சுமையும் சுவரும்- இரு கவிதைகள்

ஜா.தீபா பற்றி கல்பனா ஜெயகாந்த் மலைப்படிகள்

சுமையும் சுவரும்- இரு கவிதைகள்

போகனின் இரு கவிதைகள், ஒன்று எடை அல்லது சுமை பற்றி. இன்னொன்று சுவர் பற்றி. நவீனக்கவிதையில் மிகமிக அடிக்கடி வந்தமையும் இரண்டு படிமங்கள் இவை. [நான் எழுதி அச்சான முதல் கவிதையே சுவர்களைப் பற்றியது. கைதி கொல்லிப்பாவை இதழில் வெளிவந்தது. அடுத்த கவிதை சுமை பற்றியது. ] மரபார்ந்த கவிதையில் அதிகமாக இல்லாத இரண்டு படிமங்கள் இவை. நவீனக் கவிதை ஏன் இந்த படிமங்களை இத்தனை தூரம் எடுத்தாள்கிறது?

அதற்குப் பதிலாக ஒன்றே சொல்லமுடியும். நவீனக் கவிதை மரபார்ந்த கவிதை நோக்காத இன்னொரு திசையை நோக்குகிறது. அது விடுதலையைப் பற்றிப் பேசுவதைவிட சிக்கிக்கொண்டவனின், துரத்தப்படுபவனின் தவிப்பைப் பற்றியே பேசுகிறது. ஆகவே களியாட்டங்கள் நவீனக்கவிதையில் பேசுபொருளாவது குறைவு. அது துயரை நோக்கி திரும்பிக்கொண்டிருக்கிறது.

நான் அக்கவிதைகளை எழுதிய நாட்களை எண்ணிக்கொள்கிறேன். முதன்மையாக தனிமை, சாவின் அண்மை, தத்துவார்த்தமான வெறுமை ஆகியவற்றில் மூழ்கியிருந்த நாட்கள். அவை என் நோயின் விளைவாக உருவானவையா, நோய் அவற்றால் உருவானதா என்பது இன்றும் புரியாதது.நோய் மிக அரிதாகவே மரபிலக்கியத்தில் பேசுபொருள் ஆகியிருக்கிறது.

ஆனால் செவ்வியலில் எல்லாமே ஏற்கனவே இருக்கும். இக்கவிதைகளின் உளநிலையைச் சொல்லும் ஒரு புறநாநூறுப் பாடல் உண்டு.

அதள்எறிந் தன்ன நெடுவெண் களரின்
ஒருவன் ஆட்டும் புல்வாய் போல,
ஓடி உய்தலும் கூடும்மன்;
ஒக்கல் வாழ்க்கை தட்கும்மா காலே.

சுமையும் சுவரும்- இரு கவிதைகள்

Jeyamohan's Blog