بسمة العوفي's Blog, page 5

أنا ♥ مروة رخا

مبحبش أكتب نوت عن أشخاص لأنها بتبقي أحكام أو أفكار ممكن أغيرها بعد كده,بس دي مش أحكام..دي تجارب,وده مش أي شخص..دي مروة.




أتوقع معارضة قبل ما أقول الأسباب,وأنا ليه أحب مروة رخا؟مروه رخا دي "....." وأي تييييييت بين النقط,أو اللي بيحب مش محتاج أسباب,فعلاً ,ده اللي بيحب بقلبه,لكن العقل محتاج أسباب عشان يقتنع.




-إنتي تعرفي مروه رخا؟

-لأ..مين؟

-دي واحدة بتتكلم فـ الجنس ومبهدلينها علي النت.

-ليه كده؟

-بتحرض الشباب علي الفسق والرذيله

-وهو اللي عايز يعمل رذيله ..محتاج حد يشجعه؟

-لأ,بس هي رأيها بيشجع ده

-اللي يقتنع بحاجه يشيل مسئوليتها.



وبعدها روّحت ضفت مروةعلي الفيس بوك,وبدأت أقرالها وإتصدمت الأول من إن في حد بالجرأه دي(ملحوظه:الجرأه عندي معناها شجاعه) وبدأنا نتكلم .




وكل ما أشيّر حاجه ألاقي حد رد عليا ,أو بعتلي في الإنبوكس..يابنتي بلاش تقري لمروه رخا دي..

والناس اللي من نوعيه"أنا متابع بروفايلك من فتره ومعجب بيكي..بس مش فاهم إيه سر إعجابك بمروه"



1-مروة جدعه جدا..واللي يعرفها بجد يحلف علي ده,دايماً بفتكر لما كنت مكتئبه من فتره قريبه,وصحيت الصبح لقيتها بتتصل بيا تطمن عليا !,مروه بتتصل وبتتابع وبتسأل وبتهتم .



2-صريحة..ومع نفسها قبل ما تبقي مع الناس,كنت فاكره ده لأنها –زي ما عرفت بعد كده من أصول روسيه,قولت هم الأجانب دايماً كده..نظامهم إنجليزي,وكل واحد يدفع لنفسه بقي والحركات دي,

بس بعد كده لقيتها لقيتها بتتدحرج التماسي وتفيش الهوامش وأهي صوتت بالبلدي بنت سلطح باشا..هي روسيا حالها إتدهور أوي كده؟..:D



3-صادمة..في ناس بتشوف إن دي حاجه وحشه,كان في حد قبل كده كاتب نوت عن مروه بيقول"دي مش بترد علي مشاكل البنات..دي بتدي البنت قلمين يفوقوها".



4-حنينه جدا جدا..ودي حاجه أنا لمستها بنفسي..:)



5-متواضعة..
قبل كده حد قالي "هي أصلا مبتبحبش تسلم علي حد",تاني مره شوفتها كانت في راديو حريتنا وكان معاها ناس,قولت هشاورلها من بعيد وخلاص,أول ما شافتني قامت وباستني وحضنـ وحضنتنـ يووووه..إيه الكلمه اللي مش راضيه تتكتب دي !..اللي هو حضن يعني..وخدتني عرفتني علي اللي قاعدين معاها وقعدنا نضحك ونهزر وعادي جدا..إيه بقي؟بيجيبوا الكلام ده منين؟



من فتره واحده متعرفنيش بتقولي "علي فكره إنتي بنت كويسه جدا"

قولتلها:عرفتي منين؟

قالتلي:الناس بيقولنا عنك كده

قولتلها:نفترض إن في واحد ضايقني ف الشارع,ومسكته بهدلته ومسحت بكرامته الأرض,وجيتي سألتيه بسمه دي إيه؟مش هيقولك دي قليله الأدب؟

-آه فعلا..

-عارفه ليه؟لأن الناس بتبص علي رد فعل الطرف الآخر..مش بتبص هي عملت إيه.

-يعني إيه؟

-يعني اللي قالي مروه مش بتسلم علي الناس..يبقي هو عمل حاجه ضايقتها وخلاها مش عايزه تسلم عليه !



