كلمه الخريجين..30 يونيو 2010

دي كلمه الخريجين اللي قولناها ف البروم بتاعنا ..ف فندق تريومف مصر الجديده..كلمه دفعتنا..دفعه إعلام عين
شمس 2010

الجهاز كان بايظ بقي ف لسهه منزلاها
---------------------------------
مش عارف حاسس انى لاول مرة خايف وقلقان وانا ماسك الميك ... يمكن عشان قاعد ادامى اكبر اعلامين مصر وممكن يقيمونى ؟؟ ... ولا عشان قدامى د-سوزان اللى علمتنى ؟؟؟ ... مش عارف ...
بس اللى الاكيد انى قلقان وخايف عشان هنقل شعور واحساس دفعة كاملة ...

من اول يوم كنت صاحي بدري ونازل رايح الكليه,العالم الغريب اللي لسه معرفش عنه أي حاجه غير شويه ورق..كنت نازل أكتب ورق الرغبات في مدرج سفلي ..دخلت لقيت ناس كتييييييييير, وقفت في الصف وخدت ورقتي وحواليا ناس معرفهمش,,ساعتها قعدت أسأل نفسي ..ليه أصحابي القدام ميبقوش معايا ؟ هم دول اللي هيبقوا زمايلي في القسم؟ياتري الأربع سنين هيعدوا إزاي ؟
يااااااااااااه..لسه بدررررري

مش هنسى أول محاضره ف أول مدرج.. 415 وماده علم الإجتماع..دخـلت وانا معرفـش أي حـد ,والدنيـا زحـمه جداً..ونـاس بتـسلم علي بعـض..يا بخـتهم..شكلهم أصحاب ودخلوا كليه مع بعض.. ؟؟ طبعا كنت الولد الملتزم معايا الكشكول اللى المفروض هكتب فيه والقلم .. وقعدت فى 4 بنج .. لقيت اول 3 بنجات بنات قولت اية ده !! رحت قاعد فى الرابع بس للاسف بعدها بشوية لقيت يمينى بقي بنات وشمالى بنات ورايا و قدامى حسيت انى بقيت محاصر ... لحد مافهمت بعد كده ان احنا بقينا عملة نادرة فى الكلية

مش هنسى إني كنت داخل القسم علي إنـه .."آداب إعلام " بالإسم بس ..مش إعلام, كنت داخــل متوتر وخايف علي مستقبلي,,علي حلمي إني أكون إعلامي وأشتغل ف حاجه بحبها..كل خوفي راح من اول محاضره اتكـلمت فيها دكتور سـوزان في مدرج غربــال
الست دي أكيـد عبقريه.. فى اول محاضرة واول تعارف خلصت كلامها والمدرج كـله كان بيسقف وفرحان أوي..خلتنا كلنا نحب القسم....نحب بعض..نحب الميديا,بعد كـده بقت محاضره دكتور سوزان محاضره مقدسـه..حتي لو الساعه 8 الصبح..من أول يوم دخلت فيه لحد آخر محاضره ليها..

مش هنسى قعدتنا عشان نعمل التكليفات اللى أكيــد كانت ببتعمل يوم التسليم الصبح ياعند العلم او فى اخر بنج فى المحاضرة نفسها و الكل بينقل نفس الكلام من شيت واحد او اتنين بالكتير اوى .... وفى الاخر نتفاجىء ان المادة دى مكانش ليها اعمال سنة






مش هنسى ان دخلت الكلية واحد ... وخرجت منها واحد تانى خاااالص
واحد حياته اتغيـّرت ف الاربع سنين دول..شوفت ناس واتعاملت مع شخصيات عمري ما كنت أتخيلها..لقيت صاحبي اللي بتسند عليه بجد ,هو نفسه اللي بنسهر مع بعض ونخرج نلعب بلاي ستيشن بعد الجامعه..وطبعاً في ناس طلعت أي كلام ..
لقيت إخوات بنات وأصحاب دماغنا واحده ,نطلع لحد الدور الرابع اللي قطع نفسنا ونقف شويه نرتاح..نلاقي الدكتور قفل الباب, ندخل المحـاضره والدكتـور يـادوب لـسه داخـل ونـقعد نـقوله معلش يا دكتور..ويدخلنـا,نجري جـري علي آخـر بنـج,ناس دحيـحه تكتـب ورا الدكتـور,وناس تانيه..إحم..احنا عارفين هما بيعملوا إيه

مش هنسى كافيتيريا مشهور واكلها و ايوووووة يا اتش و رووووقة

مش هنسى وقفتنا كلنا عند العلم من غيـر ما حـد يقولنـا..كفايه إن أي حد يسأل عليك قوله تعالالي بس عنـد العلم

كل حاجـه ف الكليـه دلوقتـي شايفها جميله..يمكن مكانتش كده وقتها لأننا لسه مكناش فاهمين قيمه اللي ف إيدينا..

