Chanette Paul's Blog, page 4
January 26, 2014
Izak de Vries oor o.m. die blivet in Siende Blind
Ek het bloot toevallig op hierdie lekker bespreking van Izak de Vries oor Siende Blind, onder meer oor die blivet-motief, raakgeloop.
Ek plaas dit hier met Izak se toestemming.
Siende blind, deur Chanette Paul
Bespreking – Izak de Vries
Moet nooit jou oë glo nie, want tot op die laaste bladsy is jy siende blind!
Siende blind is ’n spel van gesteelde identiteite en verskuilde agendas. Reg aan die begin van die teks is daar ’n outeursnota oor ’n blivet, ook bekend as ’n duiwelsvurk. Die kunstenaar M.C. Escher het die blivet beroemd gemaak met sy realistiese uitbeeldings van onmoontlike situasies. Chanette Paul doen dit hier in woorde. 
Wie is werklik en wie nie?
Cara van Dijk het om den brode begin romanses skryf – dink aan Mills & Boons. Sy is baie goed betaal hiervoor, maar haar skatryk pa, Karel van der Linde, en snobistiese man, die beeldhouer Paul van Dijk, dwing haar om ’n skuilnaam, Mignon Maydon, te gebruik. Cara bewaak haar skuilnaam baie goed, want toe sy besluit om ’n volle roman, When we belong, te skryf, is daar talle raakpunte met haar eie gesin se doen en late.
When we belong word ’n internasionale treffer en Cara word ryk. Toe plof haar wêreld egter in duie. Haar man skei haar, haar rekenaars word gesteel, haar skootrekenaar word lamgelê deur ’n virus en ’n baie slim kuberkraker neem haar identiteit in die kuberwolk oor. Skielik is iemand anders Mignon Maydon. Nie net Cara se geld nie, maar haar hele skrywersbestaan word bedreig. Toe ’n aantal mense ná aan haar boonop genadeloos vermoor word, besef Cara dat sy nou vir veel meer as haar loopbaan sal moet veg – haar lewe is op die spel.
Wie kan sy vertrou? Soos met ’n blivet bestaan nie een van die mense om haar skynbaar in net een werklikheid nie.
Die leser weet later ook nie wie te vertrou is en wie nie. Jy moet tot die einde lees om te weet.
Monique Bisschoff het hierdie prentjie gedeel op Facebook en Chanette het laat weet: “Dis nes Cara gevoel het!” Ek wil byvoeg: “Die leser ook!”
’n Metaroman
Siende blind is ’n roman oor die skryfproses. Dit is ’n metateks wat nooit verval in hoogdrawendheid nie. Op bladsy 186 staan:
When we belong is dalk nie onsterflike kuns nie, maar die resensente het haar geloof vir onder meer die egtheid van haar karakters – die deernis met individue in die besonder – maar ook haar begrip vir die wyer opset van menswees.
Bogenoemde kan ook ’n opsomming van Siende blind wees.
Ons mag egter nooit die blivet vergeet nie. Selfs die romantiese aspekte in hierdie teks kom onder die loep. Daar is een “tipiese” romantiese held in hierdie verhaal, hy vee letterlik Cara se voete onder haar uit. Maar kyk maar self hoe hy dit regkry – die duiwelsvurk is ook hier aan die werk!
Dan is daar ook die spel oor wat moontlik is, al dan nie, in ’n roman. Kevin Ryan, ’n medeskrywer, sien haar een dag langs die pad. Op daardie stadium ken hy en Cara mekaar nie. ’n Aantal dae later ontmoet hulle weer, dié keer by ’n konferensie. Dan volg die volgende stukkie dialoog tussen die twee skrywers (bladsy 105):
“Sal nooit in ’n boek werk nie.” Sy handdruk is sterk, maar bedagsaam. “Te toevallig.”
“Nooit nie, heeltemal te toevallig,” beaam sy en lag vir die eerste keer in meer as ’n week.
’n Genrekraker
Siende blind is in die eerste plek ’n heerlike storie. Dit was vir weke lank in die top 40 van Suid-Afrikaanse verkope (gemeet teen internasionale boeke soos Fifty Shades of Grey) en was vir twee weke ná mekaar selfs nommer vyf.