6-جميلة..لمن يتذوق الجمال.. وعشان نختصر..إقروا نوت شيماء راضي.تذوقني شكرا

http://www.facebook.com/note.php?note...





7-حازمة..آه ولا لأ, ينفع ولا مينفعش..بتجيب الخلاصه..بتجيب مـ الآخر.

Take it or leave it



8-دماغ..بحب الست اللي بتفكر ,اللي ليها رأي وشخصية ,سواء وافقت أو إختلتف معاها متقدرش تنكر تواجدها.



9-آخر كلمه في السطر اللي فات"تواجدها",ناس كتير في الدنيا موجوده..بس ملهاش تواجد

وفي ناس متواجده دايماً..حتي لو هي مش جنبك



10-في مقدمة كتاب "لماذا كل من حولك أغبياء"لـ د.شريف عرفه.يحكي قصه عن إتنين زاروا نفس المدينة ولما رجعوا القريه بتاعتهم الناس بتسألهم..شوفتوا إيه هناك؟

واحد قال..شوفت مسخره وخلاعه ومجون.

والتاني قال:شوفت مساجد وناس جميله بتعبد ربنا .

أهالي القرية إحتاروا بين الإتنين وراحوا سألوا الحكيم,مين فيهم صادق..قالهم الإتنين صادقينالأولاني شاف الخلاعه لأنه كان بيزور كباريهات

والتاني شاف ناس كويسين ومساجد لأنه كان بيزور مساجد



المكان واحد.بس الرؤية مختلفه.

كل مكان فيه الكويس والوحش

وكل شخص فيه الكويس والوحش



لكل حد مختلف مع مروة..دي رؤيتك.


http://marwarakha.com/

اللي خايفين من التزوير احنا معاهم لكن...

من كام يوم كنت قاعده مع شويه صحفيين أصدقائي
وكان في حد فيهم بيقول إنه حضر الإنتخابات اللي فاتت
وإن التزوير كان بيتم في البطاقات الإنتخابيه اللي محدش إستخدمها


بمعني أصح..اللي مدخلتش الصندوق
طب وليه؟ما إحنا فـ إيدنا نغيّر


مش لازم ترشح حد
مش لازم يكونوا عاجبينك
مش لازم تعمل حاجه أصلا


كل اللي مطلوب..روح إنتخب..وسيب الورقه بيضا
خلي عندك إحساس بالمسئوليه
خلي عندك صوت
وشوف الفيديو ده
http://www.youtube.com/watch?v=rniPfBW7VJc

خلي عندك صوت..إعمل بطاقه إنتخابيه

هرجنا كتير..نتكلم جد شويه

الفيديوهات دي مهمه

وقد أعذر من أنذر


http://www.youtube.com/watch?v=GyX9JjdrAok

جروب الحمله علي الفيس بوك

http://www.facebook.com/group.php?gid=213501021940&v=wall

دفاعاً عن مرارتي

مبحبش..
إوعي تفهمني صح..


مبحبش حاجات كتييييييييير وقبل ما مرارتي تتفقع هقول علي كل حاجه مبحبهاش..لو إفتكرتهم يعني :


مبحبش البنت اللي بتتسهوك,والبنت اللي عامله شيخه طول الوقت وإنها مبتغلطش,والبنت اللي علي طول قويه ومبتضعفش..أو العكس..


مبحبش حد يكدب عليا..ومبحبش لما أكتشف إنه بيكدب وأسامحه يفضل يكدب عليا..مبحبش أقوله إني فاقساه وسيباه يخنق نفسه بالحبل وبرضو بيكدب عليا..ومبحبش أقوله إنه غبي عشان مستمر ف كدبه..والأغبياء بيصعبوا عليا..ف مبحبش أقول لحد غبي إنه غبي لأنه مش هيفهم أصلاً.


مبحبش العناوين..مبحبش حد يحصر أي كائن حي ف صفه..
زي ان الدكتور محترم..والنصاب قليل الأدب..ممكن جداً يكون العكس..


مبحبش الست جارتنا اللي بتقعد تبص من ورا السلك ,يا تطلعي يا تدخلي..,ومبحبش الواد إنها اللي أول ما بتمشي بييجي يقف مكانها..مانا ناقصاك أصلي..!


