நட்சத்திரத்தின் நிழல்

ஒருவர் உங்களை வானளாவப் புகழ்கிறார் என்றால் அது வெறும் பாராட்டாக மட்டுமிருக்காது. புகழ்பவர் மனதில் வேறு ஏதோ எண்ணங்கள் இருக்கக் கூடும். உங்கள் இடத்தை அடைவதற்குக் கூட அவர் உங்களைப் புகழக் கூடும். அபிமானியாக இருப்பவர் அப்பாவியில்லை. அவரது நோக்கம் கொஞ்சம் கொஞ்சமாக வெளிப்படும் நேரத்தில் நீங்கள் அதிர்ச்சி அடைவீர்கள். அரசியலிலும் வணிகத்திலும் திரைத்துறையிலும் இது போன்ற அபிமானிகளை, ஆராதகர்களை நிறையவே காணலாம். பல்வேறு உண்மை நிகழ்வுகள் இப்படி நடந்துமிருக்கின்றன.

ஆறு ஆஸ்கார் விருதுகளை வென்ற ஆல் அபௌட் ஈவ், திரைப்படத்தின் கதையும் இதுவே. இதனை ஜோசப் எல். மான்கிவிச் இயக்கியுள்ளார். 1950ம் ஆண்டு வெளியானது.

சிறந்த திரைக்கதை. நடிப்பு. இசை, கலைஇயக்கம். ஒளிப்பதிவு இயக்கம் என ஹாலிவுட்டின் தேர்ந்த கலைஞர்கள் ஒன்று சேர்ந்து இந்தப் படத்தை உருவாக்கியிருக்கிறார்

இயக்குநரும் நடிகருமான ராபர்ட் ரெட்போர்ட் தன்னை மிகவும் பாதித்த படமிது என்று குறிப்பிடுகிறார். அத்தோடு இதில் வெளிப்படும் பொறாமையும் ரகசிய ஆசைகளும் உண்மையானவை., படத்தின் வசனங்கள் மறக்கமுடியாதவை. அவை இன்றுவரை பொன்மொழியைப் போல எடுத்தாளப்படுகின்றன என்றும் குறிப்பிடுகிறார்

படம் ஒரு விருது வழங்கும் விழாவில் துவங்குகிறது.

இளம் நடிகை ஈவ் ஹாரிங்டனைக் கௌரவிக்கும் விதமாக அவருக்குச் சாரா சிடன்ஸ் விருது வழங்கப்படுகிறது. அதன் அறிமுகத்தை நிகழ்த்து நாடக விமர்சகரான அடிசன் பங்கேற்பாளர்களை அறிமுகம் செய்து வைப்பதுடன் ஈவ் ஹாரிங்டனைப் பற்றிப் புகழ்ந்து சொல்கிறார்.

அந்த நிகழ்வில் கலந்து கொள்ள வந்துள்ள நாடக ஆசிரியர் லாயிட் ரிச்சர்ட்ஸின் மனைவியான கரேன் ரிச்சர்ட்ஸ் அறிமுகமாகிறாள்.

அவள் ஒரு நாள் நாடக உலகின் புகழ்பெற்ற நடிகையான. மார்கோ சானிங்கை காணச் செல்கிறாள். அப்போது மார்கோவின் தீவிர ரசிகையாக ஈவ்வை சந்திக்கிறாள். தன் வாழ்நாளின் கனவு ஒரேயொரு முறை மார்கோ சானிங்கை சந்திப்பது என ஈவ் கூறுகிறாள்.

உடனடியாக ஈவின் ஆசையைக் கரேன் நிறைவேற்றுகிறாள். அந்தச் சந்திப்பில் ஈவ் தனது கடந்தகாலச் சோகக் கதையைச் சொல்கிறாள். அதில் நெகிழ்ந்து போன மார்கோ சானிங் ஈவை தனது உதவியாளராக மறுநாளே வேலைக்குச் சேர்த்துக் கொள்கிறாள்.

மார்கோவின் செயலாளர். வீட்டு நிர்வாகி. உதவியாளர் எனப் பல்வேறு பொறுப்புகளைத் திறம்படச் செய்து ஈவ் நற்பெயர் வாங்குகிறாள். ஆனால் அவளது உண்மையான நோக்கம் மார்கோவை போல நாடகஉலகில் நடித்துப் புகழ்பெற வேண்டும் என்பது.

அதற்காகத் திறமையாகக் காய் நகர்த்துகிறாள். மார்கோவிற்குக் கிடைக்க வேண்டிய வாய்ப்பினைத் தட்டிப் பறிக்கிறாள். உண்மை அறிந்த மார்கோ அவளை வேலையிலிருந்து துரத்துகிறாள். ஆனால் அது தனது அறியாமையில் ஏற்பட்ட தவறு என மன்னிப்பு கேட்கும் ஈவ் மார்கோவை நாடக உலகை விட்டு வெளியே அனுப்பும் திட்டத்தைத் தீட்டுகிறாள். இதற்காகப் பத்திரிக்கை உலகை சேர்ந்த ஒருவருடன் கைகோர்க்கிறாள்.

