“سحر التناقض

طبعك يا عزة بينتمي
للعقل ولّا للجنون
لو شفتي في البلكونة وشّي بتهربي
وبترجعي
والشعر نايم في الإشارب
والرجل سايحة في الڤيزون!
طبعك غريب
بيخلّي حيرتي تذلني
في مجمّع الكتاتيب
ما اعرفش ليه
غاوية بكلامك تحضني
كلّ الولاد السعرانين
وبضحكتك
بتهدّي في المرّيخ جبال
وانْ مدّ واحد إيده ليكي
عشان يدوق طعم السلام
بتقولي: آسفة. عشان حرام!
متديّنة
الضُّهر صوته بيقطفك
من بين دهاليز الولاد
فتروحي أوضة قريّبة
بابها العجوز دايمًا موارب
وتقولي لاصحابك: بليز ما تقرَّبوش
وفْ يوم ضحكتي لمّا واحد عرّفِك
إنـّك تملّي تصلّي باصّة للجدار
والقبلة مدهونة في ضهر الباب!
طبعك شنق منطق أرسطوطاليس
الشيء وعكسه مسفلتين
ميادين في قلبك
بسّ للتخميس
وانا آخري ع الأوّل باسوق
شايف عينيكِ إشارة خضرا
وْكلّ رمش طريق
وانا زيّ غيري في السباق
أشباح خسارتي منشّنة عليّ بْغباء
مدفع فطر عشرين رغيف خرطوش
حالف ليعمل مذبحة عشاق
وما فيش أمل
سحر التناقض جوّة عزة
حاميه 200 مليون حجاب
والشوق عذاب
الشمس يوميًّا تقلـِّد طبعها
بترشّ نورها وحرها
وتخبّي ماسة قلبها م المعجبين
وانا حظي عارفه فْ حب عزة
وْكل صاحـباتها فْ كافيه الكون
مهما اجتـهدت فْ رسم وشّي فْ قلبها ومهما شِقيت
هتشيله آخر اليوم
- مؤكّد زيّ غيره -
بالسويت!”