البنت اللي مليانة ديفوهات Quotes

“أجلس على كرسي و أظل أبحلق في النجوم مغمورة تماما بالدهشة، أفكر أنك لو كنت هنا لمارست معك هوايتي المعتادة في عدها، و متخافش مش هيطلعوا 8 زي مابعدهم كل مرة من شباك البيت التاني.. أراهنك هذه المرة أنهم سيزيدون عن الخمسين لو صبرنا و استكملنا العد.. سننكمش سويا هنا بجانب هذا العمود الصغير، و سننهمك في حصرهم و نضع خطة حتى لا نخطئ، وبعد أن ننتهي سأغني لك أغنية لا أعرفها الآن.. و سأقرصك من أذنك إذا ضحكت من نشاز صوتي..

سنكون أكبر بقليل.. ستأخذ كل الأشياء حجمها الحقيقي و ستكون لحظات الطفولة و البله تمائم للسعادة، لن أشعر معك بالنقص و السبب الوحيد الذي سيدفعني حينها للبكاء في المواصلات هو أنني أغضبتك

عزيزي الذي لن أجده غالباً قبل الأربعين: مستمتعة بالأمل في وجودك.. شكراً”
― ريهام سعيد, البنت اللي مليانة ديفوهات

“- اتشال و اتحط، وبعدين اتشال و اتحط و اتشال و اتحط.. اتهــان!


أحدهم يقول هذه الجملة عن العفش بتاع مكان ما.. نتناقش أنا و صديقتي إن الموضوع ملوش علاقة بالعفش خالص، الواحد من كتر مابيتشال و بيتحط و يتنطور بمشاعره بين الاحتمالات وفلان و علان.. بيُستهلك.. بيتهان... مش هنرسى على بر بقى يارب؟!”
― ريهام سعيد, البنت اللي مليانة ديفوهات

“تشاهد اللقطة مرة و اتنين و تلاتة ثم تضغط على السهم أكثر فتعود بها إلى صورة حبيب قديم، تبتسم له و تبلع غصة في الحلق.. تحاول ألا تفكر كيف قربهما الصراخ في وجه الداخلية ثم أبعدهما بنفس القوة.. كيف حاول أن يخبرها بذوق أن الحب يعني إيجاد ملاذ من هذا الخراب.. أنها شريكته فيه و ليست ملاذه و لا يستطيع تحمل كل هذا طوال الوقت.. لم يفهم هو كيف تنكسر فتاة إذا ما شعرت أنها لا تصلح لدور المأوى.. لا يفهم أحد أن الكوتشي الدبابة و الجينز مدى الحياة لا يعنيان وجود ثلاجة داخلية لتبريد الهم..”
― ريهام سعيد, البنت اللي مليانة ديفوهات

“البنت دي تقدس الناس اللي متعشقين في بعض، اللي مستعدين يدعموا بعض خلال كل الهسس و بيحترموا تفاهات بعض لأقصى حد”
― ريهام سعيد, البنت اللي مليانة ديفوهات

“البنات حلوة، البنات ملكات التفاصيل، صاحبات القلوب اللي أرق من ورق الكلك الخفيف لمّا يتشد ع الأخر ويبقى مش حِمل خبطة، البنات اللي زى سطح الطارة والدُّف، اللمس الخفيف بيطلَّع منهم مزيكا متدلعة، الخبط الجامد بيبوَّظ كل حاجة، والخوازيق بتخرقهم تماماً”
― ريهام سعيد, البنت اللي مليانة ديفوهات

“هتتكشفي قُدام نفسِك إنك طول الوقت بتقرري تلبّسي ناس أتواب مش بتاعتهم.. بتصري إنهم حاجة وهما حاجة تانية.. إنتي بتحبي خيالك أكتر من الجميع
خيالك بيخلق ملايكة وهما بني آدمين.. لحد إمتى هتفضلي أسيرة عشق الملايكة الغير موجودين؟ حلو إنك تقتنعي بالتجربة العملية إن الملايكة ما بتعيش وسطينا”
― ريهام سعيد, البنت اللي مليانة ديفوهات

“واقع: دول صُحاب مُقرَّبين ودول سَنَد ودول ناس ع الهامش
إنعطافة: برجاء إعادة ترتيب التلات جُمَل اللي فاتت وشقلبتهم خالص بقى في حدود مرّة كُل سنة.. وهلمّ جرّا”
― ريهام سعيد, البنت اللي مليانة ديفوهات