مبحبش السوبر ماركت اللي جنبنا..كل ما أروح أجيب حاجه ألاقي 3..الجد والإبن والحفيد
الجد يقعد يتنحلي ويفتكر شبابه
والإبن مراته مطهقاه ف عيشته ويطلعه عليا ويكلمني بعصبيه
والحفيد مراهق بيحاول يعاكس ومش عارف !


مبحبش أعمل حاجه مش علي مزاجي..ومبحبش الناس لما متصدقش إن مزاجي له أهميه..مبحبش أطاوع نفسي لأن مزاجي هيوديني ف داهيه..ومبحبش أخنق مزاجي لأن الداهيه أرحم بكتييييير .


مبحبش أقول لحد حاجه وأقوله متقولش..يروح يقولها لحد تاني ويقوله متقولش..وحد تاني يقولها لحد تالت ويقوله متقولش..ونبقي كلنا عارفين نفس الحاجه وكلنا مبنقولش..ليه؟لأنها أصلا بتاعتي..!


مبحبش الحاجات اللي بتتسحب.. سواء بشر أو كائنات تانيه,مبحبش الأسد ولو إنه صريح هياكلني ونخلص..مبحبش الأسد عشان هياكلني من غير ما أعمله حاجه..مبحبش الأسد لأنه فاكر نفسه أسد لمجرد إنه.. أسد !


-مبحبش واحده تعمل صاحبتي وهي مش صاحبتي
-مبحبش واحده تعمل صاحبتي وهي مش صاحبتي
للمره التالته
مبحبش واحده تعمل صاحبتي وتلزق لي وأنا وهيا عارفين كويس أوي إننا مش أصحاب..أوك؟


مبحبش حد يتدخل ف خصوصياتي ..


ومبحبش حد كل ما يشوفني يسلم عليا ويضغط بإيده علي صباح إيدي اليمين ويشوف في دبله ولا لأ؟


مبحبش العنف بكل أشكاله..مسموح بس لو كان دفاع عن النفس.


مبحبش أي حد يفتي ف أي حاجه ملوش فيها..


مبحبش الناس اللي بتظيط ف أي حاجه..




مبحبش بعض مدربين التنميه البشريه لما يتحشروا في اللي ملهومش فيه..ومبحبهمش لما يقعدوا يكتبوا كلام متفائل ويحسسوك إن ف الكورس عصايه سحريه هتغير حياتك وهم أصلا جواهم كلاكيع زي كل البشر..هي الدنيا كده..حبه فوق وحبه تحت..واللي يقولك غير كده يبقي متفائل لدرجه العبط..ومبحبش آخد نصيحه من حد محتاج نصيحه..ومبحبش النصايح أصلاً


آه نسيت..
مبحبش حد يشوف أي دموع ف عينيا..
 

مبحبش أتضايق..بس لما أتضايق مبحبش ألاقي أغبياء ف سكتي..بيعصبوني أكتر..:@


مبحبش أتعصب عشان بخبط ف ناس كتير..


طيب..عشان متعصبش أكتر
هخليها أسئله..


ليه سواق المكيروباص بيصدعني بأغاني لمجرد إنها عربيته؟
ليه التباع بيقعد يبص لكل بنت طالعه ونازله؟
وليه بيرخم عليها لو ليها فلوس باقي؟
ليه البنت لما تمشي ف الطريق أيا كان لازم تسمع كلام ..أي كلام وخلاص؟


ليه في ناس بيشوهوا الحقيقه؟دكتور يدخل طب عشان ياخد اللقب..بنت تدخل صيدله عشان تاخد اللقب..حد يكتب هرتله عشان يبقي واد مثقف وكل البنات بتحبه وكل البنات حلوين..و ليه بنت تدخل مجال مش عايزاه لمجرد إنها تحتك برجاله وتتجوز؟


ليه في ناس كتير باردين؟
وليه مبيظهروش غير وقت ما بتعصب؟
وليه بيعصبوني أكتر؟


إزاي واحد يجيله قلب عشان يحقق مصلحته يدوس علي مليون حاجه ف طريقه؟
ليه أصحاب مصالح المليون حاجه دول ساكتين؟


سؤال بيلح عليا بقاله فتره..هو ليه ناس كتير مبقاش عندها دم؟ولو سألت أي حد يقولك أصل هم..؟ولما هم مضايقين هم..وإحنا مضايقنا هم.."هم" دول..يطلعوا مين؟


صحيح..
مبحبش حد يفتكر إني..مبحبش..

