شعر عامية Quotes

Quotes tagged as "شعر-عامية" (showing 1-30 of 59)
نجيب سرور
“تسرق شلن تبقى هيصه وبلوه وجَرِيمَه
تسرق أُلوف الأُلوف تبقى م الابطال
وكل ما السرقه تكبر .. القانون سيما
وكل ما السرقه تصغر .. فيه حرام وحلال”
نجيب سرور, أميات نجيب سرور

فؤاد حداد
“أنا عندي سؤال سفيه
حبيني وفلسفيه
لو إن الدنيا فيها
شيء غير اللي إحنا فيه”
فؤاد حداد

نجيب سرور
“خطط وخيط وعلم .. يا شعب يا معلم
يا شعب يا مبلّم .. يا ساكت اتكلم”
نجيب سرور, أميات نجيب سرور

نجيب سرور
“ده كله شغل يهود يا مصر في الضلمة ... ديابة سارحة ورا ولادك بقالها سنين
تعابين في برج حمام لكن البلد نايمة ... يعني مش غريبة نبقى منكوسين”
نجيب سرور, أميات نجيب سرور

إيمان بكري
“ناس بتعيش علشان حاجة وناس بتموت علشان حاجة وناس بتموت على الحاجة
وناس تديلك الحاجه وهى ليها محتاجه وناس تديلك الحاجه و تاخد قصادها ميت حاجه
وناس تكبر تكون حاجه و ناس تصغر علشان حاجه”
إيمان بكري, مافيش حاجة

بيرم التونسي
“في الطريق

أربع عساكر جبابرة يفتحوا برلين

ساحبين بتاعة حلاوة جاية من شربين

شايله على كتفها عيل عنيه وارمين

و الصاج على مخها يرقص شمال و يمين

إيه الحكايةيا بيه ؟ جال خالفت الجوانين ؟

إشمعنى مليون حرامى فى البلد سارحين

يمزعوا فى الجيوب و يفتحوا الدكاكين ؟

أسأل وزير الشئون و لا أكلم مين”
بيرم التونسي, المجموعة الكاملة لشاعر الشعب : بيرم التونسي

سيد حجاب
“وصية سيد حجاب
ولما أموت
لو مت ع السرير ابقوا احرقوا الجسد
ونطوروا رمادى ع البيوت
وشوية لبيوت البلد
وشوية ترموهم على تانيس
وشوية حطوهم فى إيد ولد
ولد أكون بُسُته .. ولا أعرفوش
ولو أموت ..
قتيل – وانا من فتحة الهويس بافوت -
ابقوا اعملوا من الدما حنة
وحنوا بيها كفوف عريس
وهلال على مدنة
ونقرشوا بدمى
- على حيطان بيت نوبى تحت النيل –
اسمى”
سيد حجاب, مختارات من شعر سيد حجاب

نجيب سرور
“يا مصرى هم وصحى النوم واقرا الاخبار
الدنيا صحيت الا احنا كدا بالمندار
شوف الصهاينه على ترابنا واقفين زنهار
حلاوتها ماتشات الكوره على خط النار
يانكسه جايه أُوف سايت ناموا الحكام”
نجيب سرور, أميات نجيب سرور

تميم البرغوثي
“الحمد لله خلصنا من الامتحانات
وبإذن ربك فلفصنا من غير اصابات
ملعون ابوك ياثانويه لعنه قويه
ملعون ابوك يامدارس حبس وحارس
مدير عبيط ومديره عانس واساتذه عاهات
ما عادش في لوح سبوره ولا "ميس "زرزوره
بتهاتي والناس محشوره بين الديسكات
ولا مشرفه نص نتايه ماسكه عصايه
هيه وقرود الجبلايه قرايب واخوات
ولا فيش ابو البدله سفاري بلون جنزاري
ناظر واعمى يامراري وست بشنبات
ولا فيش مديره كركوبه اسمها زنوبه
باروكتها حله مقلوبه وودانها صاجات
ولا عادش في استاذ خايب شايب عايب
يحط ع الكلمه ضرايب زي الحكومات
ماعادش في بناتيت سكه رابطه وفاكه
داهنين وشوشهم جملكه اربع طبقات
لافعه صاحبها على دراعها ويمتعها
يتقال بتاعته وبتاعها وتقوم خناقات
عيال بتمشي على اربع زي المدفع
لكن يناموا على مشمع زي البيبيهات
خلى الجماعه الشضليه المستقويه
ياكلوا بطاطس مقليه ويعاكسوا بنات
احنا اللي في وقت المحنه نجحنا واحنا
لفت ودارت لصالحنا وجبنا الشهادات”
تميم البرغوثي, قالوا لي بتحب مصر: قلت مش عارف

نجيب سرور
“لا تصمت أبدا .. إن الصمت جهاله ..

