“حبلت الأيام سنين
ولدت الأيام دهور
دامت الأيام لمين
وحدوا المولى الغفور
صلّي ع الّي في القيامة يشفعك
واصحى يالّي نمت من الّي بيوجعك
واكشف الّي بيؤلمك وبيمنعك
قول يا جارة
قول يا جار
مهما طال الليل وجار
كل جرم وله مدار
والكواكب دوّارين
وحدوه يا مؤمنين
صحي نومك ياسطى فكري يالّي ناسي
هلّْ يومك ياسطى مرسي يالّي راسي
يا حبايب مصر يا أهلي يا ناسي
الّي يعشق بالسهر حتماً يقاسي
اصحى يا نايم كفاية
وحد الإنسان معايا
طالت الليل الرحايا
والحدادي قلقانين
وحدوه يا مؤمنين
*********************
يالّي صاحيين في البيوت
يالّي كاشفين المكان
يالّي سامعين السكوت
يالّي واعيين للزمان
استعدوا للقيام
واقبلوا مني الكلام
مصر نايمة من سنين
وحدوه يا مؤمنين

أحمد فؤاد نجم - المسحراتي”