காந்தியம் ஓர் உரையாடல் Quotes

“சேவை (Service) என்றாலே அதுதானே அர்த்தம். அதாவது பொது மக்களிடமிருந்து எந்தப் பிரதிபலனையும் எதிர்பார்க்கக்கூடாது. நம்முடைய நேரத்தை மக்களுக்காக செலவு செய்ய வேண்டும்; நம்முடைய உழைப்பை மக்களுக்காக செலவு செய்ய வேண்டும்; நம்முடைய உறக்கத்தை மக்களுக்காக செலவு செய்ய வேண்டும்; அவர்களுக்காக இழக்க வேண்டும்; இதுதான் சர்வீஸ். நான் இந்த வேலையைச் செய்தேன், இதனால் எனக்கு என்ன பிரதிபலன் என்று எதிர்பார்த்தால் அது வியாபாரம். அது ஏதோவொருவகையில் இலாபம் கருதி செய்யக்கூடிய ஒருவித பணி ஆகிவிடுகிறது. அது சர்வீஸ் ஆகாது. காந்தியம் அல்லது காந்தியடிகளின் கொள்கை என்பது சேவை நோக்கம்தான் (Service motive). 'என் செயல் பணிசெய்து கிடப்பது' என்பதுதான். என் கடமை பணிசெய்து கிடப்பது என்பதுதான். இதுதான் பொது வாழ்க்கையில் ஒவ்வொருவரும் கற்றுக்கொள்ள வேண்டியது.

அது அம்பேத்கரைப் பின்பற்றக் கூடியவர்களாக இருந்தாலும் சரி, பெரியாரைப் பின்பற்றக் கூடியவர்களாக இருந்தாலும் சரி, காந்தியடிகளைப் பின்பற்றக் கூடியவர்களாக இருந்தாலும் சரி. பொதுவாழ்க்கை என்பது பதவிக்கானது, பணத்துக்கானது, பவிசுக்கானது என்று கருதாமல் மக்களுக்கு தொண்டு செய்வதற்கானது என்ற சேவை மனநிலையோடு பொதுவாழ்க்கைக்கு வரவேண்டும். அதையே காந்தி முன்னிறுத்துகிறார்.”
― தொல். திருமாவளவன், காந்தியம் ஓர் உரையாடல்

“அவரை 'அகிம்சாமூர்த்தி' என்றுதான் பள்ளி ஆசிரியர்கள் நமக்குக் கற்பித்திருக்கிறார்கள். அவருடைய அகிம்சை என்பது மிகப்பெரிய அளவிலே தேசத்தில் அல்லது உலக அளவில் போற்றப்பட்டு வருகிறது. அவர் பல கொள்கைகளை முன்வைத்தாலும்கூட, அகிம்சை என்பது அவருடைய கொள்கைகளில் முதன்மையானதாகப் பார்க்கப்படுகிறது. வன்முறை கூடாது. அது சாதியின் பெயரால் நிகழ்ந்தாலும் சரி, மதத்தின் பெயரால் நிகழ்ந்தாலும் சரி, அவ்வளவு ஏன்? தேச விடுதலைப் போராட்டமாக இருந்தாலும், ஆங்கிலேயர்களை எதிர்க்கிற போராட்டமாக இருந்தாலும்கூட வன்முறை கூடாது. அறவழியில் போராட வேண்டும்.

வன்முறை ஏன் கூடாது என்றால் வன்முறை நிகழ்ந்தால் அடித்தட்டில் கிடக்கிற மக்கள்தான் கடுமையாகப் பாதிக்கப்படுவார்கள். வன்முறை நிகழ்ந்தால் நிராயுதபாணிகள்தான் பாதிக்கப்படுவார்கள். வன்முறை நிகழ்ந்தால் அதிகாரத்தோடு தொடர்பில்லாதவர்கள் பாதிக்கப்படுவார்கள். அதிகாரத்தில் இருப்பவர்கள் தப்பித்துக் கொள்வார்கள். எனவே எளிய மக்களின் மீது கருணை இருந்த காரணத்தினால், அவர்களைக் காப்பாற்றும் அக்கறை உள்ள காரணத்தினால் வன்முறை கூடாது என்கிற கருத்து எனக்கு ஏற்புடையது.

காந்தியும் அதிலே தீவிரமாக இருந்தவர். எனவே அந்தக் கருத்து எனக்கும் உடன்பாடான கருத்து. எளியவர்கள் பாதிக்கப்பட்டு விடக்கூடாது, அதனால் வன்முறை கூடாது, அதேவேளையில் ஆதிக்கத்தை எதிர்க்கவும் வேண்டும். ஆதிக்கத்தை எதிர்ப்பது என்றால் அதிகாரத்தை கையில் வைத்துக் கொண்டு பெரும்பான்மை என்கிற அடிப்படையிலே நாங்கள் எதையும் செய்வோம் என்கிற ஆணவத்தை முன்னிறுத்தி வன்முறைகளை செய்வது அல்ல. ஆதிக்க எதிர்ப்பு என்பதும் அகிம்சைக்குள்ளேயே இழையோடுகிறது. ஆதிக்கம் எதிர்க்கப்பட வேண்டும். ஆனால், அது வன்முறையற்ற வகையில் எதிர்க்கப்பட வேண்டும்.”
― தொல். திருமாவளவன், காந்தியம் ஓர் உரையாடல்

“அம்பேத்கர் அவர்களின் விமர்சனத்தைத் தாங்கிக் கொள்கிற சகிப்புத்தன்மை காந்தியடிகளுக்கு இருந்தது. அதுதான் தலைமைத்துவத்தில் மிகவும் முக்கியமானது. ‘எனக்கு எல்லாம் தெரியும், எனக்கு யாரும் வந்து புத்திமதி சொல்ல வேண்டியதில்லை, மற்றவர்கள் சொல்லி அதைக் கேட்டு நான் முடிவெடுக்க வேண்டிய அவசியமில்லை’ என்கிற அகந்தை இருந்தால் அது தலைமைத்துவம் இல்லை.

அதுமாதிரியான அகந்தை இல்லாத ஒரு தலைவராக காந்தி இருந்திருக்கிறார் என்பதை நாம் மறுக்க முடியாது. யார் சொன்னாலும் அதை உள்வாங்கக் கூடிய, அதைப் பொறுமையாகக் கேட்டுக் கொள்ளக்கூடிய, அதில் திருத்தப்பட வேண்டியது ஏதாவது இருந்தால் அதைத் திருத்திக்கொள்ளக் கூடிய அந்த உயர்ந்த பண்பு அவரிடத்திலே இருந்தது. அதுதான் அவரை அந்த அளவிற்கு உயர்த்தியிருக்கிறது.”
― தொல். திருமாவளவன், காந்தியம் ஓர் உரையாடல்