Dit is ’n gewilde, populêre roman sonder aanstellerigheid. Net soos Cara, die hoofkarakter, probeer Chanette nie hogere literatuur te pleeg nie, maar daar is pitkos in hierdie teks en heelwat wat leeskringe sal kan uitmekaartrek as hulle sou wou.
’n Aantal skrywers en akteurs tree as karakters op in Siende Blind. Talle van die skrywers verbreek die streng genre-indelings. Let byvoorbeeld op hoe Kevin Ryan se boeke beskryf word – hulle pas ook nie mooi in boksies nie.
Siende blind is ’n misdaadroman, dit bevat romantiese elemente en dit ondersoek sigself op ’n metavlak sonder om te probeer “hoë literatuur” wees.
Die karakters
Ek het aan Chanette genoem dat ek mal was oor haar manlike held; dit het ek gesê juis omdat ek dikwels krities wees oor haar vorige manlike helde.
Selfs die skurke het baie positiewe eienskappe.
Sophia Kapp het die volgende gesê oor Siende blind:
Wat ’n heerlike storie. Ek het teen die einde daardie tipiese paniek -lees ervaar wat ’n mens kry wanneer ’n storie jou so meegesleur het dat dit letterlik voel asof jy oor ʼn waterval getrek word: daar is net nie keer nie. Ek was geïrriteerd met onderbrekin gs en wou tot elke prys klaar lees. Dit het behoorlik konsentrasie en selfdissipline gekos om nie my taak as keurder te vergeet nie – ek wou eintlik net lees vir die lekker. Ek het lank laas so volledig met ʼn vroulike hoofkarakter geïdentifiseer, en dis nie baie stories wat my so lank aan die wonder gehou het nie. Die karakters is sterk, realisties, geloofwaardig en interessant, die dialoog is uiters geslaag, die plot is meesterlik beheer en die spanning nie vir ʼn oomblik toegelaat om te verslap nie.
***
Lees ook die stukkie in Die Burger wat nog ʼn De Vries, dié keer Willem, geskryf het na aanleiding van ‘n e-pos onderhoud met my oor die Lekkerlit-prys:
http://www.dieburger.com/vermaak/2014-01-25-paul-se-roman-weer-lesers-se-gunsteling
Siende Blind is onder meer beskikbaar by Kalahari.com, Graffiti Boeke en
http://www.loot.co.za/product/chanette-paul-siende-blind/ytlv-2640-g770
En as e-boek by
January 23, 2014
Lekkerlit 2013: Dankie vir julle stemme!
Danksy julle, my wonderlike lesers, het Siende Blind weggestap met die titel vir Lekkerlit Boek van die Jaar – 2013!
Julle het sekerlik baie moeilik gekies tussen sulke lekker boeke, daarom waardeer ek dat julle keuse op Siende Blind geval het soveel te meer.
Dis ook vir my ‘n groot pluimpie dat dit die tweede keer is dat lesers die Lekkerlit-prys aan een van my boeke besorg.
Verlede jaar was dit Maanschijnbaai: Jo & Sue
Lees meer by:
http://lapa.bookslive.co.za/blog/2014/01/22/chanette-paul-wen-weer-die-lekkerlitprys/
Die ses boeke waaruit in 2013 gekies kon word, was:
Elkeen is ‘n lekkerte op sy eie!
As jy nog nie almal gelees het nie, wag daar ‘n heerlike leestyd vir jou.
January 13, 2014
‘n jaar met vele aansigte: Julie – Desember
Die tweede helfte van die jaar was al die pad skuinstes – op en af!
Julie
Siende blind verskyn amptelik in Julie en is binne twee maande herdruk. Dit het baie goed op die topverkoperlyste gevaar en verkoop steeds goed al gaan dit nou stadiger.
Van 9 – 25 Julie is ek en Blom Istanbul en Griekeland toe vir ons eerste volwaardige vakansie in die tien jaar wat ons mekaar ken.