واحذر أن تتكلم فى الموضوع ..

لا موضوع هنالك ..

إن الفلك اليوم عطاره ..

كن فيهم «خضر العطار» !.

لكن خذ سمت الأستاذ ..

وحذار أن تنسى «البايب» ..

والكلمات «الخرز» اللاتينية !

قل «فى الواقع » .. واصمت لحظة !

قل «لاشك» ..

واصمت لحظة !.

ثم مقدمة محفوظة ..

من فذلكة «المنهج» ..

حسب الموجة والتيار..

فالبحر سباق ..

والموجات الوف ..

«الموجه تجرى ورا الموجه ..

عايزة تطولها ! »

عجل واركب أية موجه ..

فالأيام دول ..

ويل للبسطاء ذوى القلب الأبيض ..

حين تفاجئهم أنواء الطقس ..

الناس إثنان ..

أحدهما ينجو فى الطوفان ..

والآخر يغرق فى كأس ..

«إنى أغرق ..

أغرق .. أغرق ! »”
نجيب سرور, بروتوكولات حكماء ريش

بيرم التونسي
“احب بنت البلد والحب بهدلني
ومن بروج الأدب والفن نزّلني
احب عوجه لئيمه اشتكي للّه
من غلبي منها وتشكي غلبها مني
جاهله اذا تفرّجت في جنينة الحيوان
تقول على النمر قطه والوعول خرفان
وتقول على البنك سيما والبلوز فستان
لكن يصيبني البكم لما تجادلني
جبانه تصرخ من النمله بعزم الصوت
والبورص طلّع عليها عزرائيل الموت
لكن يفوت رمش عينها من فؤادي فوت
ان كنت ميت قتيل هوهّ اللي قاتلني
راكبه على الكارو تتسامر مع الحمار
والشمس فوق جسمها تشعل وتقدح نار
ولما يوم ينتظرها ابن الذوات ببكار
تقول له روّح على امك وابقى قابلني
احب بنت البلد من فرط خفتها
هوليود على بدعها ما تجيبش عصبتها
ولا بنات لندره تتلف لفتها
أدي اللي جاب لي البلا أدي اللي هابلني”
بيرم التونسي, المجموعة الكاملة لشاعر الشعب : بيرم التونسي

“المشكلة في انك تعرف بنات
مش انك هيتقال عليك صايع
ولا حتي انك مقطع السمكة
ومقضيها وضايع
وواكل من كل مخبر رغيف
لأ
المشكلة انك بتبقي خلاص
مش اي حاجة بتعجبك
ولا اي كلام يأثر فيك
من الاخر
قلبك مبقاش نضيف

قلبك مبقاش ضعيف
مش اي حاجة تحركه وترسيه
وصعب حد بالساهل يسكن فيه
هتفضل تقارن و تجرب
وتبعد عنه و تقرب
وفي الاخر
علي فشوش
واللي اخطر
لو كان أول حب في حياتك
مبتنساهوش
وتكون موهوب زيي في حفظ الوشوش
ساعتها هتتعب سنين
اه يخلق من الشبه اربعين
بس كلهم فالصو
فالصو ومينفعوش”
حسن الدهراوي

“سألوها عني
سكتت
ردت قالت معرفوش
مع انهم
لو يسـألوني
حبها لسا ف قلبي
منستوش

كنا بنتلكك لبعض كتيير
وبنقف لبعض ع الواحدة
هيا تقصد تخليني اغير
وانا اعرف عليها في اليوم 100 واحدة

كانت اجمل حاجة فينا
الاختلاف
ولما كتر الخلاف
محدش بقا علي جرح التاني
بيخاف

و تسمع الحكاية
وتيجي عند النهاية
متلاقيهاش
متعرفش مين مظلوم
ومين غشاش
ومين جرحه صعب
ومين جرحه ببلاش

هي دي الدنيا
وهو ده الحال
مش كل حاجة بنحلم بيها
بنلاقيها
ولا كل كلمة صح فوقتها بتتقال
وخلاصة الموال
لو هتسألوني عنها
مقدرش أقول غير عاشق
ولو حتي ف الخيال”
حسن الدهراوي

بيرم التونسي
“قد أوقعَ القلبَ في الأشجانِ والكَمَدِ
هوى حبيبٍ يُسَمّى المجلس البلدي

