“كشَّرْ وإلَّا!

من يوم ميلاده لحدّ آخر يوم
في حلمه
مادد لكل عيون قرايبه الـ(هوموسِپيان)
بنبونيرة ضحكته
فاستضعفوه فْ كلّ المطارح
لكنه ما استسلمش
حطّ لذلـُّهم
حاجز من الألماظ بيعزف للوجود
بَشْرَف تسامُح
إنسان جميل
عُمرُه ما أجَّر بالغضب طوبة
يرجَّع حقُّه بيها
زيّ ما بيعمل زمايله المطحونين
دايمًا بيخلق للبشر
أعذار بتخضع للقيامة
العالم استشعر خطر
أصل الحزين
الضحكة بتقول له انّ حُزنه ولا الهَوا
والعُرف قال انّ الحياة
غاوية قوي تأزأز هموم!
طب والعمل؟!
جابت إدارة الكون صاحبنا المُبتسم
حطّوه فْ مخالب محكمة
عرضُم ملفُّه
صفحة واحدة بتبتدي بـْـ (من يوم ميلاده لحدّ آخر يوم في حلمُه)
راجعُوها مرة ومرتين
بيفكَّروا في عقاب مُناسب
بعد انتظار
لمعِتْ في قلب المحكمة
همسة
وطارت في الحُضور
ماحدفش طوبة
مـــا حدفـــش طـــوبة
مـــا حــدفــش طــوبـــة
وفْ لحظتين
الحُكم زلزل قلب آيل للسقوط
بالحبس جُوَّه
بيت إزاز!”