“صنعة لطافة
___________
بخفة و ظرافة
و صنعة لطافة
ساعة الجد
يفلت
يسلت ايديه
م الأمر برمته

ولواحد طيب ف حاله
العمة يلبسه

بحبة ألاطة
و سبكة عياقة
و رشة شياكة
عليه يضحك
و أونطة يأكله

البساط من تحته
فى لمحة يشدة
بشطارةو حرفنة
و شوية حركنة
هو هذا و ديه طريقته
بالفهلوه مشهور مع طيبته
مَثله سبقه و فضحها
عيط ضربه
و سَبقْ الشكوى

يشحت علموه
على البيبان
سبقوا و فاتوه

ساعات يَحوّر
و عليك يَدَور
يلف يدور
و الآيه تتعكس
و الموقف عليك
بشطارته يقلبه
وبخفة و حداقة
و هى هياها
صنعة اللطافة
بكلمة يسنجفك
وكل اللى عندك
منك بسلاسة
لحكيه يدحلبك
و كل المخبى
منك يستدرجه

و أى شئ يعوزه
بمهارة يطلعه
أى قصة سهل
فى إيده تتعرف
متخدش غلوة
فى إيده تتستوى

من غير ما تشعر
كله يعرفه
دى مهارة صحيح
و خفة
صنايعى معتبر
فى الصنعة مية مية
حرفية عالية
شقاوة و حرفنة

و كتير بيقدر
الممنوع يعمله
من غير ما حد
لحاله يعوى وينتبه
عليك الدور بشدة
يسبك و يرسمه
يتشحتف و يبكى
و المُحن بيتفرش

دى شطارة و مَعلَمة
ف لحظة عليك بيضحك
و إتفاق القعدة
ترابيزته فى ثانية
فوقك بتتقلب
و الأمر يتعكس

بخفة يد
و مهارة معفرته
عفريت
كحل عينك منك
بسهولة يسلته
يقولك دى حاجة
بالشئ الفلانى
مفيدة و قيمة
بجزيل المعانى
و رحمة جيرانى
دى حاجة كويسة
تلاقها خرج بيت
و حاجة مأندلة
ولا فرز تانى
بسلوك متقفلة
يطلع أنانى
ولا ف شئ فولانى
ولا حاجة تطمنك
هَو واه كده ع طول
على فكره
أوعى تصدق
إنه فى ريحنا
أو فعله
حاجة تفرحنا
ديا طباعه
ف الروح و الدم
و الزمار نغمته يعزفها
حتى لو بيموت على فكرة

نوفمبر 2014
من ديوانى ‫#‏وصلة_روح‬
‫#‏فاطمة_عبدالله‬
‫#‏زهراء_موئل‬”