أمشي وأكتمُ أنفاسي مخافة َ أنْ
يعدّهـا عاملٌ للمجلسِ البلـدي

ما شَرَّدَ النومَ عن جفني القريحِ سوى
طيف الخيالِ خيال المجلسِ البلدي

إذا الرغيفُ أتى ، فالنصف ُ آكُلُهُ
والنصفُ أتركُه للمجلس البلدي

وإنْ جلستُ فجَيْبِـي لستُ أتركُهُ
خوفَ اللصوصِ وخوفَ المجلسِ البلدي

وما كسوتُ عيالي في الشتاءِ ولا
في الصيفِ إلاَّ كسوتُ المجلسَ البلدي

كَــأنَّ أٌمّي بَلَّ اللهُ تُربتها
أوصَتْ فقالت : أخوك المجلس البلدي

أخشى الزواجَ إذا يوم الزفافِ أتى
أن يَنْبَرِي لعروسي المجلسُ البلدي

ورُبَّمَا وَهَبَ الرحمنُ لي ولداً
في بَطْنِهـا يَدَّعيه المجلس البلدي

وإنْ أقمتُ صلاتي قلتُ مُفتتحاً
اللهُ أكبرُ باسم المجلـس البلــدي

أستغفرُ الله حتى في الصلاةِ غَدَتْ
عِبادتي نصفُها للمجلـس البلـدي

يا بائعَ الفجلِ بالمِلِّيـمِ واحدةً
كم للعيالِ وكم للمجلسِ البلدي”
بيرم التونسي

أحمد شوقي
“النيــــل نجاشى حليـوة أسمـر
عجب للونه دهب ومرمر
أرغوله فى إيده يسبح لسيده
حياة بلادنــا يارب زيــده

قالت غرامى فى فلوكة
وساعة نزهة ع الميه
لمحت ع البعد حمامة
رايحه على الميه وجايه

ووقفت أنادى الفلايكى
تعالى من فضلك خدنا

رد الفلايكى بصوت ملايكى
قال مرحبابكم مرحبتين
دى ستنا وإنت سيدنا

جـت الفلوكــة والمــلاح
و نزلنـا وركبـنا

حمامه بيضا بفرد جناح
تودينــا وتجيبنا
ودارت الألحان والراح
وسمعنا وشربنا

هيلا هوب هيلا
وصلح لى قلوعك ياريس”
أحمد شوقي

أحمد شوقي
“بلبل حيران على الغصون ... شجى معنى بالورد هايم
في الدوح سهران من الشجون ... بكى و غنى و الورد نايم
سكران بغير الكاس ... فى مجلس الورد
من عنبر الانفاس ... و منظر الخد
يبـــــــــــص فوقه ... و يبص تحته
يمد طـــــــــــوقه ... يشم ريحته

فنان يحط ...وفنان يشيل
وجناح يقوم به ...وجناح يميل
فى ايد الليل ... يلعب به
وراه الويل ... يا قلبه

مجروح من ساقه ومن طوقه
مادري بالشوك من شوقه
من دوح لدوح ... سهر ونوح
ياليل ده طير... بدن وروح

من فرع غصنه ... ع الورد مال
و راح يمين ... و جه شمال
قال له يا سوسن ... يا تمر حنة
يا ورد احسن ... من ورد الجنة
مين بالفرح لونــــــــك ... و من الشفق كونك
يا ريحة الحبايب ... يا خد الملاح
لشوكة جمالك ... وضعت السلاح

تبارك اللى خلق ... ظلك من الخفة
و اللى كساك الورق ... و لفه دى اللفة
زى القبل ولفت ... شفة على شفة

يا ورد فوق لا الجناح ... ينهض و لا الجرح يرقى
تشوفنى فى وقت الصباح ... جسد ععلى الارض ملقى”
أحمد شوقي

ميسرة صلاح الدين
“صاحبيني يا احزان احسن ماليش صاحب
في الدنيا دي مابقاش في حد يتصاحب”
ميسرة صلاح الدين, أنا قلبي مش فارس

“في حاجات ..
تايه في وسط الحاجات ..
عايشة من غير احتياجات ..
لا بتفكر ولا بتقرر ..
ولا بتشارك في استفتاءات ..

وحاجات ..
مش بنشوفها ..
غير في الحكايات ..
ان الشرطة دي بتحمينا ..
وان العسكر دول اهالينا ..
وان احمد و مينا اخوات ..

وحاجات ..
بتقرر تعملها ..
وتكون مبسوط ..
بس بييجي الوقت عليها ..
بتروح زهوة أحلي ما فيها ..
وبسرعة تموت ..
من غير نهايات ..

