إبليس..والحلم الخبيث

في فتره غيابي عن الفيس بوك,إتعمللي تاج ف حوالي 45 نوت ,قولت كالعاده هقراهم كلهم جرعه واحده وأنام بعدها..دي وصفه صحيه جداً..لإيه..معرفش..:D
المهم ,المره دي ..قريت أول نوت..ممممممم عادي,التانيه..طيب..:|,التالته..هو في إيه؟
الرابعه..الله؟ برضو..دانتوا متفقين بقي
الخامسه والسادسه لحد نوت 35,,والعشره الباقيين قريتهم ومعجبونيش ف سبتهم من غير تعليق

كالعاده برضو..بخلي نوت إسلام أبو بكر للآخر..ليه؟معرفش,بس بما إني هنام بعدها يبقي أكيد عشان تكبس علي نفسي..:D
المره دي مكنتش محتاجه أقرا نوت إسلام ,هو غالباً بيجيب مضمون جاد شويه,بس اللي قريته ف كل النوتس اللي فاتوا خلاني مش ناقصه أي حاجه جد

عناوين سريعه عن مواضيع النوتس وانتوا هتفهموا قصدي (آلام الثانويه العامه,واحد مخنوق من المواصلات,الناس اللي بتشتكي ,القهر,الظلم ,الأخطاء,الموت,إنتهاء قصص الحب,عن الهويه ومستقبل الشباب الضايع,خالد سعيد ,الكبت والضغط اللي بيتعرض ليه المصريين,,إلخ إلخ)

هم تقريباً كانوا متفقين عليا..أقرا مقال ألاقيه مكتئب..نوت ألاقيها بتشع نكد ..ده حتي الناس اللي بتكتب شعر بقت تكتب حاجات حزينه..بجد اتخنقت جداً..ده حتي محمد مهدي راح مجمعهم كلهم ف نوت وبعتهم ف جواب لرئيس الجمهوريه..لا وكاتبله عزيزي رئيس الجمهوريه..عزيزي !..مهي ناقصه حرقه دم

http://www.facebook.com/notes/mohamed-mahdy/zyzy-ryys-aljmhwryyt/406445676195

مبقتش عارفه أرد ع التاج أقولهم إيه..لحد ما جت نوت إسلام قولت إيه؟؟أنا ناقص ياخويا..مش وقتها خالص..لأ وكمان إسمها (عندما حدثني إبليس يوم القيامه)..ياللا بقي اتقلب بينا وإخلص..:D

قولت يمكن أنا شريره وظالماه..أدخل أقرأ النوت,أوبااااااا..إيه اللي أنا بقراه ده؟ ده بجد ولا حقيقي؟
قولت بقي إيه إشمعني أنا أكتئب لوحدي.,,طب والله لأترجمهالك يا إسلام ..من اللغه العربيه للعاميه التمام..ياللا خلي اللناس تنبسط
-------------------------------------------

الدنيا بتضلم..والأرض بتتهز..الله..كملت..ميت مره قولت لأختي تبطل الهزار البايخ ده..بس..هي أختي هتخلي البيت يتهز؟زلزال..إجري يا عم ..بصيت من البلكونه لقيت صريخ والناس بتجري..خفت ..نزلت أنا كمان..بس ..إيه ده؟..أنا مش عارف أنا فين..هي الناس جرالها إيه؟

عمري ما كنت أتخيل إن عمري هيطول لحد ما أشوف الكون بينهار.. ده يوم القيامه..هو أنا مت خلاص؟ بس لأ..مستحيل تكون دي النهايه ..إحنا ف تقدم علمي يعني أكيد نقدر نتنقل لمكان تاني ف لمح البصر..بس ممممممم هو في مكان تاني؟

الناس بتستخبي..وبيجروا ويهربوا وهم مش عارفين هيروحوا فين..في ناس غريبه لسه متمسكه بالدنيا..اللي شايل شنطه فلوس ولا علبه دهب..هم فاكرين نفسهم رايحين السوق الحره؟ ده يوم القيامه..هو الناس مش فاهمين بجد؟ ولا عارفين ومش قادرين يصدقوا؟ ولا ومش عايزين يموتوا؟

كل واخد خد ديله ف سنانه وقال يا فكيك ..فين بقي البت بتاعتي وصاحبي وأخويا وكل الكلام ده..ده حتي الامهات بيسيبوا ولادهم الصغيرين ويجروا..كل واحد بقي لوحده..لا أب ولا أم ولا أخ..صافي يا معلم

الكل مخضوض ومستغرب وبينهج من كتر الجري ومش عارف يجري يروح فين تاني..هيهرب؟لفين؟هيتحامي بمين؟ النهارده ولا أي حد هينفعك..ولا حتي حسحس نفسه..متفهمونيش غلط..أنا قصدي..تامر حسني..:P

ألا صحيح..فين بقي العربيات الشيك والقمصان المفتوحه والفساتين القصيره والعريانه,والناس اللي بتسقف وترقص لكل واحد يغني ولا حتي لكل سياسي يقول خطبه..ألا هم فين الزعماء..؟؟ينفع نسأل ولا..هنتاخد برضو؟

فين الصحفيين اللي بيغيروا الكلام للي يدفع أكتر,فين الأبهات اللي سايبين ولادهم بالسنين عشان يسافروا يجيبوا فلوس وييجوا؟فين النت والفيس بوك والإيميلات بتاعتنا..فين الكمبيوتر اللي بنأجل عشانه الصلاه؟ فين أصحابي اللي حلفنا ..مفيش حاجه هتفرقنا عن بعض أبـــــــداً..فين البت أختي..كانت واخده مني خمسين جنيه..:D

فجأه,كل بيت بيتخلع السقف بتاعه وبقي طاير ف الهوا..كلنا باصين لفوق عايزين نعرف مصيرنا..والطوال بقي يا بختهم..هم الناس الوحيده اللي عارفه تتنفس في وسط الزحمه دي..والقصيرين..لأ كفايه بقي الواحد مش عايز ذنوب
:P
..هم البشر دول كلهم جم منين؟ مش كنا بنقول عايزين نعمل ثوره وإنقلاب ومكناش بنشوف دراع بني آدم حتي.. يعني انتوا كنتوا خايفين من الللي إسمه إيه ده؟.ومش خايفين من ال..؟؟ ناس متجيش غير باللللللل..صحيح ..!

