حالة ضبابية Quotes

“نفسك تعيش ازاى

الاختيار بإديك

أصل الحياة ألوان

وف فترة الشِدّة

كل الأصول بتبان

لا ضعيف بيظهر قوى

ولا وحش يبأى جبان

ولا يوم. فى لون هيتوه

فى زحمة الألوان


أبيض دا لون قلبك

لون الصفا ف ودّك

لون فرحتك بحياة

مرسومة على أدك


والأحمر أصله الدم

انك تشيل الهم

بس ساعات يتشاف

لون ورد على خدك


وأزرق دا لون السما

يعنى أمل وطموح

يشبه نقاء الروح

لو يوم تكون مجروح

تلاقيه دفا لقلبك


والنبتة لونها أخضر

ودا منبع الأسرار

أصل الحياة والموت

لون عشق للملكوت

ممكن بورقة توت

يستُر ف وَضَح النهار

تشوفه عين ترتاح

وتحبه ويحبك


واسود دا لون الحزن

ودا لون لابد منّه

يوم فرح يوم أحزان

بنخافه مع انّه

دا سيد الألوان


أصل الحياة لوحة

عايشين بنرسمها

فى حاجات بنبنيها

وحاجات بنهدمها

أوقات كتير للفرح

وزيهم للجرح

وساعات تبان غامضة

وساعات بنفهمها

ودا كله حسب اللون

ارسم لنفسك حياة

واختارلها الألوان

شوف اللى هيناسبك

واللى هيضمنلك

انك تعيش انسان

وابأى افتكر دايما

إن الحياة ألوان :)”
― Ahmed Faiad, حالة ضبابية

“الزمن محتاج مُصابرة
واحنا مالناش أى خبرة :(
لما زمنك يحنِى ضَهرك
لما تِلقَى كُسور فـ قلبك
قول ياااارب
تلاقيها جبرة ♥”
― Ahmed Faiad, حالة ضبابية

“لما تتعب من حياتك
والهموم تكتر عليك
والدموع تسكن عنيك
افتكر ان انت ليك
رب مستنيك تروحله
رب يفرح لو تبوحله
باللى تاعبك
واللى قالقك
واللى بتشوفه ف حياتك
اللى جايلك
واللى فاتك
عن ماضيك
عن ذكرياتك
يسمعك لو يوم شيكتله
ويسمعك حتى ف سكاتك
عمره ما يمل حكاياتك
أو يقولك يوم كفاية
رغم إنه بيبأى عارف
كل تفاصيل الحكاية”
― Ahmed Faiad, حالة ضبابية