كواليس فرح

مكالمه تليفونيه في منتصف الليل من رقم غريب,أتردد في الرد تجنباً لمزيد من المشاكل بعد عناء يوم طويل مليء بإسترجاع الذكريات وأشخاص يبعثون من الماضي,أغلق الهاتف وأستسلم للنوم.

صباحاً,بمجرد أن أعيد تشغيل تليفوني أجد نفس الرقم يعاود الإتصال هذه المره يـُلح,أتشجع لأجيب,إنها صديقتي وجارتي المفضله..أسماء.

مكالمه لم تستغرق سوي دقائق جعلتني أقفز من سريري وأنا أضحك فرحاً وأنتزع قلبي من تجويفه لأغلفه مع باقه ورود حمراء أرسلها لها مع سيل من القبلات..تماماً كلون فستانها الذي إرتدته يوم عقد قرانها.

أسعدتني كثيراً بهذا الخبر ,لدرجه أني تلعثمت في كلامي فقلت لها"كل سنه وإنتي طيبه "بدلاً من "مبروك "! ,كسرت حاله الملل التي أحيا بها من فتره,ما أسعدني هو تتويج قصه حب دامت لست سنوات,من ضفائر المدرسه الثانويه إلي زهره أنوثه ما بعد التخرج.

في منزلها,حفل أسري بسيط,غني بمشاعر الحضور,تجلس في كامل رقتها المعتاده والبريق يقفز من عينيها بكل فرحه,بمجرد أن أدخل تقوم من مكانها وأتوجه إلها نتبادل الأحضان والقبلات,تهمس في أذني بفخر وحب شديد يبدو في نبرات صوتها.."بقيت مراته"


علي سطح المنزل إنطلقت موجه من الأغاني الشعبيه التي أبغضها,أحببتها اليوم من أجل صديقتي.أقف في أحد الأركان وأستمتع بهدوء بسيط بعيد عن مكبرات الصوت وزحام الناس.ألمح "العريس"بالصدفه يهرول بين مكان لآخر,أستوقفه"بتجري ليه يابوحميد؟,ده اليوم يومك"
يجيب مازحاً.."مهو عشان كده" !


يقف في الجانب المقابل ,أنظر يميناً يفعل مثلي,وإن نظرت يساراً يتبعني,أضحك بسخريه وأردد بيني وبين نفسي"أنا ناقص ياخويا !",يرسل لي إبتسامه,أردد مره أخري"ده عبيط باين !"

أمي وأختي جالسين بين الحضور,كلما مررت بينهم ألتقي بصديقه لا تقول سوي"عقبالك" وأبتسم,والدتها تسعي بين الحضور كما يقولون"فاضيه ومشغوله"أحياناً تجلس في هدوء بين أقاربها وأحياناً تشارك إبنتها بالرقص حتي تدمع عينيها وتحتضنها ,تنتهز إحداهن الفرصه لتنزل إلي قلب الحلقه وتخطف الأنظار برقصها المثير غير المتلائم مع الحجاب الطويل الذي ترتديه..يصفق لها الجميع علي مهارتها..!

أخري تهبط إلي جوارها بعد قليل,ترتدي فستان مكشوف الصدر والكتفين,تبدو مثيره جداً ,تهمس لي أختي"دي كانت لابسه إسدال",أراها تنافسها في حركاتها,يحسم الأمر رجل يدخل بينهم..يرقص أفضل منهم !

تشير لي صديقتي إستفساراً عن سبب وقوفي وحدي ,"أنا شكلي بت نكد وأنا مش واخده بالي",أشاركها فرحتها فأقف جوارها ,أقوم بتصويرها كثيراً,ترقص هي بحركات إنسيابيه رقيقه تغطي بها علي تلك المستفزه التي ملّ الحضور من محاولتها لجذب أي شاب بحركات خليعه,وعلي رجال بالأسماء فقط .