Die eerste dag in Istanbul gaan ons Taxim-plein toe – iets waaroor ek later in ʼn rubriek in Rapport Boeke skryf:
http://www.rapport.co.za/Boeke/Nuus/Ter-ere-van-die-dapper-lesers-20131101
Ons besoek ook Athene, Paros, Santorini en gaan toe weer terug Paros toe. ʼn Onbeskryflike ervaring!
Augustus
Op 1 Augustus kuier ek by Caledon se biblioteek en word behoorlik bederf!
Kort daarna is dit Vrouedag en die Kalfiefees en Izak de Vries gesels met my en Johan Kruger wat Die Vloek geskryf het en vir die ATKV Prosa-prys benoem is.
Ek hoor ook dat Die Maanschijnbaai-tweeluik ʼn finalis is vir die Woordveertjie in die liefdesroman-kategorie.
En ek kry die skoknuus dat iemand wat vir my baie spesiaal is, onverwags oorlede is.
Die mond tussen die see en Hermanus strandmeer gaan in die vroeë oggendure oop en die Kleinerivier wat in vloed was, loop binne ure leeg tot normale vlak. Blom se boot beland op ʼn boomstomp. Die skade is kwaai, maar darem nie onherstelbaar nie. 
September
Carla van der Spuy gesels met my op Tulbagh by hulle Lentefees.
Ek en Blom woon die Woordveertjiefunksie by en al wen ek toe nie, was dit ʼn wonderlike geleentheid en Kristel Loots die waardige wenner in ons kategorie.
Intussen skryf ek nog dat dit klap aan Raaiselspieël.
Oktober
Vroeg in Oktober neem ek deel aan die SASNEV leesdag en Izak de Vries gesels met my oor Siende Blind. Wat ʼn wonderlike geleentheid en boonop ʼn voorreg om na soveel uitgelese skrywers te kan luister al bibber ons behoorlik van die koue.
My verjaardag bring ons op ʼn sopnat en koue, maar steeds magiese Nieu-Bethesda deur aangesien ons op pad is Bloemfontein toe. Die biblioteke daar het my uitgenooi om te kom gesels oor my spanningsromans. Weer eens is ek heerlik bederf.
My bouer oortuig my om die tweede fase van die skryfhuis, ʼn tweede slaapkamer, aan te bou en hy begin fondasies grawe.
November
Ons gaan Prins Albert toe, woon die wonderlike Leesfees daar by. Rachelle Greeff gesels met my oor Siende Blind en sommer alles en nog wat.
15 November vlieg ek Port Elizabeth toe en die volgende dag gesels ek en Irma Joubert met Elizma Harmse oor my Siende Blind en Irma se splinternuwe Tolbos.
ʼn Wonderlike belewenis, maar ek hoor ook kort voor ons praatjie begin, vloede dreig in Stanford en dat die pad tussen Hermanus en Stanford onbegaanbaar is. Ek vlieg die middag terug Kaap toe en moet Caledon om ry in gietende reën op paaie waar die water plek-plek oor spoel. Die engele werk hard en ek kom veilig aan, maar dit word ʼn angswekkende aand. Ons hoor van vriende wie se huise oorspoel is, maar word begenadig toe die rivier drie meter van ons stoep af ʼn laaste sug gee en toe geleidelik begin sak.
Rampe en reise ten spyt, moet die “show” aangaan en die skryfwerk ook. Ek kry die keurdersverslag vir Raaiselspieël en moet vir oulaas afrond en drade knoop.
Op 21 November stuur ek die manuskrip in vir redigering.
Desember
Die vierde kry ek die redigeerde manuskrip terug en begin deur die veranderinge gaan.
Op 5 Desember is dit presies tien jaar sedert ek en Blom mekaar ontmoet het.
Die volgende oggend word ons begroet met die nuus van ons Madiba se oorlye die vorige aand.
Ek brand vir dié uitsonderlike man ʼn kersie en moet toe vir Irma Joubert en Izak de Vries gaan ontmoet vir ons leesoggend hier op my eie dorp.
Izak, in sy Mandela-hemp, bring ʼn pragtige huldeblyk aan Tata voor ons oor boeke begin gesels. ʼn Heerlike oggend, al was ons almal maar hartseer.
