“(مشهد النهاية)

شالت إيديها من الكفن
واتديــَّرِت
واتغيَّرِت فجأة وبَقِت
مخلوق عسير إني اوصفه!
بصِّت لي بـالوجه الحَسَن
واتبسِّمِت
فنسيت ملامحها القديمة كلها
ولقيت صوابِع رجلي بتقربلها
قلبي اترعش
رَجَفَان أذِينِي يكونش دَوَّة
ولَّا إِيه؟!
ما ادِّيتلهوش أي اهتمام
مدِّيت جسور الابتسام
كملت ناحيتها الطريق
ورميت عيوني فْ كفها
وْرقّيت شفايفي
هي أشطر في النظر!
وقعدت افصَّل
من كلام العشق
فستان
لونه يِشبِه جلدها
طرَّزْت كمُّه بْكلمتين
(رُوحِي فِدَاكِ)
وكأنها مستنياهم
فصَّصِت (رُوحِي)
وانا مَعمِي عن الدنيا
ومش قادر أحسّ
إلا بحاجة واحدة بسّ
إيدها اللي بتحوطني بالكفن اللي داب
من كتر الاستعمال!”