وحاجات ..
بتفكر علي طول فيها ..
ضاعت منك وانت شاريها ..
بس مفيش حاجة هترجع ..
وكل ما تفتح حاجة بتوجع ..
ومبقاش في بينكوا حاجات ..

وحاجات ..
مرمية في دواليب ..
ساعة و نضارة و دباديب ..
عينك شايفاها كراكيب ..
مهما بتزهق م التوضيب ..
برضه هتفضل اغلي حاجات ..

وحاجات ..
جوايا و جواك ..
ده قلبه ناسيك ..
وده قلبه معاك ..
وده طول عمره بيستناك ..
تفضل تهرب من حدوته ..
تستناك أصعب حكايات ..”
حسن الدهراوي

“اه مش جريء ..
ومش ذنبي اني اتعلمت اهرب وقت الحريق ..
اه مش جريء ..
واللي يخاف موج البحر عمره ما بينقذ غريق ..
بس قلبي يمكن كان فيوم طيب بريء ..
لما كان بيتلخبط بين العدو و الصديق ..
وكان لازم القي النور لما ضليت الطريق ..
مش مهم عملت ايه ..
عمر الناس ما بتهتم بالوصف الدقيق ..
لو سرقت .. اسرق جمل ..
والجمل بما حمل ..
تبقي فلاتي تسهر يوماتي ..
بكرة حالك يتعدل ..
منطق سخيف ..
مش مهم الدنيا تخفي طول ما بتلاقي الرغيف ..
مش مهم الحق يظهر طول مانتا حاكم بسيف ..
حاكم بزيف ..
برضه عند الناس بطل وبالهطل دمك خفيف ..
ويصبح كلامك دستور منزه ..
وفي الذكاء عقليه فزه ..
وانت كلامك .. حبه تخاريف ..
والظريف ..
بعد كل سنوات التحقيق .. تطلع بريء ..
وعشان كده ..
هعيش واموت ..
وانا مش جريء ..”
حسن الدهراوي

“السيد الطيار صاحب أول ضربة جوية ..
بعد التحية ..
فينك كده مش ظاهر ..
واحشنا كتير يا راجل ..
بقالك زمن لا جتلك غيبوبة ..
ولا حتي ازمة قلبية ..
وازاي ساكت ع الناس اللي بتهرب ديا ..
مش تشد حيلك انتا كمان يمكن تروح السعودية ..
قدم تظلم و استئناف ..
واطمن قضاءنا بيخاف ..

وحكومتنا بقت توافقية ..
ومكانوش يعني كام قضية ..
منصور بإذن الله ..
والبراءة مضمونه ميه ميه ..
وهتطلع منها زي الشعرة من التقليه ..
وامانه عليك ..
بلغ سلامي لابنك جمال ..
ويارب يكون مزاجه عال العال ..
وخليه يقول لحسين ..
شعبنا تعب خلاص و جاتله اللحمية ..
فياريت يضربلنا الشخرة الفشيخة الفولاذية ..”
حسن الدهراوي

“كل فكرٍ لا تحجّر، غدى مثل الصنم !”
بدر بن عبد المحسن

رامي وفا
“بنقرَّب علشان نفرَح .. بس بتِقْلِب بأذِيَّه
مش كُلّ الأعمال تَصْلُح .. لمُجرَّد صِدْق النيَّة
فيه جروح عمَّالة تفتَّح .. و نقول أخطاء فنِّية ؟!
و نقول أغراضْنا بريئة .. برَّرْنا لروحنا طريقة
و خَدَعنا الظَرْف/البيئة .. و قصور الرؤية الحَيَّة
بنسَلِّم روحْنا لبَعْض .. و نسَلِّم بعض تحيَّة
لو هَكْتِب ف اللي أذيتهم .. مُمْكِن أكتِب ألفيَّة
آه يا نفسي يا نفسي يا نفسي .. يا أمَّارة بالأنانيَّة
بنقرَّب م الناس ليه؟
بنقرَّب علشان نفرَح .. بس بتِقلِب بأذيَّه”
رامي وفا, مايم: كل الطرق تؤدي إلى 5 مارس

محمد أحمد فؤاد
“جــــاب لــــي ســيجـارة حــشيش فـقلت: مش باشرب
جــــاب لــــي إزازة وكـــاســـين زعـــقت: مـش باشرب
قال لي: ومــــا لــــك حــــزين! قـــلت: الحــبيب سـافر
قال: حـــد يرمي الحــــشــيش ويروح لكيف أصعب؟!”
محمد أحمد فؤاد, ديوان رسول اللات

محمد أحمد فؤاد
“إزّاي اكـمِّــل فـــي النُّـبــوَّة وْكــلّ أتـــبـاعــي يــهــوذا؟!
ومسيري شابّ بخمسة صاغ هيبيعني للشرطة ببريزة
وساعتها يــصــلبــني النـقــيب أشرف ورجّالته اللذيذة
ويقطّع الباسبور عشان لحظة قيامتي ما اخـدش ڤيزا!

