ويسترن يونيون Quotes

“شفت كفه عامل إزاي م الشقا؟

شفت جلده والكعوب متشققة؟

شفت ضهره وهوا محني

وشكله عامل حرف إل؟

شفت بقه لما يضحك

كل ضحكة سنان تقل؟



شفت شعره أبيض إزاي م اللي شافه؟

و لما كح دم إزاي الكل خافوا؟

شفته طبطب ع العيال

إزاي وهما بيلعبوا؟

و خاف عليهم قد إيه

م اللف لحسن يتعبوا؟

شفته ف صوان العزا

عمال يدوّر ف الوشوش

على حد لسه يعرفه

على حد لسة مودعوش

شفته ودع كام صديق..

و كام حبيب؟

و كام قريب؟

و دعوته وسط الصلاة

يا رب متسبنيش غريب

خدني أتونس معاهم

كله راحلك إلا أنا

وإن كان لسه ف العمر باقي

طب فاضللي كام سنة؟

آسف....أنا مش قصدي أراجعك

والشكوى دي مش كفر مني

مش قولتلي....إحكي اللي واجعك؟

طلع الكلام كدا غصب عني

طلع الكلام

أهبل...وخام

عيل عبيط

ملهوش لجام

والعمر دايرة

مقفولة صح

أولها

.نلقاه ف الختام”
― مصطفي إبراهيم

“طفت وزرت كل مقام
مليته دموع، بكا وكلام
كنست السيدة يا إمام
فتلت يا عدرا شمعك فيه
ندرت الندر بالساهل
وحتى لو حموت وأوفيه
أكيد الندر يستاهل
مدام هتعيشي من بعديه”
― مصطفي إبراهيم

“اهداء الى مصر قبل الفجر بس-
اهداء لكل الولاد اللي جابتهم مصر قبل متمشي فالبطال
اهداء لعيش وحلاوة وكل الاحلام التي لم تكتمل
واهداء لفيلم الكيت كات
واهداء لموسيقى فيلم الكيت كات
واهداء لمصطفى محمود اللي لحم دماغي من خيره
واهداء لكل اللي خرجو منها زي مدخلو
واهداء للي خرجو من غير ميدخلو
اهداء للطيران اللي بحبه ومبيحبنيش
واهداء للبنت اللي مسحت كل اللي قبلها باستيكة
وبعدين مسحت نفسها
اهداء لنسيم الريح اللي بسمعها لاول مرة يوميا
واهداء لسيدنا الحسين اللي مات لوحده ... وعاش
واهداء لجارنا العجوز اللي عاش لوحده ومات
واهداء لبيتنا وحوش مدرستنا
ولنينجا تيرتيل وغزل البنات”
― مصطفى ابراهيم