Ahmed Alaa

“تفرانيل 100

انا شعرى غامق
بس قلبى مطقطق ابيض من زمان
جايز عشان
الناس ساعات بتلاقى ناس
تعرف تشوفها بجد
و انا قلبى لسه عمره ما اتكشف علي حد
بقابل اد ما اقابل
و افارق اد ما افارق
و ما اتعلمش
بلخبط ف الاسامى عشان
بخاف انسى
بلخبط ف الدنيا عشان
بخاف لا ما اعيشش
بقالى كتير ما بتكلمش
بخاف يبقى الكلام متعاد
ما كملتش ف اى رحيل
ما كملتش ف اى قعاد
و بدى للحياة بالكاد
ما يكفيها
و يكفينى
شرور البهدلة فيها
مليش ف البنت طلبات غير
تنسينى اللى قبليها
و بدخل ف حاجات تخاطيف
و عينى ع اللى بعديها
رقصت كتير علي السلم
بخاف اطلع
و اخاف من الارض
اكيد الخوف مش الفكرة_
و حتى يا ستى يعنى بفرض
اكيد الخوف مهواش عيب
طبيعى الناس تخاف من الغيب
و من المقدور
برغم كدة
بحب الضلمة اكتر ما بحب النور
ساعات بتمنى شقة ف برج شايفة النيل
و اوقات انى اعيش مستور
و بزهد .. ف كل ما ف الرحلة من زخرف
و ما زهدهاش
ما دام فيها رمق يتعاش
اكيد ف الرحلة يوم متحاش
و مستنى اعدى عليه
و تعرف عنه اصلا اية ؟_
مفيش غير انه لسه مجاش
بنام ؟
طبعا .. كتير جدا
و بالايام
و طول الوقت بحلم ان انا بجرى
و بشبع من الحاجات بدرى
و رغم كدة لسه ما شبعتش
من الجرى و من الاحلام
بخاف من الموت
عشان خايف ساعتها اكون
عبيط .. كل اللى سيبته كلام
بشوف افلام
عن الدنيا
و عن حكايات
لناس عاشت حاجات تانية
و عن حكايات لناس ماعاشوش
و بتأثر
و بتحسر
ع كل اللى كان ممكن
اكونه
بس ما بقيتهوش”
― مصطفى إبراهيم, المانيفستو

“صدقنى انا زاهد بالصدفة .. او من غير قصد
انا طاير آه .. لكن علشان مش لاقى الارض
صدقنى انا كان نفسى اتعلق .. ف حاجات ياما
وأعيش احساس ان انا فعلا من غيرها هموت

انا اعرف اعيش
من غير ما احتاج انى اقرا الوقت
من غير ولا واحد م اللى اعرفهم دلوقت
انا اعرف اعيش من غير اسمى
او سنتوف بره حدود جسمى”
― مصطفى إبراهيم, المانيفستو

“بدون سبب واضح

بدون م أعرف سبب واضح
عشان أزعل
أنا زعلان
و فجأة بدون سبب برضه
يفرحنى
بكون فرحان
لا منى عرفت أعمل إيه
عشان مزعلش من تانى
و لا منى
عرفت إزاى
أدوق الفرحة بالمجان”
― مصطفى إبراهيم, ويسترن يونيون فرع الهرم

“في حاجات لازم... علشان نعرف....درجة قوتها...بنكسرها

وحاجات ف ادينا... عشان نعرف.... اننا عايزينها ....بنخسرها

كدّبت ف عمرك كام صاحب

علشان كان نفسك تتطمن ؟

وخسرت اصحابك واتطمنت

طب كام بالون فرقعوا منك

وإنتا بتنفخهم ع الاخر؟

وعرفت اخرهم بس ندمت

دلوقتي فهمت

أنا عاوز إيه

ونا كنت بفرقع بلالين ليه

أنا عاوز حاجه بدون آخر

أو حتى بآخر ما اوصلّوش

كام حيطه ف ضهري

اضرب واهري

ف بدنهم بس ما يتهدوش

شيء مش مغشوش

مضمون دايما

من غير ما احتاج إني اتأكد

أو حتي اخاف إني اتنكد

لا يكون ف الاخر برضه فاشوش

يا بشر عرفاني وعارفه أنا مين

بلغوا اسفي لكل البلالين

كلنا كنا ف يوم بالونه

فقعتنا تجارب بني أدمين

بلالين عايشين نفسها تلقي

حد يصدق ويقدرها

متأكد من إنه عاوزها

من غير مايجرب يخسرها”
― مصطفى إبراهيم, ويسترن يونيون فرع الهرم