Heel toepaslik, is dit daardie aand tyd vir Stanford se Engeleaand by Mariëtte aan huis – ʼn vrou wat self ʼn engel in menslike gedaante is en gereeld haar versameling engele afstof en uitstal en almal uitnooi om te kom kyk. Die toegangsfooi gaan vir die DBV en almal bring hulle piekniekmandjies en adem die atmosfeer in die feetjiemooi tuin in.
Saterdag die 7e, stuur ek die finale en geredigeerde weergawe van Raaiselspieël in.
Op 18 Desember is dit weer tyd vir slegte nuus. ʼn Goeie vriend van Blom is onverwags oorlede. Ons harte gaan uit na sy familie, geliefdes en vriende. Ons is bly ons kon hom ken.
Die 20e kry ek die bladproewe te kry wat teen 7 Januarie gelees en gekorrigeer moet wees. Dis iets wat my Desember-planne so bietjie in die wiele ry, maar ek kon darem ʼn paar dae wegbreek Visvrou toe en die sonsondergang en maanopkoms waardeer.
En skielik is dit Kersfees! 
Gedurende die jaar het Madiba, familie, vriende en ook goeie kennisse aan die dood afgestaan, ons het gehoor van nuwe geboortes en het verjaardae saam gevier. Die jaar was in nabetragting ʼn mikro-weergawe van die lewe se groter bestel. Hartseer en vreugde, harde werk en blaaskanse, rampe en hoogtepunte. Dit het alles bevat wat mens van die ondermaanse kan verwag, maar uiteindelik was dit ʼn geseënde jaar.
Mag
vir jou vreugde en vrede bring.
December 29, 2013
2013 – ʼn Jaar met vele aansigte: Januarie – Junie
Dit was ʼn opwindende jaar met baie hoogtepunte. Daar was egter ook ʼn hele paar rampspoedighede en hartseer. Omdat dit ook ʼn baie bedrywige jaar was, het my blog grotendeels agterweë gebly. Ek haal hier ʼn bietjie in oor wat in die eerste ses maande gebeur het op sowel skryf- as huisfront.
Januarie
Ek skryf nog aan Siende Blind en sukkel bietjie om weer die klou by die oor te bring. Lees meer daaroor by http://chanettepaul.wordpress.com/2013/01/18/gesoekdie-bevrore-hoender/
asook by http://chanettepaul.wordpress.com/2013/01/14/so-n-blivetse-storie/ .
In daardie stadium is ek bekommerd oor die titel wat toe nog Duiwelsvurk was.
ʼn Oulike artikel oor my, Karin Brynard en Riana Mouton verskyn in die Januarie uitgawe van die Rooirose.
Die Visvrou, my skryfhuis en Blom se wegbreekhuis, is in aanbou en ek bring meeste van die tyd in ʼn gehuurde kothuisie daar naby deur terwyl ek worstel om my skryfwerk en bouwerk in balans te hou. Blom werk op die River Rat en kan hom nie draai nie.
Februarie
Skryf en bou, bou en skryf!
Maart
By die Woordfees voer Francois Bloemhof ʼn gesprek met my oor Labirint. Ek sit ook in die fasiliteerderstoel by Knorhoek se wonderlik Towerbosch-restaurant en gesels met die sjarmante Deon Meyer oor sy uiters suksesvolle loopbaan as skrywer. 
En ek en Blom is 111 maande bymekaar. Hy reken darem nie dis ‘n Nelson nie en verras my die oggend met dié klein uitstalling op die stoep van die gastehuis!
ʼn Paar dae later is dit Pretoria toe waar ek prys vir Die Lekkerlit Boek van die Jaar in ontvangs neem vir Maanschijnbaai: Jo & Sue.
Dis vir my ʼn baie spesiale prys aangesien dit lesers is wat die wenner tussen tien wonderlike boeke aangewys het. 
Aan die einde van Maart trek ons met ʼn paar stukkies meubels in die Visvrou in. Dit voel meer soos kamp en alles eggo van die leegtes, maar my hart loop oor. Dis hier waar ek Siende Blind afrond.
