ستوريل Quotes

“أمشي في صمت الشارع المعزول
أمشي في أرض الشارع المبلول
لا سيجاره بتدَفّي
ولا الجيوب بتدَفّي
شوقي إليكي يبان فـ رعشِة كفّي
شوقي إليكي يبان فـ دخاني
حزين
والحزن أوقات يبقى مش إنساني
الحزن أوقات يبقى حزن طموح
بيجَرّح العين والفؤاد والروح”
― Khaled Selem, ستوريل

“النهارده الصبح قرّر يحدِف الطوبه فـ إزاز الدنيا
يكسَر كِبرَها..
يلوي رْقبتها عشان تبص بعين رحيمه شويه
ع الناس اللي كاتباهم على الهامش
أسامي ( بدون أهميه )..”
― Khaled Selem, ستوريل

“- حلوه مصر؟..

مش هارد بـ آه و لأ
هاقول : مانيش عارف.. لَكِنّي بحبّها
علشانها شبهِك..

- خدت إيه من مصر؟

إسمي..
كفايه إسمي
وأرض ما زرعهاش أبويا
بناها بالطوب..
والقمر على سطح جامع
وانتي طبعاً...

| كُنت بكدِب |

كنت عايز أقول : ماخدتش مِنْها غيرِك
بس فلسِفت الإجابه
عشان أبان راسي و تقيل ....”
― Khaled Selem, ستوريل

“وعرفت حكمة ربنا في خلقِنا من طيب
لما لاقيت الدمع بَوِّشني!”
― Khaled Selem, ستوريل

“مش شرط تكون جوّه الأحداث
علشان يتقال حاسس بالناس
مش شرط..

مش شرط تطولَك شَظْيَه ف حرب
أو يلمس جسمك ضرب
مش شرط تعاني..

لكن يِكفي إن الواحد مِنّا يكون حاسس بالتاني
يكون فاكرُه ف دَعاويه وصَلاتُه..
ويراعي هزيمة اخوه الإنسان.. ف انتصاراته
ويفرح على قدّه..”
― Khaled Selem, ستوريل

“كلمة: معلش.. كفايه
- لا هْيْ بتقدم.. ولا بتأخّر -
لكن.. يِكفي انها بتحسسني ان انت معايا

وإنك.. يا بعيد عني بلاد وبحور
مش ناسي أخوك المظلوم المقهور
وبتتألّم علشانُه..”
― Khaled Selem, ستوريل

“رفَضِتنا بلدنا...
ورفَضِتنا المطارات...
والعالم طَفّى النور.. وضَرَب صواريخ فـ الجو.. وغنّى
من غير ما يبُص على الركن المرميين فيه انا وانت وأحزاننا
من غير ما يقول - بعزومه - تعالوا احتفلوا معانا
أو حتى بعَطف «الچنتلمان» يسحَب منديل من جيبه
عشان نسمح بيه بُكانا”
― Khaled Selem, ستوريل