:D من مذكرات أول يوم بطاله

قاعده رقم 1:البطاله كنز لا يفني
أيون لأن كل إبداعك هيطلع بقي من أول الصواريخ والماسكات اللي بتخض وكل الحاجات اللي كان نفسك تعملها من سنين لدرجه إنك مش فاكرها أصلا

قاعده رقم 2: إنها بطوله وليست بطاله
البطاله كلمه لو شلت منها حرف الألف اللي ف النص والهاء الاخيره ف هتبقي "بطل"..وإنت فعلا بطل لأنك خلصت الأربع سنين كليه بتوعك ف أربعه بس..مش دبلر يعني..ده دليل انك كنت مجتهد..ف من حقك ترتاح دلوقتي
:D

قاعده رقم 3:أنت في خدمه أي شخص
بما إنك فاضي..يعني مامتك لما تقولي قومي نضفي الشقه واعملي الغداء وجهزي هدوم اخوكي الصغير عشان يروح النادي وحطي الغسيل ف الغساله ووضبي البيت عشان في ضيوف جايين لحد ما تحسي انك سيده ف نحن لانزرع الشوك..وتقولي والله يا زمن..ما بإيدينا..خلصنا الكليه ..:((

..وفي نفس الوقت ممكن متساعدش حد خالص بحجه إنك من بقالك 10 ساعات مقطع نفسك نوم..لازم ترتاح شويه
 
قاعده رقم 4: العالم يفتح لك ذراعيه..
كل ما تقول لحد انا اتخرجت..يقولك أهلا بيك يا حبيبي..إركننننننننننننن ..ده لو لقيت مكانك ف الصف أصلاً
قاعده رقم 4 للمره التانيه:خطط لحياتك
سؤال من كل اللي حواليك من بعد ما تخلص لجنه آخر إمتحان ..ها..ناوي علي إيه؟
وهنا تتذكر إعلان إسبرايت..مـُدرسه يا مها..إحنا بنربي أجيال
قاعده رقم 5:البطيخ يطرق الأبواب في أي وقت
الجو حر..وأنا لسه متخرج إمبارح..أعمل إيه؟مفيش غيره قدامي

قاعده رقم 6:متقرفوناش بقي
كل ما تقول لحد انا اتجرت هيقولك يييييييييييه يعني هم اللي اتخرجوا عملوا إيه؟انت بس شوفلك قهوه حلوه كده عشان تبدأ تقعد عليها..طب إنت محبط..أنا مااااااالي..سيبني أكتشف إحباطي بنفسي:D




قاعده رقم 7:العين عليها فارس
نظره أصحابك اللي غالباً من كليه علوم ومثيلاتها علي إنك فارس..أيووووووووووه يا سييييدي ..خلصت بقي مش إحنا اللي بنطحن ف الكليه..




قاعده رقم 8:الفرخه كلت بيضها..:D
لما يجيلك النق من أقرب الناس ليك..لو أخت ف طب مثلا وانت دخلت الكليه وخلصت قبلها..تفضل تبصلك شذراً..طب أنا مالي ما كنت الكليات قدامكوا م الأول..حد قالك تختار طب؟مش عاجبك..إنت حر




قاعده رقم 9:يادبله الخطوبه..مش وقتك خالص علي فكره !
بالنسبه للولاد..ف أنا لسه مخلص..استنوا بقي لما أكون نفسي..موت يا حمار
وبالنسبه للبنات..تخرج يعني كل واحده تشوفك تقعد تغمزلك بعنيها..إيه بقي هه؟مفيش حاجه كده ولا كده؟هنفرح بيكي إمتي
وكأن المستقبل هو الجواز وبس!
قاعده رقم 11:كل الطرق تؤدي إلي الأنتخه!
في الأيام العاديه الحاجه بتتعمل ف 4 ساعات..ف الأجازه بتتعمل ف نص ساعه..أومال هتحس بالوقت والفراغ إزاي؟
وتبدأ تبص للأشياء بدهشه..إيه ده؟دي كوبايه؟سبحان الله..ياااااااااه الواحد بقاله سنين مشافش كوبايات
لو ولد يقضي نص يومه بيحط جل ف شعره عشان يخرج بالليل مع أصحابه
ولو بنت تفضل تبص ف المرايه..
 
قاعده رقم 12:أنا مش بطه بلدي
الثوره اللي هتجيلك فجأه..لا أنا لازم أبتديها جد من أولها..مش هسيب نفسي للضياع.أعمل إيه؟
أعمل اكونت ف كل مواقع التوظيف واقرأ الجرايد عشان أبص علي الوظائف الخاليه
مطلوب سكرتيره حسناء
مطلوب طبيبه حسناء
مطلوب حسناء نفسها.وبين قوسين "يشترط الخبره"..!


قاعده رقم 13:عشان تصرف.لازم تطاطي
إنت دلوقتي من غير شغل..والنصب بتاع أيام الدراسه بتاع الكتب والورق والملازم واللذي منه خلص..ولو فكرت تطلب فلوس كحق شرعي لأنك إبن في هذا البيت هيقولولك إن ليك أخوات برضو في هذا البيت..عشان كده لازم تطاوعهم لحد ما تاخد فلوس بالذوق  قاعده رقم 14:مزنوق أخاك مش بطل
إنت مضطر تلاقي شغل مهما طال الوقت.عشان تخلص من الإنتهاكات اللي بتتعمل ف حقك وانت عاطل..إحتمال كبير تنضم لحركه كفايه أو منظمات حقوق الإنسان..مش عشان تطالب بحقوقك..لأ عشان تاخد حق"مقابل" شغلك  
قاعده رقم 15:البكاء علي الأطلال وعلي سور الجامعه

مفيش حاجه تعوضك عن صحابك..هتفتكر الكلمه دي مع كل صوره هتشوفها وكل قلم هتاخده ف حياتك بعد كده..وتسمع الكلمه المعتاده..اللي مرباهوش أمه وأبوه,..يربوه الأيام والليالي ..
محدش حاسس باللي إنت فيه غير صحابك المتخرجين زيك..تجري تكلمهم بسرعه..وتسمعوا عمرو دياب مع بعض.,.ونندم ع العشره الغاليه..ونرضي بالمكتوب والله وآدي حال الدنيا بتفرق ف القلوب.. ..وحشتوووووووووووني يا اصحابي