Daar is darem ook tyd vir Earth Hour wat ons jaarliks op Stanford se meent hou.
April
Ek skryf dat ek hik en weet later nie meer watter kant toe nie omdat die storie vir my al meer soos my eie persoonlike blivet begin voel.
Siende Blind se finale manuskrip word egter aan die einde van die maand ingestuur en die produksieproses begin.
Op ‘n lieflike herfsdag hou ons ook ons eerste brunch op die Visvrou se bostoep.
Mei
Vroeg in Mei het ek min of meer probeer opvang met die jaar se gebeure tot indaardie stadium.
Lees meer by http://chanettepaul.wordpress.com/2013/05/04/opvangslag/#more-1175
Kwêla het kom kuier en die program is in Oktober gebeeldsaai. Susan Booyens was die aanbieder ek het tesame met Riaan, wat die regie gedoen het en Johan, die kameraman, ʼn pragtige insetsel daarvan gemaak. Dit was boonop heerlik om met die drie interessante mense te kuier.
Ek kuier ʼn paar dae later ook heerlik saam met die Bredasdorp leeskring en vertrek later as wat ek beplan het Franschhoek toe vir die PEG-kursus wat ek saam met Izak de Vries aanbied oor die redigering van romantiese fiksie.
Ook in Mei, terwyl Siende blind deur die produksieproses gaan, begin ek aan Raaiselspieël skryf. Dit het baie gehelp dat ek in my nuwe skryfhuis kon werk. Die skryfdeel verloop aanvanklik relatief vinnig, maar daar was soveel ander dinge wat tussenin gekom het, dat dit later vir my voel asof dit vir ewig vat!
Junie
Op 15 Junie durf ons, soos nou ʼn jaarlikse gebeurtenis op Stanford is, die yskoue Kleine Rivier aan in die Penguin Plunge. Ek wen ʼn bottel Jeripigo vir die koudste liggaamstemperatuur wat daardie dag gemeet is!
Gerard Scholtz en Jorrie van DeKatTV kom kuier en die program word uitgesaai op 3 November. Dis net vier minute lank maar ek dink dit het baie mooi uitgekom. 
Ons wei ook die Visvrou behoorlik in met ons eerste alikreukeloes! Teen dié tyd het ons darem al ‘n paar meubelstukke bymekaar geskraap gekry.
En toe ons weer ons oë uitvee, is die eerste helfte van die jaar verby.
Soos hulle in die tydskrifte sê: Word vervolg.
November 17, 2013
Irma Joubert & Chanette Paul op Stanford
Wie sê ‘n profeet word nie in sy eie dorp geëer nie?
Ek sien baie hierna uit!
September 2, 2013
Moorde, tronke, liefde by Tulbagh se lente kunsfees
Heerlike gesprekke oor boeke lê om die draai by Tulbagh se lentefees.
Ek en Carla van der Spuy praat 7 September op die Manley Wynlandgoed om 15:30 oor misdaadfiksie en Siende Blind,
maar daar is volop pitkos vir boekliefhebbers.
http://www.tulbaghspringartsfestival.co.za/literature.html
August 5, 2013
Kwêla – 7 Augustus, 19:30
Die insetsel oor my en my boeke wat die Kwêla-span hier op Stanford kom skiet en waaroor ek in Opvangslag (http://chanettepaul.wordpress.com/2013/05/04/opvangslag/) vertel het, word hierdie Woensdagaand, 7 Augustus, om 19:30 op KykNet uitgesaai.
Ek is van voor af benoud. Ek onthou nie eens wat ek alles kwytgeraak het nie!
August 3, 2013
Chanette Paul en Johan Kruger @ Die Kalfiefees
Chanette Paul en Johan Kruger @ Die Kalfiefees
Johan Kruger, skrywer van Die Vloek, en Chanette Paul, skrywer van Siende Blind, sal tydens die Kalfiefees op Hermanus oor hulle werk gesels.
Die onderhoudvoerder is Izak de Vries van LAPA Uitgewers. LAPA sal ook ’n boekuitstalling hou.
