“خەتات فەرموو کە خۆشە چین و ماچین
کە ناچین، لێرە خۆشەچینی ماچین

برۆت ھەر چین و پەرچەم چین لەسەر چین
ئەمەندە چینە، قوربان، پێم بڵێ چین؟!

شکافێکە کڵافەی نافی زوڵفت
دەڕێژێ میسک و عەنبەر لێرە تا چین

لەسەر بەرگی گوڵێکی باغی حوسنت
ھەزار، گوڵچینی بێبەرگ و نەواچین!

ئەتۆ میھری و مەھڕوویان ستارەن
لە خزمەت شەوقی تۆدا شەوچرا چین؟!

ھەموو زەڕڕاتی میھری ڕووتە با قین
خودامان بۆ بەقایە لێرە لاچین!

بڵێ نالی بە ئەربابی وەفا: بێن
ھەموو موحتاجی خاک و بێڵ و پاچین”