مصباح المهدى

“- كلام ابن عم الكلام -

رِكِب هز رجليه وشَدّْ اللجام
وعفَّر على النائمين ف الخيام
وحرّم علينا "الصبَّا والخزام"
وقال دا تمام
ودا مش تمام
كلام ابن عم الكلام محتاجينه
أنا يا عزيزي اتنشل منّي عين
و ف وقفة تانية اتنشل منّي عين
عشان بانتخاب ييجي ريس أمين
دخّلنا ف متاهة
ومين فين تباهى
بحجم الزبيبة ونور الجبين
إذا الفجر أذِّن وما صلِّتوش
هتُرزق منين ؟!
هتُرزق لأن اللي رازق إله
رزَق ف الجحر دودة مالهاش إدين
وتسألني مين السبب ف المحبة
أقول حبَّة حبَّة
هتسألني مين السبب ف الخصام
ائتلاف / اختلاف /
اكتشاف فوضى عَمِّتْ
بدت وادلهمت
وهمَّت وهمَّ بها لأ بلاش
أنا يا عزيزي اتقتلت ببلاش
وقوِّمت ثورة عشان تبقى باش
باشمهندس / أكاديمي / أستاذ
رئيس
وانا اللي انتخبتك رئيس
مش خيالي
وانا اللي دعيت أهلي ياخدوك
رئيس
عشان مصر مش أهل / أحباب / جماعة
عشان مصر تفضل وطن مش جماعة
عشان مصر تفضل وطن للجميع”
― مصباح المهدي

“مافيش حد قادر يقول بطلوده
مافيش حد قادر يقول إسمعواده
مافيش حد قادر يقول الغراب
البلد من ضباب الرؤية في المرايا
بتكسر ورايا إذا هربت زير
و أنا مش أمير
مش سفير للنوايا
ولا يوم سندت بنواياتي زير
البلد مهما قالوا العدالة – الكرامة
الكلام كتير البلد ع الفقير
ابن نفس الفقير اللي قامت عليه البلد من زمان
مش هامان اللي سارح بعلبة ترامادول
و قاروصتين سجاير و بوظة و لبان
أمان يالميدان اللي فرّغ وعبَّا
و دخل مكان النحاف التخان
الفقير هو نفس الفقير
اللي ساكن عشش ترجمان
علي العكس منه تلاقي خبير استراطيشي فاهم
محلل و عالم فقيه يعني إيه مش مهم
المكرر مقرر علينا بخمسين لسان
يالميدان اللي خلوه شديد القباحة
و قال لما كان للميدان صولجان
كان إباحة و تحرش
و صبيان ناقصها العلام و الإيمان
كانت بنت تزحف عليه
جردوها من البنطلون كان أبوها المُدان
و دي الوقت عايزنها تنزل معاهم و إلا
فلا خير في الخير كمان
يا الرغيف مش لاقيه حتي معجون بدمي
و أنا بدمي دهنوا الحيطان و البيبان
أنا اللي دفعت الفواتير زمان
أنا اللي تصورت هاخد نفسي
بعد عهد الأمان
راح أدفع كمان فواتير صراع الجبابرة الديابة
علي ما تبقي من الهيلمان”
― مصباح المهدي

“أشتال قلم
و أشتال قَدُوم
و اشتال من البِرَك الهموم
أستأذنِك لما آجي أنام
و استأذنِك لما آجي أقوم
و لزوم حاجات مالهاش لزوم
أسجد ف غير وقت الصلا
و أصوم
و ليل كامل أقوم
دمي اللي خارج م الهدوم
مفروط
نجوم الضهر تطلع لي النجوم
ف مكاني مطرح ما انطرحت
أطرح شجر دُوم ف الخلا
و اطرح كروم
و استأذنِك لما آجي أفتح بُقِّى
و ارضع م الغيوم
و استأذنِك لما آجي ألوم
نفسي علي التقصير
و المّ الشوك لَمُوم
أستغفر السجان و أسبّح كل يوم
أشتال قلم
و اشتال قدوم
و اشتال من البِرَك الهموم”
― مصباح المهدي

“على دماغي دقي
و جوايا شقي
و هاتي اللي عندك
أنا لوحدي جيش!
أنا مرمى نارك
هدف لانفجارك
ماتتردديش
أنا طرح ليلك
عليا انى اشيلك
و اجيلك محمّل
و افرغني كلي
و اقولك:ها كمّل
عليهم / معاهم ..
معاهم / عليا
عليا انى أسبّح بحمدك واصلي
و اخلّي اللي فاضل من الراس يولِّي
و اقولك :
حبيبتي
و اخاف انّى اصدّق
تصدق عنيكي
و تطلبني راكع أنا بين إيديكي
معايا اللي يثبت سلامة ضلوعي
و سلامة لساني
و إمكاني إني أخلف مكاني
و اجيب لك ولاد
ولاد شكل ابوهم
يتوهم ..
و يلعن زمانهم أبوهم
عليا انى افكر وأقدم حلول
و اكون مَرّه بلبل
و اكون مَرّه غول
تنامي وانا أسهر
واقول اني نايم
أرش النسايم وأقدم ندور
و اشرق .. و اغرب
و اقرّب .. و ادور
و اولّع فى مولد جمالك بخور
عليا إني ألضم حكايه ف حكايه
واقول : انتي أحلى
و اقول : انتي آيه !
و أول كلامي ..
و آخر كلامي
" أن الحمد لله " خلاني احبك
و من غير تردد
أقولك : بحبك
أقولك كمان ؟!!
على دماغي دقي”
― مصباح المهدي - قصيـدة طـلاق