“(خلـَّص ورقك)

ستَّات بدقون!
وحاجات تانية
وعيون هايجة
شفطتني أوضتهم بالعافية
وقالولي بلمسِةْ
لأ
بوكسين سخريَّة
- خلص ورقك!
- إيه المطلوب؟
- طابع أخضر
ورقة بمِيَّة
- وإزازة ريق..
- إيه؟!
- لأ دِه ليَّه..
ماهو ساعة الخوف
الرِّيق أوِّل حاجة بتهرب
- هتلاقي شويَّة فْ وشّ مدام فتحيَّة
غمزت لي وشاورت لي بإيدها زيّ الـ (فـَعْلُن)
هربوا عْنَيـَّه!
مدامات..
مدامات في كراسي
وعَ الحيطة
وفْ حرف الباب والأرضيَّة!
مدامات بيناموا فْ حضن فحول
والليل سيديهاتو بْدَهْ تِشهد
وانا قلبي بتول..
لو رِمْيـــِتْ له (فــَعْلُن) بصَّة
يقلب على طول علبة صلصَة!
- خلَّص ورقك!
صحِّيت محفظتي
فلقيت معدتها بتقلـِّد طائر النهضة!
شهقت نضَّارتي
فقالت لي واحدة من المدامات:
- محفظتك وصلت سن اليأس
وانا عندي من جوزي وحوش!
والطابع الاخضر.. دبلان
والهجرة بتغري اللي يعيش
- طب والحلّ؟
- خلَّص ورقك!
بطريقة
خلِّيها عليَّه..
قامت والكل معاها..
شفايفها المعووجَة بتقول:
- كل الأوراق بتخلصها ورقة بميَّة
نمضي عْليها
لو غابت..
تبقى انتَ مكانها!
ساحت م الرَّهبة رجليَّه
وفرمني ترام الدُّوخة رايح جايّ
وعرف ورقي
إنـّه عْشان يخلص
لازم تمضي عْليَّ المدامات!”