د.احمد عنتر

“الشارع بيتنا و غنوتنا
و الشارع اعظمها مغني
من لحن الشارع كلمتنا
على لحن الشارع
بنغني
و ان جعنا شبعنا
بتتقضى
ما نبعش الكلمة بميت فضه
و الصوت الشايل غنوتنا
بتراب الشارع متحني
هو احنا كده
و حنبقى كده
ماشيين عارفين
مع مين على مين
دايما واضحين
مش بين دا ودا”
― أحمد فؤاد نجم

“بشوف الصقر فارد في الفضا باعه
وأتباعه
نشرهم ع الشجر ضاعوا
طيور تانيين
صغار مساكين
جواعى لكين
دوام صاحيين
ومش قادرين لأطماعه
عشان نابه ومخلابه
ومنقاره
باشوف الكل أحبابه
وسمّاره
ودنيا تخاف من القوة
وجوّ الدنيا مش هوَّ
واشوف بليل
غريب في الدوح!
بيرقص
رقصة المدبوح
بهفّة ريش
سقط عشه
حيشكي لمين
وفين حيروح
وادي له سنين
على دا الحال
يقاسي الحلو والبطال
يا صياد الطيور يا خال
يا صياد الطيور حافظ على الخرطوش
دا ميت عصفور كمان زيّي
ما يستاهلوش
هناك الصقر
لو تضرب على وكره
تلاقي اللحم متكوّم
ولا بياكلوش
يا صياد الطيور فكَّر
وشوف لك صيد
يكون أكبر.

(شال الهوى) - القاهرة - 1963”
― أحمد فؤاد نجم, أحمد فؤاد نجم: الأعمال الشعرية الكاملة

“شيد قصورك

شيد قصورك ع المزارع من كدنا و عمل ايدينا ..
و الخمارات جنب المصانع و السجن مطرح الجنينة ..
و اطلق كلابك في الشوارع و اقفل زنازينك علينا ..
و قل نومنا في المضاجع .. آدي احنا نمنا ما اشتهينا ..
و اتقل علينا بالمواجع .. احنا اتوجعنا و اكتفينا ..
و عرفنا مين سبب جراحنا و عرفنا روحنا و التقينا ..
عمال و فلاحين و طلبة .. دقت ساعتنا و ابتدينا ..
نسلك طريق مالوهش راجع ..و النصر قرب من عنينا..
النصر اقرب من ايدينا ..”
― أحمد فؤاد نجم, أحمد فؤاد نجم: الأعمال الشعرية الكاملة

“مات
بس فات للأمل
فوق الطريق علامات
لو سا عليها العمل
طول الطريق بثبات
تهدي الغريب سكته
وتقرب المسافات”
― أحمد فؤاد نجم, أحمد فؤاد نجم: الأعمال الشعرية الكاملة