தனது ரசிகையால் தான் ஏமாற்றப்பட்டதை உணர்ந்த மார்கோ தனது இடத்தைத் தக்க வைக்கப் போராடுகிறாள். ஈவ்வின் தந்திரங்கள் அவளை ஆத்திரப்பட வைக்கின்றன. ஈவ் தான் நினைத்தபடி நாடகஉலகில் நுழைந்து புகழ்பெறுகிறாள். விருதும் வெற்றியும் தேடி வருகின்றன. மார்கோவின் வாழ்க்கை என்னவானது. அவள் ஈவை மன்னித்தாளா என்பதைச் சுற்றி படத்தின் பிற்பகுதி விரிவடைகிறது

மார்கோவை காதலிக்கும் இயக்குநர் பில் சிம்சன் அழகான கதாபாத்திரம். அவர் ஒருவரே மார்கோவை முழுமையாகப் புரிது கொள்கிறார். இது போலவே அவளது தோழியாகக் கரீன் ரிச்சர்ட்ஸ். அவர்கள் நட்பும் படத்தில் நேர்த்தியாக வெளிப்படுகிறது.

ஈவ் வெறும் ரசிகையில்லை. தனது திறமையை வெளிப்படுத்த எதையும் செய்யத் துணிந்த பெண். தனது வாய்ப்பிற்காக ஈவ் காய்களை நகர்த்தும் விதம், தற்செயலாக நடப்பது போலத் திட்டமிட்டு வாய்ப்புகளைப் பெறும்விதம். அவளது தந்திரங்கள் யாவும் அவள் எந்த அளவு துணிச்சலாக நடக்ககூடியவள் என்பதை வெளிப்படுத்துகின்றன.

அவள் மேடையில் அல்ல நிஜவாழ்வில் நடிக்கிறாள். நாடக மேடையில் புகழ்பெற்ற மார்கோ முன்பாகவே நடித்து அவளை நம்ப வைக்கிறாள். அந்தத் திறமையே அவளது நம்பிக்கை. விருது பெற்ற பின்பும் அவள் தனது பொய்யான புகழ் உரைகளைக் கைவிடுவதில்லை. உணர்ச்சிப்பூர்வமாக நன்றி தெரிவிப்பதன் மூலம் அதை உறுதிப்படுத்துகிறாள்.

லாயிட் மற்றும் கரனுடன் உணவருந்தும்போது மார்கோவும் பில்லும் தங்கள் திருமணத்தை அறிவிக்கிறார்கள். அதே உணவகத்தில் அடிசனுடன் உணவருந்த வரும் ஈவ் கரனை மிரட்டி தனது காரியத்தைச் சாதிக்க முயலுகிறாள். அங்கே எதிர்பாராத வெற்றி அவளுக்கு எளிதாகக் கிடைக்கிறது

கரனும் மார்கோவும் ரிச்சர்ட்டும் ஒன்றாகக் காரில் பயணம் செய்யும் காட்சி சிறப்பானது. அதில் மார்கோவின் மனது முழுமையாக வெளிப்படுகிறது. அவள் நாடக உலகிலிருந்து இயல்பான அன்றாட வாழ்க்கையை நோக்கி இறங்கி வர முயலுகிறாள். ஆனால் ஈவ் தனது கடந்தகாலத்தை மறைத்துக் கொண்டு புகழ்ஏணியில் உச்சம் தொட முயலுகிறாள். இந்த இருவரது செயல்களும் படத்தினைச் சிறப்பான படைப்பாக்குகின்றன.

மார்கோ சானிங்காகப் பெட்டி டேவிஸ் ஈவ் ஹாரிங்டனாக ஆன் பாக்ஸ்டர் இருவரும் மிகச்சிறப்பாக நடித்திருக்கிறார்கள். ஆனால் இருவருக்கும் ஆஸ்கார் விருது கிடைக்கவில்லை.

படத்தின் இறுதிக்காட்சி சிறப்பானது. குறிப்பாகப் புகழ்பெற்ற நடிகையான ஈவ் வீட்டிற்கு வரும் இளம் ரசிகையும் அவள் நடந்து கொள்ளும் விதமும் இது தொடரும் கதை என்பதையே நினைவூட்டுகிறது.

நாடகம் போலவே காட்சிகள் உருவாக்கப்பட்டிருக்கின்றன. திரைக்கதையில் பெரிய திருப்பங்கள் கிடையாது. பெட்டிடேவிஸின் உடல்மொழி. அவரது கோபத்தை வெளிப்படுத்தும்விதம் அபாரம். எழுபது ஆண்டுகளுக்கு முந்தைய அமெரிக்க நாடக, திரையுலக வாழ்வினைச் சொல்லும் படமாக இருந்தாலும் இன்றைய இந்திய திரையுலகிற்கும் பொருத்தமானதே.

••