“(حكاية ثورة)

(1)
جعان مرَّة
قعد بالليل
قصاد البحر
متحيَّرْ
وشاف البدر بينوَّرْ
ففكَّرْ
إنه عيش كايزرْ!
ومدّ صوابعه
شبّ
وبين سفا صدره
بيعوي القلب
والنسمة بقت إعصار
في لحظة هبّ
شاله لحدّ ما لمست صوابعه النور
قطم حتة
فكان هيطير
من الفرحة
وطار فعلًا
وقال شكرًا
فقال له بدرنا: صحة!
وفي الآخر رجع من رحلته فرحان
وبات فوق الرصيف
شبعان!
(2)
خبر عاجل
خسوف البدر مش جزئي
ولا كامل
خبير الرصد شاف البدر
متَّاكل!
(3)
وع الفيس بوك كان الألش
ما بيهمدش
شوية يقولوا: يبقى الليل
مجرَّد ضهر للآي فون!
وأصوات عاقلة قالت: إللي يقطم م القمر حتَّة
دا يعمل أي شيء في الكون
(4)
وقام الشعب بالثورة
بدون قائد
سوى الفكرة
وقطَّع دفتر امبارح
وقال: الذل كان ذكرى
هنحرقها
عشان نضمن تكون بكرة
بلاد الأهرامات
حرة
(5)
نظام القزم عوِّدنا
لو استفرد بشيء هايل
يشيل من جوهره المعنى
فيتشوِّه
وثورتنا اتغسلنا من مطر نورها
وجه مجلس
أشاع إنه (حمى) الثورة
ومين جوزها؟!
سؤال ما لهوش ولا أْجابة
وجه إخوان
صدق فيهم كلام ماركس
وماركس قال:
(لقينا فْ كل ثورة إن ممكن كل شيء في الدنيا يتغير ويفضل ثابت الإنسان)!
فهل ممكن يخيب ظنه؟
سؤال ما لهوش ولا أْجابة
حياتنا عتمة كدَّابة
بتخدعنا
وتضحك لمَّا تسمعنا
بنسأل: هوَّ فين الباب؟
(6)
بتجمعنا الليالي الدافية
والباردة
ونستنَّى القمر يكمل
ما فيش فايدة
في كل تمام
نشوف البدر مش دايرة
فبيفكَّرنا بالثورة”