“أنا أصلا بخاف أحلم

ومين فى الدنيا يوم ماحلمش

وداس الفقر على حلمه

ومااتكلمش

وقرر انه يستسلم

ومااستسلمش

ومااتعلمش

وعاد الحلم من تانى

وداس اليأس على حلمه

وداس الظلم على حلمه

ومات كل الأمل جواه

فـ إنه يعيش ولو حتى بنُص حياة

وأعلن انه مستسلم

ومابيحلمش ..”
― Ahmed Faiad, حالة ضبابية

“قرّرت إنى

لفترة جَاية

عن الحياة

رَاح أختفى :(

هَحضُن فـ نَفسى

والملم الباقى

من الحِلم اللى قرّب ينطفى

واهرب بعيد

هَبعد عن الناس كُلها

وابدأ حَياتى من جديد

واقنع فـ نَفسى

واقولّها

لسّه أجمَل يُوم مَجاش

والحِلم أصلا ماابتداش

عَلشان أقول إنه انتهى

واقنعها إن المُشكلة كَانت أنا :(

عَلشان كدا

قرّرت إنى

أعيشها صح

وكُل حَاجة اتغيّرت فيّا

هَترجع أصلها

هَستنى دُورى فـ الحياة

وهَعيش حَياتى كُل حَاجة فـ وقتها ♥”
― Ahmed Faiad, حالة ضبابية

“الحياة مَالهاش إعادة

يَعنى لو يُوم عَدّى مِنّك

استحالة تلاقى يوم جايلك زيادة

هىّ أيام مَحسُوبَالك

فيها حُبك

فيها حِلمك

فيها راحتك وانشغالك

فيها ياتعيش أمر واقع

أو فى جَنّة

جنة أجمل من خيالك ♥

اوعى قطر العُمر ياخدك

والخُطوط تِكتر فـ وشك

والسنين تفضل تغشك

تقنعك إنك صَغِير

واما ييجى معاد نزولك

تكتشف ان اللى كان باقى فـ حياتك مش كتير

لو هتفرح افرح الفَرح بضمير

والزعل علشان يعدّى

مِحتاجين حبّة إرادة

عيش حياتك كل لحظة كأنها اللحظة الأخيرة

عيشها زى ما فى الكتاب

وافتكر يوم الحساب

واوعى تنسى ان الحياة دى

زى فنجان قهوة جالك

باختيارك تشربه سكر زيادة :)

أو هتفضل طول حياتك قهوتك تشربها سادة”
― Ahmed Faiad, حالة ضبابية

“بعد خصم استحقاقات
تِلت عُمرَك فِــ المَنام
تِلت تانى فِــ الكلام
تكتشف إن اللى باقى
من حياتك مِش كتير
حَبّة مِنّه للسعادة
وزيهم حق العبادة
حبة للفرح الزيادة
وحَبّة منه للآلام
ساعة حُب
وساعة حِلم
ساعة عَدل
وساعة ظُلم
وقت محجوز للطفولة
وقت بتبان فيه الرجولة
ولما بتَعجّز ويبأى
مش باقيلك من حياتك
غير شوية زكريات
رغم أحزانك تحاول
تِصنَع الأفراح عُمُولة
هو دا تِلت الحياة
رغم انه يبان قُصيَّر
افتكر دايما تعيشه
اوعى قطر العمر ياخدك
اوعى تتفاجىء فــ آخرُه
إنه مالهوش ذكرى عندك
وانت مش حاسس لأنك
مااديتوش أى اهتمام”
― Ahmed Faiad, حالة ضبابية

“لمّا السما تمَطّر

والدنيا تتعطّر

بروايح الجنة ♥

وتلاقى فجأة الأمل

بعد أما كان ماشى

حالف لَيستنّى

والحزن يتبَدّل

والدنيا تِتعَدّل

والضحكة على وشّك

مرسومة وكأنها

ألحان بتتغنّى

والأرض م الفرحة

رقصت كما عروسة

والمطرة جَت نَقَشِت

على رجلها الحِنّة

يبأى السما ساعتها

فاتحالك الأبواب

مِستنياك تجرى

تحت المطر وانت

فاتحلها دراعك

بتاخدها بالأحضان ♥

مستنياك علشان

تغسلَّك الأحزان

وترجّعَك تانى

أجمل ما كنت زمان

لما السما تمطّر

والدنيا تتعطّر

بروايح الجنة

ابأى افتكر دايما

تحلم وتتمنى ♥”
― Ahmed Faiad, حالة ضبابية

“كان بيحاول يرسم جنة ♥

مع إنه مايعرفش الجنة دى تطلع ايه

شكلها ايه

مين اللى بيدخلها

وليه !!