وانا واقف وسط الزحمه دي..خير اللهم ما اجعله خير..لأقيت ناس لابسين أبيض ف أبيض..أنا كنت متأكد..كنت متأكد..مع إني كنت شاكك إنه حلم..بس للأسف طلع شكي ف محله..ده مش حلم..دي حقيقه..قعدوا يكلمونا عن النعيم اللي فازوا بيه..أيوه بقي يا سييييدي الجنه واللي فيها..بس ..إيه اللي بيقولوه ده؟

قالولنا.".دول اللي خلقوكم..صدقوهم وانتوا تدخلوا الجنه.."
مش عارف ليه مصدقتهمش..لقيت حد منهم جاي بيكلمني,قالي إنهم اللي خلقونا ,,ولازم نصدقهم عشان ندخل الجنه..!
شغلت مخي..قولت له :كل ده كلام فارغ..دول مش هم اللي خلقونا,لو هم صحيح كانوا ع الأقل وصلوا بموكب ولا كان ليهم سفاره..واد إنت..أنا شوفتك قبل كده ..إنت منين ياض؟ إطلع بكارنيهك ..ورحت ماسكه من رقبته وقولت له إجري إندهلي حد كبير أكلمه..

وجريت بسرعه ناحيه الناس وانا بقول..فين السفاره..والناس بتهتف ورايا..فين السفاره..؟؟فين السفاره؟ سامع حد بيقول ف العماره..لا مش دي يا ناصح..:D

فجأه..سمعت صوت من بعيد..هو فيييييييين اللي بيتحداني..هاتهولي..
بيدور عليا..بيدور عليا..جوموا بينا نمشي ..:D

وقفت قدامه وقولت له ..أنا..هع ..مين هنااااااك؟
-أنا
-إنت مين؟
-أنا الكبير بتاعهم..جيتلك يا ودييييع
-هو حضرتك شغال ف ميلودي؟
-ههههههههههه كلهم شغالين عندي؟
-إيه ده؟أنا عرفتك؟..جمال مروان ..:D
-لا..أكبر شويه..:D
-أيوه أيوه..جمال الشاعر؟
-لا إنت كده نزلت للثقافيه وأنا كده هزعل منك..إطلع فوق..فوق أوي..
-مييييييييين..؟؟ جمال مبـ...والله العظيم يا باشا أنا بحب مصر
-مصر مين يابني ..أنا..إبليس
-هأو..ما كلهم بيقولوا علي نفسهم كده..عندك مثلاً النادي الاهلي ..مهو اسمهم الشياطين الحمر..يعني هم شياطين بجد؟
-إنت بتشتم ف الاهلي..انت زملكاوي ياض؟
-لا ياباشا ..أهلاوي..أهلاوي أباً عن أخ..واللي إنت متعرفوش إني بشجع الأهلي..بس انت برضو مقولتليش ايه علاقه ده باللي كنا بنقوله..
فجأه ..وشه اتكشف..إبليس..إبليس الحقيقي..جوموا بينا نمشي..أبص جنبي وحواليا..يميني ملقيتش حد..شمالي ملاقيتش حد..باعوني الخونه..

مش فاكر إيه اللي حصل بعد كده غير إني هددته..أيووووووون قولت له أنت مش عارف أنا ابن مين..وطلعت المطوه من جيبي وقولت له لو قربت مني..هغوزك.. هع هع

افتكرت اني كنت قريت عن صحفي فرنسي إسمه رائيل..قال إنه قابل كائنات فضائيه قالوله إن هم اللي خلقونا..وشعار الديانه دي كان نجمه داوود متحرفه شويه..قالوا إنهم هيزوروا كوكب الأرض تاني بس لما الزعماء والحكام يبنولهم سفاره علي كوكب الأرض(آه وياريت بقي علي أرض مدينتي ..:D)
عشان كده لما الراجل الغريب ده قالي في الحلم إنهم هييجوا..قولت له مستحيل يكونوا هم..لأن السفاره محدش بناها علي كوكب الأرض..(لأن طلعت مصطفي في السجن يا معلم..:D)
قام ابليس اتغاظ..وقالي وربنا..وربنا كمان مره..لأوريك يا إس إس..هقطع وصله النت من عندك وإبقي خلي
TE DATA تنفعك..نياهاهاهاهاها

***ملحوظه..الرائيليه إحدي التمهيدات للمسيخ الدجال

قفلت النوت....قفلت بروفايلي ..قفلت الفيس بوك..بس نسيت أمسح إسلام أبو بكر من الفريندس

مانا كنت ناقصاك أصلي..

النوت الأصليه هنا..إقروها مهو كده كده مفيش أعصاب خلاص


http://www.facebook.com/notes/islam-abou-bakr/ndma-hdthny-ablys-ywm-alqyamt/409150058717