هبه > Recent Status Updates

اه من ذكريات الثورة والي بتعمله فينا ذكريات الثورة.

الكتاب ده بقرأ منه 10 صفحات في اليوم، يا دوب أقدر اتنفس بعدها وأهضم الكلام وافكر فيه ويعيش معايا لحد تاني يوم. مش قادرة افتكر ابدا اني قرأت كتاب بالعربي بيتكلم عن جروحي بالشكل ده قبل كدة!

كنت بقرأ تفاصيل العملية الي عاملها في ايده. والمترو بيدخل تحت الارض. ولسبب ما حسيت بضيق تنفس رهيب وحسيت اني مش كويسة. الكتابة سلسلة وجميلة بس الأحداث قاسية وحاسة اني يمكن مقدرش أكمله.

انا بقرأ الكتاب على أبجد، ففي طريقة مختلفة للترقيم غالبا علشان الموبايل، الكتاب على الابلكيشن 700 صفحة.
انا ابتديت استخدم عذر " معلش كتب كتاب خالتي مش هينفع" وحاسة انه مناسب اوي.

في العادي مش بحب اقرأ الحاجات الي كل فصل فيها بيتكلم عن حاجة منفصلة، وده مخلي في عداء بيني وبين القصص القصيرة على اهمتها، بس انا بحب اقرأ بلال فضل.
في فصل هنا كان بدايته عن الوابور فحسيت اني هقرأ حاجة ليها علاقة بذكرياتي عن الوابور والدش السخن نار الي كنا بنتلسوع بيه في طفولتي، بس الي حصل غير الي توقعته. كنت بضحك لحد ما عيني تدمع في المترو، وبعدين احس بالذنب اني بضحك فاسكت شوية، اقرأ كلمتين تانين ورا بعض الضحك يبدأ.

انا عرفت مضايقني ايه في الكتاب، حاجتين: اولا انه يبدو انه فيه حكي شخصي كتير بس الحقيقة انه الكتاب مهتم يحكي كل ما هو حوالين الشخص لكن مش داخل الشخص، وده حلو، متفق مع هدف الكتاب.
انه بين كل وصف لشخص او حدث او اغنية بيقول رائع 3 مرات لحد ما تشبعت، ليه مش بتسيبني احس انا انه رائع؟

الكتاب جميل وممتع لكن في حاجة فيه مضيقاني مش عارفة احط ايدي عليها، هنشوف

أول مرة على حد ذاكرتي أسمع كتاب 😍
وتقريبا أول مرة اضطر اوقف المزيكا الي بسمعها في المترو علشان اقرأ بتركيز، لان الموسيقى التصويرية جاهزة في الكتاب.