بس الأبلة قالتله الجنة

مكان أخضر واسع وجميل

ارسم فيه مامتك وباباك

واخواتك وصُحاب مَدرَستك

وماتنساش الأبلة بتاعتك

ارسم كل اللى انت عايزهم يبقوا معاك ♥

ارسمها ولَوّنها وهاتها معاك بكره وأنا هستناك

رجع البيت يومها وماأكلش

علشان مش قادر يستنى

يبدأ حالا يرسم جنة

أجمل جنة ♥

فتح الشنطة وطلَّع منها

ألوانه وكراسة الرسم

وبدأ يرسم

يرسم نفسه وهو بيلعب ويّا صُحابه

رَسَم الأب

ورَسَم الأم

رسم الأبلة بتاعته وهى

بتشرحله الكلمات فـ كتابه

ورسم دبدوبه وطيارته

وسريره والباب ودولابه

خلص رسم ونام فى الجنة

والصبح فضل ساعة يدور

ع اللون الأخضر

علشان كان نفسه يلونها

زى ما متلونة ف الحلم

وركب أتوبيسه وكان شايل هم الأبلة

لما هتسأله ع التلوين :(

فجأة الدنيا اتقلبت بيهم

شاف الناس عمالة بتجرى شمال ويمين

وملايكة بتاخد أصحابه وطالعين فوق

رايحين فين؟؟

استنونى

خدونى معاكم :(

بص على الكراسة بتاعته

نظرة أخيرة

كانت مش سايعاه الفرحة

أصله أخيرا شاف الجنة

متلونة باللون الأحمر

هو صحيح مش زى الحلم

بس الأبلة هتفرح لما

تشوف جنته بعد التلوين :(

وطلع فوق ويا صحابه

وهو بيضحك

علشان هيشوف لون الجنة

زى ما متلونة فى الحلم

وسابلنا جنة

لونهالنا بلون الدم :(”
― Ahmed Faiad, حالة ضبابية

“يا كُل حَاجَة بتتولد جُوّه القُلوب

سَاعة مَا بنشُوف العُيون وَقت اللُقا

أنا شُوفت عَلشَانكُم شَقَا

وتِعبت يَامَا م الانتِظار

وعِرفت بيكُم أصل فَن المَعشَقَة ♥

لو كان لِى حَق الإختيَار

بَعلنها للناس كُلها

وجع السكوت زمنه انتهى

لو حُبكُم فـِ القَلب قالوا عليه ذُنوب

رَاح أقُولهُم

وبأعلى صُوت

أنا مش هَتُوب ♥”
― Ahmed Faiad, حالة ضبابية

“عَارفة أنا نِفسى فى ايه
عارفة أنا عايش حياتى
ليل نهار بحلم بإيه
نفسى أضُمك بين ايديا
وأحضُنك
وألفّ بيكى الكون بحاله
طَبْ وماله
خايفة ليه
خايفة لـ الناس يعرفوا
اللى ياما شافوه فـ عنيا
طَبْ ياريت
نفسى كل الدنيا تعرف
انك انتى بقيتى ليا
ان أنا اخترتك حَلالى
ان حلم حياتى هو
انى اشوف منك عِيالى
وان حلم ايديا تلمس
فـ الحلال مرة ايديكى
ان عينى حالفة ماتشوفش الحياة إلا بعنيكى
عارفة أنا لو فيا قوة
قوتى دى حماية ليكى
والحَنان ف حياتى لمّا
تحسى دايما ان أنا حنين عليكى
نفسى أصرخ ف الوجود
نفسى ييجى اليوم
وكل الدنيا تعرف
ان حبك عندى فاق كل الحدود
وصل لحالة غريبة أبعد مــ الحياة
حالة أبعد من حياتى ومنتهاه
حالة أقرب للخلود ♥”
― Ahmed Faiad, حالة ضبابية

“ياللى بتسأل ع الدفا
وحشك دفا أيام زمان
وقت الأمان
لما كان لسه الدفا
ماشى يخبط ع البيبان
سنين طويلة
وانت بتدور عليه
ولسه بردو مش لاقيه
اسمعنى بس هقولك ايه
عايز الدفا يرجع دفا
يملى البيوت والأرصفة
عمر الدفا ما كان بالهدوم
ولا بالجيوب
الدفا مكانه الحقيقى فى القلوب <3”
― Ahmed Faiad, حالة ضبابية

“يابَلد مفيش فيكى أمل

إيه العَمَل !!!!!