سيدتان في جانب يقتربان من بعضهما,يتحدثان بصوت مرتفع عن تكاليف الفرح والمهر والشقه والشبكه وغيره,
إحداهما للأخري:متعرفيش جايبلها شبكه بكام؟
تستفزني ,أرد:وإنتوا مالكوا؟
ترد إحداهن:نعم؟
-إحم..وإنتوا مالكوا قاعدين مش مع المزيكا كده ليه؟هيصوا ,مش وقت رغي ,ده فرح !

سيده في عمر أمي,تهمس في أذني"ماتنزلي ترقصي !",خشيت إحراجها فإكتفيت بإشاره لحجابي ثم قلت"الجو حر", تمط شفتيها إستنكاراً كأنني لست في جمال هيفاء وهبي كي أرفض-أنا فعلاً أرفض أن أكون هيفاء لأنها "مصنوعه"- تنظر لي ثم تدير نظرها عني وتردد"حد طايل " !

في الجانب الآخر,أري حلقه من الشباب منعزلين عن العالم,هم في عالم آخر بالتأكيد بفعل هذا الكم الهائل من الشيشه المحيط بهم,يتوسطها أطباق بها لفافات تبغ وسجائر محشوه.يصيبني الذهول ويبدو أن أحدهم رآني,أدير وجهي بسرعه للجانب النسائي,تقول لي سيده يبدو أنها كانت تتابعني"أيوه ,حشيش,فرح بقي عقبال عندك ! "

أحدهم يعبر أمامي بأكواب من العصير البارد,تذكرته, إنه أخيها الأكبر,يبدو كما رأيته منذ سنوات,كما هو يدخن ويبحث عن عمل ويتطلع لوجهي طويلاً ثم يصمت !,يبتسم ويمد لي يديه بكوب من عصير البرتقال,يرفقها ب"عقبالك",أرد"في حياتك إن شاء الله !"

تمر أمامي سيده شابه ترتدي عباءه سوداء تحمل طفله,تعبر ثم تعود خطوه إلي الوراء ,تتطلع بوجهي ,تتيح للطفله الهروب من ذراعيها فتسقط أرضاً بسبب فستانها الطويل الذي يمنعها من الركض كباقي الأطفال,تعتدل وتنهض لتلعب مع باقي الصغيرات في الحفل ممن يرتدون فساتين طفوليه بريئه,أفيق من متابعه الطفله علي وابل من قبلات السيده التي لا أعرفها حتي تنتبه من ذهولي
-إنتي مش عارفاني ولا إيه؟أنا آيه ..صاحبتك
-معلش مش واخده بالي
-كنا مع بعض ف أولي ثانوي.أيام ما كنتي بترني جرس باب الفصل وتجري وتـ
-آيه حبيبه قلبي,وحشاني ,إيه فينك؟أختك دي مش كده؟
-"تضحك "دي بنتي
-إنتي إتجوزتي؟
-وخلّـفت كمان
أتأملها من أسفل لأعلي ,ملامحها تغيرت كثيراً,لي صديقات متزوجات لكن حالهم لم يتغير كذلك,قبل أن أسألها أجده خلفها يقول بصوت رجولي غير متناسق مع مظهره الضعيف اللائق بالجورنال والبطيخه"ياللا يا أم نسمه" فتستأذن وأشير لها مبتسمه..مع السلامه..يا أم نسمه !

أمي تلاحظ شرودي"بطلي تفكير وهيصي مع صاحبتك"
-صداع,الأغاني بيئه أوي
-فرح يعني..عقبال فرحك,يومها إبقي شغلي الأغاني اللي انتي عايزاها
-"أضحك"..يبقي محدش هييجي !