Waar: De Voorskooten Restaurant, Aberdeenstraat 4, Hermanus
Wanneer: Vrydag 9 Augustus en Saterdag 10 Augustus
Hoe laat: 15:00
Toegang: R50, dit sluit verversings in
Kaartjies: By die deur
Telefoonnommer: 028 312 2689
http://www.kalfiefees-hermanus.co.za/
Die Vloek
Die hoofkarakter, Alwyn Baayenhoek, is ’n suksesvolle prokureur in Pretoria. Hy word binne die bestek van ’n paar weke met verskeie krisisse in sy lewe gekonfronteer: ’n grondeis op die familieplaas, sy onredelike korrelkoppa wat verhoudinge met getroue werkers vertroebel, ’n komplekse opdrag van ’n Switserse maatskappy om ’n lughawe te bou, spanning in sy huwelik en die verbreking van ’n jarelange vriendskap vanweë ’n vriend se onetiese gedrag. Om alles te kroon, loop hy dan ’n familielid raak van wie se bestaan wat hy nooit geweet het nie.
Dié lekker verhaal strek oor ’n bietjie langer as ’n eeu, beginnende by Kortpeet Baayenhoek en Mara wat as pioniers op die plaas Rietvallei kom woon tydens die Anglo-Boereoorlog. Die versteuring van ’n graf veroorsaak dat iemand van die Sekhukhunestam ’n vloek oor Peet uitspreek en “almal van jou wat die water drink”. Die vloek word eers verbreek in die vyfde geslag – omdat Alwyn die insig het om die verneuke van die verlede reg te maak.
Hierdie teks vorm ’n drieluik met Anna M. Louw se Kroniek van Perdepoort en Etienne van Heerden se Toorberg. ’n Moetlees en ’n genotvolle bespreking wat wag.
Dr. Johan Kruger werk gereeld as waarnemende regter, wanneer hy nie tyd saam met sy gesin op die plaas geniet nie.
Siende Blind
Siende blind is ’n spel van gesteelde identiteite en verskuilde agendas. Cara van Dijk het om den brode begin romanses skryf – dink aan Mills & Boons. Sy is baie goed betaal hiervoor, maar haar skatryk pa, Karel van der Linde, en snobistiese man, die beeldhouer Paul van Dijk, dwing haar om ’n skuilnaam, Mignon Maydon, te gebruik. Cara bewaak haar skuilnaam baie goed, want toe sy besluit om ’n volle roman, When we belong, te skryf, is daar talle raakpunte met haar eie gesin se doen en late.
When we belong word ’n internasionale treffer en Cara word ryk. Toe plof haar wêreld egter in duie. Haar man skei haar en ’n slim kuberkraker neem haar Mignon Maydon se identiteit oor. Nie net Cara se geld nie, maar haar hele skrywersbestaan word bedreig. Toe ’n aantal mense ná aan haar boonop genadeloos vermoor word, besef Cara dat sy nou vir veel meer as haar loopbaan sal moet veg – haar lewe is op die spel.
Siende blind is ook ’n roman oor die skryfproses. Dis ’n metateks waarin Chanette, sonder om ooit hoogdrawendheid te wees, kommentaar lewer oor die skryfproses en die manier waarop die publiek met skrywers en boeke omgaan. Moet nooit jou oë glo nie, want tot op die laaste bladsy is jy siende blind!
Chanette is ’n skrywer en manuskripontwikkelaar. Siende blind is reeds haar 38ste roman.
June 10, 2013
Skelmloer & voorsmakie: Siende blind
Die omslag is gefinaliseer en die boek is by die drukkers!
As voorsmakie plaas ek die volle omslag met die flapteks daarby.
Klik op die foto as die teks dof is.
Siende blind behoort van middel Julie af beskikbaar te wees, maar gee jou boekwinkel kans om dit op die rak te kry. Dis soms nogal ʼn proses.
Siende blind kan egter wel vooruit bestel word by:
http://www.graffitiboeke.co.za/index.php?page_id=book&book_id=15922
Ek hoop julle geniet Cara se blivetse storie!