واكيد مش هننسى الداكترة ..
-دكتور سوزان وأحـلي محـاضره ف الدنيـا والأفــلام اللي بتتعرض لنا فيها والكتاب الوحيد اللي بنسلم الشيت بتاعه سورى يا دكتور عارف ان اسمه تكليف مش شيت

-دكتور غاده ومحاضره الترجمه بتاعه 8 الصبح اللي الناس بتنزل 6 ونص عشان تلحق تيجي

-دكتور ماهيناز والمحاضره اللي ف عز الحر ف مدرج سفلي ..تيجي تحضرها عشان تنام غصب عنك تركز ف الكلام اللي بيتقال ويا سلام بقي علي الكتاب اللي الصفحه فيه 9 سطور وبيخلص بسرعه قبل الإمتحان

-دكتوره نجوي عبد السلام و مواد صحافه ومحاضراتها ف علوي اللي مكناش بنسمع منها حاجه
-دكتوره دينا والماده الإعلاميه
-دكتوره هبه شاهين..وكتب دكتور هبه شاهين ..فاهمينني طبعاً..:D
-دكتوره سلوي! و د- دينا يحي اللى نورتنا فى القسم
د- سيد بهنسي و اول دفعة هتتخرج تحت ايده ... ومكتبه اللى دايما مفتوح لينا كلنا
وكل المعيدات اللى ساعدونا ووقفوا معانا فى مشاريعنا كلنا


مش هنسى المدرجـات,سفلي وعلوي وغربال و415 و أ..والسكاشن اللي بنطلعلها الدور التالت..وسكـشـن صحـافه اللي كان ف توشـكي الساعه 9 الصبح ,شئون الطلبه,شباك شئون الطلبـه ..وموظفيـن شئون الطلبه .. ياللا المسامح كريم




مش هنسيى المشاريــع اللي طلعت عينيـنا.. الأفـكار اللي اتغيرت 100 مرة وطبعا التفاهم والانسجام الواضح بين كل جروب

.مش هنسى اكيــــــــــد الإمتحانات.....سامع حد بيقول "يادي السيره النكد "..ما انتوا عارفين اللي بيحصل فيها أكتــر مني , من أول المحاضرات والورق اللي بنصوره من بعض واللي بيشتروا ملازم من المكتبات و ورق عمرو .........

مش هنسى ذكريات 4 سنين عشتهم ....
وآدي كل اللي كنا بنخــاف منه وبنحبه خلص,كل ده مر ف ثواني..الأربـــع سنين عدوا ف إسبوعيــن ولا حسينا بيهم..بكره الأيام هتعدي علينا ..تفرحنا شويه وتلطش فينا شويه ..بس في لحظات مهما العمر هيعدي مش هننساها.,حفله الفرايداي شو اللي جمعتنا كلنـا لأول مره,الدكاتره والأساتذه اللي درسولنا ,مجـله القسم,الحفله اللي عملناها كلنا ل د/ سـوزان عشان نقولها إحنا بنحبـك..أيام المشاريع والشغل ليل ونهار,رحلات العين السخنه ودريـم بارك والفيوم ,كل مكان رحنـاه أو قعدنا فيه ف الجامعه,جروباتنا علي الفيـس بوك,كل حاجه من أول يوم إتعرفنا فيه علي بعـض لحد يوم 19/6..لما اتصورنا صور التخـرّج قدام قصر الزعفران

كل ده عمره ما هيتنسى ابدا ....
هنفضل دايما مع بعض ... هتفضل عايشين مع بعض .. ذكراياتنا مش هننساها .. لا
هنزود عليها ذكريات جديدة ....
اسمحولى مقولش هتوحشونى ... لا هقول هنتقابل قريب كلــــــنا .... يا احلى دفعة فى الدنيا
دفعة اعلام عين شمس 2010

بقلم بسمه العوفي