وكُل حاجة فيكى سُودة مضَلّمة

بيقولوا عنك مُسلِمة

طيب قوليلى ازاى هتبأى مُسلِمة !!!!

بأى عقل وأى دين

وانتى أساسا مش فى بالك

انتى ليه سَايبة عِيالك

عـ الرصيف مِترمّيين !!

هوَّ فيه فـ الدنيا أم

بتسيب عيالها

لما أخ يقتل أخوه !!

وهوّ ناسى إن بينهم دين ودم

والله إنك حاجة هَم :(

دا حتى لمّا قَتَل أخوه

ماعِرفش هوّ قتله ليه

كان فاكر انه بقَتْلُه ليه

هيكون بَطَل

واللى اتقتل

كان نِفسه يعرف ليه اتقتل :(”
― Ahmed Faiad, حالة ضبابية

“ليتَ حُلمَا يأخُذنا بَعيدا عَن الحيَاة~”
― Ahmed Faiad, حالة ضبابية

“كُلُ الأوجَاع قد تُسكِتها الكلِمَات

إلا وَجَع السُكَات :(”
― Ahmed Faiad, حالة ضبابية

“معلش ثوانى لو تسمح
أنا ليا حقيقى طلب عندك
تعرف تفرح
ممكن تضحك
ممكن تَتَفاءل من فضلك :)
الدنيا أكيد صعبة كفاية
ممكن تأذى وممكن تجرح
لكن مع كل الصعوبات دى
ممكن تواجهها بضحكاية
لو كل الدنيا معانداك
بلاش انت تكون واقف ضدك
تعرف تضحك وقت الشدة
تعرف تثبت عــ الضحكة ماتضعفش ف وقت الرِدّة
ممكن تدّى الأحزان ضهرك
وتقابل يومك بالبسمة
ياسلام لو جربنا الفرحة
ياسلام لو مرة نلاقى الناس
أفراحهم بينهم متقاسمة
وقلوبهم راضية ومتسامحة
هنلاقى الدنيا بأت أسهل
حياتنا أكيد هتكون أجمل
خَلّى شِعارك دايما
افرح
اياك تزعل
وان يوم قابلك واحد زعلان
قوله أنا عندى الحل السحرى لكل مشاكلك
تعرف تفرح
ممكن تضحك :)”
― Ahmed Faiad, حالة ضبابية

“أنتَظِرُ دَائما ذَلكَ الصَباح الّذى أفتَح فيهِ عَينى لأرى ابتسَامَتك أمَامى...

أنتَظِرهُ بشدّة”
― Ahmed Faiad, حالة ضبابية

“عِندما يأتى الشِتاء

وأكون وَحدى

تَتَجمع الأحزانُ من حَولى

وتأتينى بكُل الذِكريَات

وأظلُ سَاعاتٍ وسَاعات

ما بينَ يأسٍ أو شَتات ..”
― Ahmed Faiad, حالة ضبابية

“لا أحتَاج لأسْبَاب لكَى أحِبُك ..
أنا أحِبُكِ فَحَسب ♥~”
― Ahmed Faiad, حالة ضبابية

“حِينَ نَلتَقى ..
لا تُقَارنى بَينى وَبَين كِتابَاتى إليكِ
فأنا حِينَها لم أكُن أنظرُ فى عَينَيكِ~”
― Ahmed Faiad, حالة ضبابية

“نِفسى اشوفك مَرة تانية

حتى لو كان فـ المنام

من قريب أو بعيد

المهم انى أشوفك

نِفسى أخطف حتى ثانية

م الزمان ومن المكان

نبأى فيها لوحدنا

نبعد عن الناس كلها

ثانية من قلب الجنان

ثانية نهرب من كُسوفى

ومن كُسوفك

ثانية أكْسَر فيها خوفى

من ظروفى ومن ظروفك

ثانية اقولّك

إن أنا من يوم ما شُوفتِك

كُل حاجة فيا بتقولك بحبك

أوعدِك ..