Lees meer oor hoe die skryfproses verloop het by:
http://chanettepaul.wordpress.com/2013/01/14/so-n-blivetse-storie/
En
http://chanettepaul.wordpress.com/2013/01/18/gesoekdie-bevrore-hoender/
May 4, 2013
Opvangslag
Tot dusver het ek my blog hierdie jaar liederlik afgeskeep. Ek vang hiermee bietjie op en plaas nuwe nuus, foto’s asook uittreksels uit my nuusbriewe vir dié van julle wat nie daarop ingeteken is nie.
Die jaar het teen ʼn spoed uit die wegspringblok geskiet. Dit het baie goëltoertjies geverg om ʼn manuskrip af te handel en boonop my skryfhuisie naby die suidste punt klaar gebou te kry. Albei is egter nou byna in kanne en kruike.
Daar was vele vreugdes tussen die bouery en skrywery deur.
Onlangs
Kwêla:
Jy kon my met ʼn veer omtik toe ek hoor Kwêla wil ʼn profielprogram oor my en my boeke hier op Stanford kom opneem.
Dit het gelei tot ʼn skoonmakery van formaat en die adrenalien het behoorlik gepomp in die dae voor die span hier aangekom het.
En toe is dit boonop eendeweer en die huis is dalk skonerig, maar steeds piepklein.
Gelukkig het die reën ons so tussendeur kans gegee nie net om buite opnames te maak nie, maar ook om op Blom se boot, die River Rat, te gaan vaar sodat die span die rivier kon beleef.
Wat ʼn wonderlike span! Aanvanklik was ek natuurlik redelik senuweeagtig, maar toe ek my weer kom kry, gesels ek en Susan Booyens een strook deur of die kamera op ons gerig is of nie. Riaan Badenhorst, die regisseur, was so gemaklik dat ek skaars agtergekom het daar is ʼn program wat opgeneem word. En Johan, die kameraman, was so stil en rustig ek was skaars bewus daarvan wanneer die kamera op ons gerig is.
Om die waarheid te sê is ek halfbenoud ek het dalk te veel uitgeblaker vir dié soort program omdat dit werklik gevoel het soos vriende wat kom kuier het!
Oor Siende Blind:
Ek het pas die bladproewe van my blivetse storie ontvang en einde Mei gaan die manuskrip drukkers toe om ʼn boek te word. Die verskyningsdatum is Julie.
Ek behoort redelik binnekort ʼn skelm loer na die omslag te kan gee. Dis nog nie heeltemal gefinaliseer nie, maar ek het al ʼn goeie idee van hoe dit gaan lyk. Heel anders as die ander en in my subjektiewe opinie, baie mooi.
Oor die titel:
Ek het voorheen hier op die blog en elders genoem dat my manuskrip Duiwelsvurk sou heet. Toe kom daar ʼn boek uit met die naam Duiwelsklip wat my laat wonder het. My uitgewer het gereken dit sal nie regtig saak maak nie.
En daar sien ek toe nog ʼn boek wat baie onlangs gepubliseer is. Die titel? Duiwelsasem.
Wel, dit het my asem weggeslaan, dank jou die duiwel 
Dié ontdekking het ek gemaak terwyl ek nog geskryf het aan die eerste draft. Toe ek weer deur die manuskrip gaan voor ek begin met die afronding, was die titel-kwessie die heeltyd in my agterkop.
En ewe skielik besef ek, maar Duiwelsvurk is eintlik nie die beste titel vir my storie nie. Die titel is eintlik te kras vir die verhaal. Die spanning in my storie speel op ʼn subtiele vlak af. Dis nie hardebaard spanning nie. En daar kom die nuwe titel by my op en ek weet sommer dis pas net soveel beter by my storie.
Gelukkig het my uitgewer met my saamgestem en my boek heet nou Siende blind.
Vroeër vanjaar
Woordfees:
Tussen al die druk en angstigheid deur, was die Woordfees soos ʼn lafenis, al was dit nie ontdaan van spanning nie.
My somergriep was gelukkig in sy doodsnikke en ek kon al waag om sonder ʼn hele pak Softique onder die arm rond te loop. Tog pla die skoenlappers maar altyd.
