“(فاضل لي جنيه يا صاحبي)

الخوف
ماهوش ضلمة ورياح
وتابوت قديم
من صوت صرير بابه اتولد
مصَّاص دماء
ولا غيمة عمَّالة بتتسحَّب
عشان تهجم وتتحرَّش
ببدر بيرتجف
ولا هوَّ مذؤوب جوَّه غابة بيستخبَّى
أو مقابر طالعة منها
ألف جثَّة اتحللت
الخوف - حقيقي - ماهوش كدا
الخوف.. زقاق
مليان حيطان
دايبة فْ حيطان
صوت
مهرجان
بيهزّ تكتك إنتَ راكبُه
وسايقه طفل
وطفل أصغر منُّه جنبُه
وْعُقدة من دخَّان سجاير
حالفة تشنق كلّ إحساس بالسَّكينة
كان في قلبك
أو تكبُّه
في المجاري اللي اتنقش في ودانها
من ما اعرفش كام
(سِفر الخروج)!
الخوف بروج
مش عالية
لكن غوَّطِت بجذورها
في الأصل اللي منُّه اتفرّع الإنسان
وأصناف القرود!
ركِّز قوي
ركِّزت؟
طيِّب.. قل لي
إيه بيخلي قلبك من شكارة الخوف يعبِّي؟
جملة: The rise of vampires
ولَّا: فاضل لي جنيه يا صاحبي؟!”