شيئان يصحباني دوماً في أي مكان,لا أحملهم ولكنهم يسبقوا خطواتي,عقلي وضميري,أحدهم يراها مهزله فيطرح سؤال مـُحيّر:
-تري ما الفرق بينهم الآن, أيهم الراقصه؟العروس أم صديقتها المحجبه أم الراقصه الحقيقيه التي لم تأت؟
-رفقاً,إنها رقصه فرح,,قلوبهم سعيده
-وما دخل أجسادهم بذلك؟
-الجسد مُعبّر عما يدور بداخلهم

يؤنبني ضميري علي مناقشاتي الجانبيه,الأمور لا تسير بالمسطره والمنطق, ردودي غريبه,أحاول الهرب من الحزن للتفكير لكن التفكير يقودني إليه مره أخري ,كلما حاولت التجاهل والإندماج في الفرحه يصفعني شيء جديد,وجدتني أجمع تركيزي وقواي وأتوجه لأسماء قبل ختام الحفل, أشد علي يديها وأقبلها قائله: إنتي أحلي حاجه ف الفرح..مبروك !

عُمر..طاهر

في فتره بوظان الجهاز,كل اللي كان هاممني شويه حاجات من أولها الفيس بوك,الفيس بوك بقي حياه كامله بنعيش جواها وبياخد معظم وقتنا..
اللي كان شاغلني مش حاجات مهمه..لأن الحاجات المهمه بتفضل مهمه مهما طال عليها الزمن ..عشان كده كان شاغلني شويه حاجات عجيبه ..كام واحد عملي تاج ف صوره مليش علاقه بيها؟ كام إعلان وانفيتيشن لكورس تنميه بشريه جالي؟ كام حد إفتكر ان بروفايلي شارع عمومي راح حط لينك إعلان عليه ومشي وكويس إنه مشي قبل ما يصدق إنه شارع وممكن يركن فيه ؟ كام واحد كان فاضي بالليل سهران قام دخل علي صوري وعمل كومنتات من نوعيه"يختي كميله عسل"..,كام رساله سخيفه من جروب أسخف,كام دعوه لجروبات من نوعيه(كلنا لازم نحب بعض لأن الحب ده حاجه عظيمه عظيمه عظيمه).. وخلافه

أول ما الجهاز اتصلح,بعد ما فضلت أيام بعمل غداء وعشاء لأخويا وكل ما أشوفه أضحك ضحكه سيجنال تو.مش لأنه مهندس كمبيوتر,لأ لأنه مهندس الكمبيوتر الوحيد اللي قالي هصلحلك الهارد من غير ما اللي عليه يتمسح,قولت الواد ده أكيد طالعلي..عبقري من يومه..
:d,
المهم ,فتحت الإيميل,9000 رساله منهم 6000 تعليقات علي صور ,وحوالي 2000 دعوات لجروبات وإيفينتات وخلافه..طبعاً كل ده بيتمسح من غير ما أبص فيه أصلاً..ورسايل من ناس بتسأل عليا..وشخص لطيف شاف صور حفله التخرج بتاعتي لقيته بعتلي يقولي ألف مبروك الجواز مش كنتي تعزمينا؟,قولت له دي كانت حفله تخرجي..قالي مهو الجواز تخرج..من الدنيا !

المهم بعد كل الدوشه دي..لقيت 12 رساله فاضلين في الانبوكس من جروب مقالات عمر طاهر
http://www.facebook.com/group.php?gid...

في الأيام العاديه,ستني أقرأ المقال اليومي لعمر طاهر..يا الصبح عشان أبدأ يومي بحاجه لطيفه,,يا بالليل عشان أنهي يومي بحاجه لطيفه..عمر طاهر مش كاتب عادي..وهتعرف ليه..

-أول ما عمر طاهر نزل كتاب ساخر(شكلها باظت,كابتن مصر,وبعده جر ناعم وابن عبد الحميد الترزي وغيرهم) ,ماسوره من الكتاب الشباب اللي نزلوا كتب تحت إسم(ساخر)..تأثراً بعمر طاهر,الغريبه إني عمري ما شوفت كتاب لعمر طاهر مكتوب عليه(ساخر)..الغريبه إن اللي بيقولوا علي نفسهم ب"يسخروا"..بيكتبوا حاجات هي فعلاً تدعو للسخريه..منهم.