In die geval waar jou eie boek bespreek word, wonder mens maar altyd of daar genoeg lesers gaan opdaag om te luister. Mens is bang jy gaan vashaak by ʼn vraag en kan nie verder nie. Of dat jy ʼn dom antwoord sal gee.
In die geval waar jy moet fasiliteer soos ek vir Deon Meyer gedoen het, is mens nou weer bang jy vra dom vrae. Of jy het te min vrae of te veel. Of jy vra die verkeerde vrae.
Alles het egter baie goed afgeloop.
Ek en Francois Bloemhof het heerlik oor Labirint gesels. Daar was genoeg mense wat die praatjie bygewoon het en hulle het baie lekker gereageer. Dankie aan almal wat daar was!
Die middagete by Knorhoek se Towerbosch restaurant was ʼn heerlike, stampvol geleentheid. Die pragtige ou wynplaas het ʼn wonderlike ambience en die restaurant is iets uit ʼn sprokie. Die smaaklike kos en lekker wyn was die kersie op die koek.
Deon Meyer was sy sjarmante self en ons het heerlik gesels oor sy internasionale roem. Wat my opgeval het, is sy beskeidenheid. Nie van die valse soort nie. Ek kon agterkom hy is werklik self ʼn bietjie oorweldig deur sy buitengewone sukses.
Lekkerlit boek van die Jaar 2012
Soos meeste van julle weet, het my wonderlike lesers – ja, julle! – Jo & Sue, die eerste boek in die Maanschijnbaai-tweeluik, aangewys as Lapa se Lekkerlit Boek van die Jaar vir 2012.
So tussen die skrywery deur is ek toe in Maart saam met Izak de Vries, wat betrokke is by die bemarkingsafdeling, Pretoria toe vir ʼn baie blitsige besoek. Ons het die Dinsdagmiddag geland, saam met Leon van Nierop en Charlene Hougaard van Lapa ʼn heerlike middagete genuttig en die aand was die funksie. Daar het ons weer eens heerlike ete en drinke gekry, geluister na Leon van Nierop wat oor sy nuutste projek gepraat het en ek het sooo lekker gesels met al die interessante mense wat daar was. Die volgende oggend was dit weer terug Kaap toe.
Dit was ʼn groot voorreg om die prys te ontvang. Die prys beteken vir my geweldig baie, juis omdat die lesers die beoordelaars was. Dis hoogtyd dat julle ook ʼn stem kry!
Lees meer by http://lapa.bookslive.co.za/blog/2013/03/28/lekkerlit-prys-by-lapa-se-luisterryke-mediafunksie-aan-chanette-paul-toegeken/
Goeie nuus: Die lekkerlitkompetisie vir 2013 is onlangs aangekondig. Gaan loer by http://www.lapa.co.za/lekkerlit om in te skryf.
RSG:
Nog iets wat tussen al die skrywery deur gebeur het, is ʼn gesprek met Christelle van Tonder van RSG oor die Maanschijnbaai-tweeluik en die res van my boeke. Sy het geweier om vooraf vir my te sê watter vrae sy gaan vra omdat sy ʼn spontane gesprek wou hê. Ek was maar benouderig, maar dit het goed gewerk en ons het inderdaad heerlik gesels.
Daar is ‘n potgooi van die gesprek beskikbaar op RSG se webwerf as julle dalk wil luister. Die skakel is http://www.rsg.co.za/potgooi-soek.asp. Kies “Skrywers en Boeke” as program en 20 Maart as datum. My gesprek met Christelle begin by 18:44 op die tydlyn, maar die ander gesprekke is baie interessant. Luister gerus.
Ek dink dis omtrent die omvang van die belangrikste dinge wat tot dusver gebeur het. En ek hoop ek kry dit reg om van nou af ʼn bietjie meer op datum te bly. Maar ek belowe niks!
As jy op my nuusbrief wil inteken, stuur ʼn e-pos aan chanette@chanettepaul.co.za en tik net in die “subject” venstertjie: Nuusbrief asb., dan voeg ek jou by my adreslys tot jy laat weet jy wil afgehaal word.
Fluit-fluit, my laaaang storie is uit.
