“عبد الضَّارّ

من كتر ما بامشي جنب الحيط
جاكتي بقى زيّ لسان سوَّاق مشروع !
وصوابعي ازرقـِّتْ من شبشب
بيلفّ سجاير تعذيب
متْسلَّح بيه
شيخ الزاوية الفاضل
عبد الضارّ
أوِّل ما يشوفني باعوم في تراب الحيطة
يزغُر لي
ويحاول يطفي حياتي بكل جنون!
وبيقرف لو لمست إيده
جلدي
وانا باهرب م الهجمات!
مع إنّ حبيبتي بتقول لي وديلها بيمسحني:
جلدك مرمر!
فاتغرّ لغاية ما الشبشب يبدأ تصفير!
مش عارف أهرب فين تاني
جدران الزاوية
كاشفاني
والزاوية يَدُوب يتمرجح فيها
شبشب عبد الضارّ
فكرت كتير
وانا باصص في المحراب
بعد التفكير
قرَّرت أعشِّش في الشدة الموجودة
فوق كلمة (ألله)
شدة كبيرة.. بجيبين
واحد ليَّ وواحد لخطيبتي
ونقلنا هناك وانا مطَّمِّن
الله مش ربّ الإنسان بسّ
الله رب الإنسان والبرص
عدِّت أيام
واحنا بندلِّك أعصابنا بشهد الرَّوَقان
وحبيبتي باضت في اللام
عشرين بيضة
وخلاص
نظرات عبد الضارّ انكسرت
وما عادش بيمسك لي الشبشب
لكنِّي قلقت فْ يوم
من ضحكة ف وشُّه تجيب.. تيفود!
بصِّيت في إيديه
ما لقيتش سلاحه المعتاد
بسّ الدخَّان الابيض عرَّفني
وهوَّ بيحاصر (ألله)
إنّ الجبار الظالم عبد الضارّ
قرَّر يحاربني بالبـِيرِسول !”