-عمر طاهر من الناس اللي وأنا بقرالهم كتاب أو مقال او أي حاجه..
عمري ما حسيت إنه بيستظرف,في ناس كده بتكتب حاجات من نوعيه"مره قنبله وقعت علي قهوه عملت بن"..فاكرين تعبير وش أحمد حلمي ف كده رضا؟..هو ده بالظبط..ويمكن الإستعانه بالإيموشن ده
:|

-رغم خفه دمه الواضحه في الكتابه,هدفه مش إنه يزغزغك بكلام,دايما تضحك ضحكه آخرها تفكير..ممممممم.الراجل ده عايز يقول حاجه,مش الناس اللي عماله تكتب نكت مجمّعه في شكل مقال 3/4قلش ..بيتهيقلي برضو هو ده الفرق بين كوميديا محمد صبحي وكوميديا سمير غانم

-قبل ما أشوفه من خلال صوره علي غلاف جر ناعم.كنت كونت صوره عن الشخص اللي بيكتب ده من خلال كتاباته,,هو شاب مرح,وعارف يخلق ضحكه من وسط النكد,إنسان بيحس باللي حواليه وبيفكر فيهم وعارف إزاي يكلمهم بلغتهم,رغم كل كتاباته الكوميديه والساخره فهو في جزء من الحزن بيحتفظ بيه لنفسه,علاقته بأغاني محمد محي الحزينه ,وحتي لما بيظهره في كتاباته بيسخر منه .دي حاجه بتضحك القاريء..وبتألم الكاتب.

-كاتب من كتر مصداقيته يجبرك إنك تحترمه وتحبه , يعني لما يقولك إقفل التلاجه تقفلها..لما يكتب 100 جمله تنفع ستيتس للفيس بوك ويطلب منك تكتب جنبها إسم المؤلف تكتبه..مش عشان تشهره,.لأ عشان بتحبه.

-علي أغلفه كتبه تلاقي(ألبوم إجتماعي-ألبوم سينمائي-ألبوم..إلخ)..يمكن ده اللي خلي بعض الكتاب الشباب يكتبوا علي أغلفه كتبهم(وطني ساخر-فلسفي ساخر-تاريخي ساخر..ساخر وخلاص.)

-أعترف إني بحب قراءه المقالات الساخره عموماً ,لكن بيفضل عمر طاهر الأفضل..هو الوحيد اللي بيخليني أضحك من قلبي وعقلي مع بعض..بضحك بصوت عالي لدرجه إن ماما تدخل عليا أوضتي وتخرج وتقفل الباب وهي بتتقول "يعوّض عليا عوض الصابرين يارب"

من مقولات عمر طاهر في مقال بعنوان"100 طريقه مصريه للقضاء علي الإكتئاب"

> تخلص من الوزن الزائد والدهون إما بممارسة الرياضة الشاقة (ممكن تروح تسلم لهم نفسك في القسم) أو باستخدام الأدوية (أرشح لك بريل مزيل الدهون العبوة الكبيرة).

> حتي تحمد ربك علي ما أنت فيه تذكر الأشخاص الذين يعيشون من حولك في مأساة مستمرة مثل الشخص اللي اسمه نبيل لكن الناس طول الوقت بيقولوا له يا خالد.

> تخلص من الأفكار القديمة البالية التي تعشش في مخك (اللي يحب مش لازم يستحمل.. .اللي يحب لازم يتعالج).

> حاول أن تشعر الآخرين أنك تقدر جهودهم.. ضع علي باب الشقة ورقة عليها وجه يبتسم وقلب ملون وجملة(عزيزي الزبال.. مش متخيل الحياة من غيرك).

> لا تشتر هدية لطفل ولكن اشتر هدية لشخص مسن ستمنحه أملاً ما يمكنك أن تلاحظه بوضوح.


> صل الفجر في مسجد ستنا السيدة نفيسة ثم مارس بعدها رياضة المشي لمدة نصف ساعة في نسيم الصباح النقي (بس حاول ماتكونش التمشية بتاعتك قريبة من كوبري السيدة عائشة عشان الأتوبيسات بتقع من فوقه في الوقت ده).

وباقي المقال هنا
http://www.facebook.com/topic.php?top...

ولينك الجروب
http://www.facebook.com/topic.php?top...

أو علي موقع جريده الدستور

حقيقي..شكراً لـ عمر طاهر