حثني لازم يمشي، لو لاجل ياخد قلاله بالتنحي، احنامش حنلوح بيوتنا، لازم يفهم انها ثولة، والثولة دي ثلها لغبة الشعب في التغييل، وشعالها الشعب يريد اثقاط اللئيث".

بس برضه هند مهماش، واعتبرت ده في حد ذاته نجاح لدرجة انها شيرت الفيديو ده عندها على الفيسبوك اكتر من عشرين مرة.

والنهاردة واحنا في الشهر الكريم ده، أحب أقولكم ان هند اشتغلت مذيعة، ايوة هند اشتغلت مذيعة، صحيح بلغة الاشارة للصم والبكم في قناة دينية، بس اشتغلت مذيعة، بس اللي نفسي اعرفه بقى هي لدغة كمان في لغة الاشارة ولا لأ.

سعيد نظيف

برنامج "ولاد الحرام مسابوش لولاد الحرام التانيين حاجة" راديو ميجا اف ام 92.7 ' رمضان 2011









سعيد نظيف، اللي بمجرد ما بينطق اسمه الملايكة بيكتبوله سيئة علشان كدب، لانه بصراحة لا سعيد ولا نظيف، بس خلينا منتكلمش في موضوع هو ليه مش سعيد، علشان انا مبحبش اجيب في سيرة الناس، خلينا في موضوع مش نظيف ده، لانه تاعبني انا شخصيا ومكرهني ومكره نص شعب مصر في نصها التاني.

علاقة سعيد بالحمام غامضة جدا، وفي المرات النادرة اللي اتقابلوا فيها متفقوش مع بعض، لدرجة ان شركة الميه شكت في سعيد وركبتله تقريبا حسب ما عرفت عداد جديد بيقيس بالفيمو ميه على رأي الدكتور زويل.

ورغم كده عمر فاتورته ما زادت عن تلاتين قرش، انا اتهيألي هو بيكره الميه لدرجة انه مبيشربش كمان.

سعيد بقى موطنه الأصلى مترو الأنفاق، هناك بيلاقي نفسه وسط مئات من الروايح اللي تفتح القلب في عملية قلب مفتوح من الصدمة، بس اللي يغيظ انه عارف امكانياته، فعمره ما فرقت معاه زحمة، لانه اول ما يحس بالخطر وان الناس حتزنقه، هوب يروح رافع ايده ماسك ماسورة المترو، ومصدر للناس باطه اللي هو خط دفاعه الأول، يحصل نوع من الصدمة والرعب لكل اللي حواليه، تخليهم على الاقل يبعد من تلات لخمس خطوات، ولو كان المترو اوسع كانوا بعدوا اكتر.

سعيد طبعا عايش في البيت لوحده، لا حد بيزوره ولا بيزور حد، مين يعني حيستحمله، ولانه ميوعاش على باباه ومامته اللي تقريبا ماتوا هما الاتنين قبل ما يتولد، كانوا لما يسألوه في الفصل نفسك تطلع ايه لما تكبر، كان يسرح بخياله ويرد بكل حب ويقول : شجرة صبار

سعيد ياجماعة عنده مبدأ، أكيد حنختلف معاه فيه، بس لازم نحترمه، فمش لازم لو قابلتوه في الشارع يبان على وشكم القرف، علشان منجرحهوش، وده طبعا حيفرق حسب التوقيت اذا كان شتا ولا صيف، وطبعا الشتا أرحم بكتير.

بس انا نسيت اقولكم حاجة، ان سعيد نظيف المواطن المصري شغال في مرفق تجميل القاهرة.

لعنة الفراعنة

مصر دولة عريقة، ليها تاريخ ممتد لاكتر من سبعتلاف سنة، زرع فيها تقاليد كتير زي تأليه الحاكم مثلاً، وده طبعا ميراث أجدادنا الفراعنة، لكن اللي احنا اكتشفنا حقيقته اليومين دول هو "لعنة الفراعنة"، اللي مطلعتش بتموت الناس وتدمر حياتهم لما يكتشفوا ويدخلوا مقابر الفراعنة العظام، لا... دي طلعت لعنة حطوها على كراسي السلطة في مصر.

أيوة لعنة الفراعنة هي لعنة اصابت كراسي السلطة في مصر، فتلاقي المسؤول من أول عضو مجلس محلي لحد رئيس جمهورية يبقى طيب ولذيذ كده قبل مايقعد على الكرسى، تصيبه ياحول الله لعنة الفراعنة يتحول وينسى أول ما ينسى الشعب اللي حطه على الكرسي ده.



الغريب ان الكرسي اللي بيعتبروه في الدول المتقدمة مجرد قطعة من الاثاث، اتحول بقدرة قادر في مصر لحلم، وهدف، وطريقة مثالية لرحلة المليار، وهو ده الفكر الجديد .

لعنة الفراعنة اتطورت في أخر تلاتين سنة علشان متكونش بس خاصة بالسلطة، لا كمان تبقى خاصة بالثروة، وبكده نقدر بكل فخر نواجه العالم كله ونتحدى كل المشككين في اصولنا الفرعونية ونقولهم، احنا المصريين أحفاد الفراعنة العظام والدليل اننا حافظنا على لعنتهم لا وكمان طورناها.



تعالوا بقى معايا نتكلم مثلا عن وظيفة رئيس الجمهورية، بصفتها صاحبة اكتر كرسي اصابته اللعنة دي، واللي سياسيا ودوليا وحتى بتحاليل الدي ان ايه ثبت انه مش أب للشعب، ولا اله مقدس وانه يادوب موظف حكومي بدرجة رئيس جمهورية وظيفته حسب المادة (73) في الدستور انه يسهر علي تأكيد سيادة الشعب‏ ، وعلي احترام الدستور‏،‏ وسيادة القانون‏،‏ وحماية الوحدة الوطنية‏ ،‏ والعدالة الاجتماعية‏ ،‏ ويرعى الحدود بين السلطات لضمان تأدية دورها فى العمل الوطنى‏. وطبعا ده اللي مبيحصلش خالص ولا عمرنا ما شفناه.

بس استنوا كده اتهيألي ان في جزء تاني من اللعنة دي كمان نسينا نتكلم عليها، الجزء اللي بيصيب الشعب بمجرد ما يشوف حد على الكرسي، ويقرر انه يحس باليتم فجأة ويبقى الريس بابا وماما وانور وجدي،لا والمصيبة الاكبر انه ساعات بيعبده، فرعوني فرعوني يعني، بس هواية عبادة الحاكم المرادي مش لعنة، ده اثبات نسب باننا مصريين فراعنة.