“(ملفّ المستنقع)

- ننعي لكل مشاهدينّا آسِفين
شاعر كتب عشرين ديوان
في المكتبات متستّفين
- ديّر يا ابني..
- إمبارح الكوكب طلع برّه المدار
علشان يشيّع رُوح شاعرنا
اللي اسمه أشهر م الدولار
- ديّر يا ابني..
- الإعلانات مش عايزة تطلع
حزنها مأثّر عليها
والضيفة منديلها الحرير
مش راضي ينزل عن عينيها
- ديّر يا ابني..
- طب قل لي أجيب لك إيه يابا
قنوات الوصلة بتتغابى
والكلّ على الشاعر بينوح!
- ديّر ديّر..
- وما فيش كلام
نقدر نقولهولكو فْ وداعه
غير كلامه
(كلمتين يمكن يكونوا
هــمّ آخـــر كــلـمـتــيــن
السـعــادة صــحـن فـتّـة
نــايمة فـوقــه فـرخـتين)
- الله ع الشاعر ده يا ابني
ده كلامه الجـامد جوّعـني
قل لامّك تعمل زيّ ما قال..”