الشاعر شرقاوى

“ليه تهدموني وأنا لعزكم باني
ده انا اللي فوق جسمكم
قطني وكتاني
عيلتي ف يوم دفنتي
ملقتش أكفاني
حتى ف آسية وأنا
راحل وسايبكم”
― بيرم التونسي

“و فى السما رب للطاغين يوريهم
لما ياخدهم على بغته و أخده أليم
إذا حكم ربنا عاللى طغا بالحد
يعمى بصيرته و يجعل له المسالك سد
و يضحك الناس عليه يوم الوقار و الجد”
― بيرم التونسي, المجموعة الكاملة لشاعر الشعب: بيرم التونسي

“الأولة في الغرام و الحب شبكوني
و الثانية بالامتثال و الصبر أمروني
و الثالثة من غير معاد راحوا و فاتوني
الأولة في الغرام و الحب شبكوني
بنظرة عين
و الثانية بالامتثال و الصبر أمروني
و أجيبه منين
و الثالثة من غير معاد راحوا و فاتوني
قولوالي فين
الأولة في الغرام و الحب شبكوني
بنظرة عين قادت لهيبي
و الثانية بالامتثال و الصبر أمروني
و أجيبه منين احتار طبيبي
و الثالثة من غير معاد راحوا و فاتوني
قولوالي فين سافر حبيبي
سافر في يوم ما واعدني
على الوصال و عاهدني
و كان وصاله وداع
من بعد طول امتناع
حطيت على القلب ايدي
و انا بودع وحيدي
و أقول يا عين اسعفيني
و ابكي و بالدمع جودي
من يوم ما سافر حبيبي
و انا بداوي جروحي
اتاري في يوم وداعه
ودعت قلبي و روحي
طالت عليّ الليالي
و انت يا روحي انت
لا قلت لي فين مكانك
و لا حترجع لي امتى
الأولة في الغرام و الحب شبكوني
بنظرة عين
و الثانية بالامتثال و الصبر أمروني
و أجيبه منين
و الثالثة من غير معاد راحوا و فاتوني
قولوالي فين
الأولة وقادت و السبب نظرة
و الثانية ما طلت غير الصبر و الحسرة
و الثالثة انا اللّي جرى لي عمره ما يجرى
سافر حبيبي .......”
― بيرم التونسي

“م المستحيل إنت تخدع أي طفل صغير
و تلف عقله و تعطيه القليل بكتير
لكن بأهون طريقه تخدع الجماهير
لو كنت أغبى غبي تجري وراك و تسير
* * *
خليل يصقَّف, يصقف شعب ويا خليل
من غير ما يسأل عن الأسباب والتفاصيل
* * *
و حمار يغني, وجايب من يقول له: آه
حالاً تقول الخلايق كلها ويّاه
* * *
الحق يخفى وفي وسط الزحام ينداس
وناس في فهم الحقيقه, تتكل على ناس
ويساعدك الحظ ياللي تحسن التجعير”
― بيرم التونسي, المجموعة الكاملة لشاعر الشعب: بيرم التونسي