إنّى أكْسَر كُل حَاجز كان فـ يوم بيناّ فـ ثانية

بس أشوفك مرة تانية ♥”
― Ahmed Faiad, حالة ضبابية

“عُمرك يوم

فكرت بجَد

تصاحِب نَفسَك

تِسمع منها

تفَضفَض ليها

ترمى هُمومَك مَرة عليها

جَايز تِلقَى مَعاها الحَل لكل مَشَاكلك

أصلَها شَكلَك

عَارفة طِباعك

حَافظة مَبادءك

أكتر حَد يحس بوجَعك

ويشيل هَمَّك

وَقت الفَرحة

أكتر منك راح تفرَحلك

جَرّب مَرة تقرب منها

سيبلها فُرصة

تحس فـ وقت انك مِحتاجلها

زى مَاهىّ سَاعات تحتاجلك

هتشُوف فيها حَاجات تثبتلك

إنها أجمَل صاحب مُمكن تِلقاه فـ عُمرك

أصلها نفسك

زى ما هتحسَها هتحسَك

أد ما هتحبَها هتحبَك”
― Ahmed Faiad, حالة ضبابية

“النَهارده بأيتى ليّا

أيوه

دلوقتى انتى ليا ^^

يعنى مِنّى

عَايشة فيّا

انتى أجَمل حَاجة فيّا ♥

النهَارده خَلاص هَقُول

ان أنا حَاسس بإن الدنيا كُلها بين ايديّا

انتى أجَمل نِعمة مُمكن ربنا يوم يدّيهالى

انتى أصَلا حَاجة أجمل من خَيالى ♥

عُمرها ما خَطَرت فـ بالى

أوعدك ان انتى هتكونى فـ حَياتى

حَاجة أجمل من حَياتى نَفسها

مِن نُور عنيّا

هَفضل أدعى ربنا يديمك عَلّيا ♥”
― Ahmed Faiad, حالة ضبابية

“مش مُهم الدنيا عَندى

مش مهم تكون مَعايا فـ يوم

ويوم ألاقيها ضدى

مش هَتِفرق

مش مهم حَياتى دايما تبأى وردى

مش مهم الشُهرة والصيت والغِنَى

مش مُهم الناس ولا مُهمة الظروف

مش مهم الشِعر ولا حتى مهمة الدَندَنة

مش مهم أى حاجة تبتدى بكلمة أنا

إلا لو كانت عَشانِك ♥

حَتى عُمرى

كُل حَاجة تخصنى

كُل حَاجة تهمنى

مش مهم

المهم تكونى جَنبى

فـ كل لحظة من حياتى

لما تبدأ حَاجة فيها بالـ أنا

تنتهى عَلشانِك انتى ♥”
― Ahmed Faiad, حالة ضبابية

“هُوّ عادى !!

لما أشوفِك مرّة جَااية

وأبتدى معاكى الحِكاية

م البداية

زى أول مرة شُوفتك ♥

يعنى عادى !!

إنى أنسى

كُل حَاجة فـ عُمرى قبلِك

وأبتدى أحسِب فـ عُمرى

وأتولد لحظة ما اقابلِك ♥”
― Ahmed Faiad, حالة ضبابية

“كُنتُ دَائماً أظنُ أن احتيَاجى لِحُضن أمى سَيقل عِندمَا أكبُر

وَلكنّى اكتَشَفتُ عِندمَا كَبُرتُ أنّى أحتاجُ إلى حُضنِها أكثر~”
― Ahmed Faiad, حالة ضبابية

“ولكنّى أعدُكَ أن أحْيا على أمَل اللِقاء
فمَهما طالت السنين
وقتلنى الشَوقُ ومَزّقنى الحَنين
يوما ما حَتما سألقاك
وَعِندها لن أفقِدكَ ولن تَفقدنى”
― Ahmed Faiad, حالة ضبابية

“لماذا يعاملوننى كدمية ؟؟

سؤال أتعبنى حقا

ولا أجد له إجابة

لماذا يعاملنى الناس كدمية ?!!

