“شاف الزبيبة فْ أورتي قال:
مبروك عليك وشم الإيمان
فضحكت زيّ المؤمنين!
دا انا كلّ جامع في البلد
باصم في سجّاده الجبين!
وبسرعة قبل ما ينتبه
غلِّفت وشِّي بمتر من تقوى ووقار
لا يشوف رموشي وهيَّ بتنقَّط
وميض الاشتغالة!
وبكام عصب
كربجت شيش أوضتي ف خيالي
فاندلق
منُّه آلاف الڤيديوهات
هند الخطيب
هالة وحنان
أمّ ابراهيم
صرَّخ: حرام!
الذنب ذنبك..
إنتَ اللي ساجد ليل نهار فوق ضلفتي
مستنِّي أفلام الغسيل
الذنب ذنبك..
بتبصّ مستنظر يبوس أرضية البلكونة
مشبك!
وشريحة الجلد اللي ماتت تُعتبر
قـُربان بسيط
لإلهة الرُّوب الحرير!
كشّ الوقار
وسمعت فجأة: الله أكبر..
بعدها: المسجد قريِّب بعد شارع.. خطوتين
مطِّيت وقاري وقلت له:
شارع يا راجل؟!
سبنا إيه للعب العيال؟!
أنا غيِّتي مسجد بعيد
يملا لي مِ الحسنات
شوَال!”