(ختام)”
محمد أحمد فؤاد, ديوان رسول اللات

محمد أحمد فؤاد
“أوقات باحـــنّ لــــصـــفــحة مــن كـــشكول
الشـــطـــــب مــــالــــي عـــرضـــها والطــــول
أقـــطــعها واكــتــب تــانــي مــن غير شطب
والأبلة تـــنـــسى تـــلــفّ ع الكــشــاكــيــل!”
محمد أحمد فؤاد, ديوان رسول اللات

محمد أحمد فؤاد
“أوقات باشـــاور فــــي الخـــيــــال لــــبـــعـــيد
وادعــــي يـــكـــون طــيف الحــبيب موجود
كـــل الوشــــوش بـــيــــشــــلَّـــها النــســــيــان
ويـــجـــيــني جــَرْي اللي مـا هـوش مقصود!”
محمد أحمد فؤاد, ديوان رسول اللات

محمد أحمد فؤاد
“أوقات باشــــوف ضــــلِّي فْ بلوزة السَّـما!
والنَّــاس تــــقـــول: الدنــــــيا لــيـــه مـغيِّمة؟!
لــمَّا يِـــكــــون م القـــلب جــــــايّ الضـــــيّ
الشـــمـــس لـو بــصِّـت عــلــيـك.. تتعمى!”
محمد أحمد فؤاد, ديوان رسول اللات

رامي وفا
“كُلّ الخَبَطات دخَّان ..
كُلّ الأوجاع نيكوتين ..
ف الأول تتْعِب جايز ..
لكن حبَّه و بتكيِّف
و انا زيَّك كُنت زمان ..
قبل ما اكمِّل عشرين ..
ورغم اني ما كُنتِش عايز ..
ع الوضع بدأت أتكيِّف”
رامي وفا, مايم: كل الطرق تؤدي إلى 5 مارس

“الحمام الحر
نوحه للسلام
و السكوت موت
للي روحه في الكلام
و الكلام المر بلسم
للي يعرف واللي يفهم
واللي يقرأ واللى يدرى
.واللى يعلم فى الآلام”
أحمد فؤاد قاعود

“يا سيباني ومش عارف أعيش بعدك حصلك إيه ؟
منين جبتي القساوة وليه ..
وليه بعدتي ؟
ده أنا يا ستي بقالي شهر والله
بحاول أكلمك لكن ..
ما بين خايف لا ماترديش
وخايف برضو لـ تردي !
ما بزيادة انتي ماتعبتيش ؟
مابتحسيش وجع قلبي ..
مابتحنيش ساعات ليا ؟
كلامنا وكل حكاوينا
وحتي هزارنا ماوحشكيش ؟
مفيش ولا مره حسيتي ان أنا واحشك
وقولتي تسألي عليا ؟
مابتشوفينيش في فنجان قهوتك صدفه !
ولا حتي في صوت ورده فـ ليالينا ؟
ماصدقتيش زمان لما غلبني الخوف
وقولت في يوم هانتفارق ..
أدي الأيام بتتسابق وبتحاول تنسينا .

زمان أنا قولتلك ياما وماسمعتيش
كتبت قصايد الدنيا ومابتقريش !
أنا حابب أقول بس إني مستغرب ..
كما العاده .
لا فاهمين ليه بنبعد بعض
ولا فاهمين ليه بنقرب !
أنا حابب أقول بس إني مانستكيش
فـ لو مبسوطه من غيري ,
ما بزياده انتي ماشبعتيش ؟

يا واخده من الزمن وقته
وواخده من السعاده السر
وحشتيني ..
وحشني العمر بمشاكله
وحشني كلامنا مـ المغرب لحد الفجر
وحشتيني ..
يا سيباني وأنا عادي ,
ممشي الدنيا من بعدك ومن غيرك
وهافضل برضو مش راضي .
وهفضل بشرب القهوة في نص الليل
وأشوف صورتك وأنا قاصد ومش صدفه
وبفتكرك كـ حلم جميل
وأوهم نفسي إن زمان غلبني الخوف
وقولت في يوم هانتفارق !
ودي حاجه ماحصلتليش ..
لأن زمان لما غلبني الخوف ..
ماقولتش حاجه غير : خايف فـ ماتسيبنيش .
وسيبتيني .”
عبدالرحمن سامي بلال

« previous 1