لماذا يتعمدون جرحى

ويسعون دائما إلى إيذائى

ويضغطون

ويضغطون

ولا يشعرون أنى إنسان

أحس كما يحسون

وأتألم كما يتألمون

وتذرف عينى الدموع

وتحرق قلبى آهات الشموع

شموع حياتى

التى تحترق على أيديهم

وهم يصيحون فرحا بانتصارهم

ويشربون نخب الخلاص

خلاصهم من تلك الدمية

التى طالما أرادوا أن يكتبوا نهايتها

لا أعلم لماذا

ماذا جنيت

وما ذنبى

لماذا تتجاهل الدنيا وجودى

وحقى فى السعادة

أليس من حقى السعادة

أليس من حقى الحياة

لم أطلب يوما ان أكون

أغنى الأغنياء

أو أسعد السعداء

لم أطلب شيئا أستحق عليه كل ألوان العذاب

التى لا تتوانى الدنيا فى إغداقها علىّ

كل ماحلمت به

أن تعترف الدنيا بوجودى

وحقى فى الحياة

أن يشعر الناس أنى إنسان

ولست دمية فى أيديهم

إذا أعجبتهم

احتفظوا بها كرمز لانتصارهم

وإذا لم تعجبهم

مزقوها إربا إربا

وتعالت صيحات النشوة

وارتفعت أصوات أقداحهم

حقا

لا أستطيع التحمل أكثر من ذلك

فالجرح قد نزف كثيرا

والقلب أنهكه الصراخ

فلم يعد يحتمل المزيد

فأصبحت أعيش

وقلبى تملؤه الشكوك

أصبحت لا أثق فى الحياة

ولا أثق فى الناس

بل وأشك فى نفسى

فى كونى إنسان

وأى حياة

تلك التى تفتقد لكل معانى الإنسانية

وكل آيات الأمان

أستطيع الآن أن أقول

ولأول مرة فى حياتى

أعرف طريقى وأعرف وجهتى

إنه طريق النهاية

حتما

طريق النهاية

ولا أمل لى فى النجاة

فى هذا الزمان

الذى ضاع فيه معنى الإنسان

وتاه

وخرجت عن قضبانها عجلة الحياة :(”
― Ahmed Faiad, حالة ضبابية

“لا بحلم انى أكون فاندام
ولا أصلا بحب ال Gem
ولا باكل فى KFC
ولا بلبس فى بدل Slim
وبلعب كورة فى الشارع
وبدايق أوى لو قالوا
علشان طولك الفارع
تُقفلِنا جون :(
وأحيانا بكون مجنون
وأمشى بلبس صيفى خفيف
فــ عز البرد
وأحيانا ياخدنى حنينى
وأرجع للرومانسية
وأجيب لخطيبتى صحبة ورد ♥
لا مرة حلمنا بالفيلا
ولا قولنا ال fiat وحشة
نحط فلوسنا فـ Corolla
ياإما فــ Ford
صحيح نفسى أجيب Iphone
ومرة حلمت خير قال ايه
راكب ليموزين :D
لكن هفضل أقول دايما
لا عايزين سلطة ولا عايزين
خزاين مال
ولا فى حد يقدر
يشتري بفلوسه راحة البال ^^
فقرا صحيح
ومش لاقيين
لكن كل اللى عارفينه
وفاهمينه
وعايزينه
سيبونا نعيش كبنى آدمين :)”
― Ahmed Faiad, حالة ضبابية

“اكسَر قيود اليأس

اختار الحياة

ارسم طريقك

لَوّنه

احضن فـ قلبك

طَمّنه ♥

ارسمله جناحات م الفرح

تقدر تشيله

توصّله لبر النجاة

امشى فـ طريق المستحيل

كَحَّل عُيونك بالأمل

لازم هتوصل منتهاه :)”
― Ahmed Faiad, حالة ضبابية