“لو الولد حب بنت من حقه يروح يصارحها بحبه.. من حقه يتشاقى ويلّمح بنظرة، بكلمة، برسالة على الموبايل أو على الفيس بوك، بصورة ممكن يعملها (شير) ويحطها (تاج) فيها، كل ده من غير ما حد ينتقده أو يقلل منه، لكن البنت يوم ما تحب ولد أو تعجب بيه بتعيش في رعب..

رعب إن حد من اللي حواليها يلاحظ نظراتها ويكتشف إنها بتحب وكأن الحب عيب!

رعب إن زمايلها في الجامعة أو الشغل يفهموا إنها معجبة بفلان فتتعمل عليها حفلة نميمة والكل يقطع في فروتها أو يعايروها إنها معجبة بواحد مش حاسس بيها وكأنها شتيمة..

ولو بلعت حبايتين شجاعة وما همهاش كلام الناس وقررت تلمح له، بتبقى كارثة لو طلع غبي وما فهمش التلميح، أو عمل عبيط عشان مفيش جواه مشاعر أو شيء إيجابي ناحيتها..

ساعتها البنت بتقع في حيرة وعذاب.. وتقول بينها وبين نفسها بكل تفاؤل: " هار إسود.. شكلي كده هعيش أيام سودة!! "

لا يا حبيبتي ما تخافيش..

بابا حبيبك مش هيسمح لمخلوق يكسرك أو يعذبك، وهيقف جنبك لحد ما نوصل لبر الأمان، وعندي خطة بكده كمان!

تابعوا الباقي في كتاب #حبيبة_قلب_بابا
#هواجس_أب_خايف_بنته_تكبر_ما_تلاقيهوش
#تأليف_شريف_عبدالهادي”