“كتاب
عالرف واقف لوحده متجهم
بيقولي عتاب
على عذاب ما يستاهلوش
ذنب ماعملهوش
لانه في يوم حضن
جواب
منك
الجواب الوردي
اللي جوة الكتاب
اللي فضلت صفحاته بيضا
من غير كلمات
ماكنش فيه اللي يتقرا
غير اللي جرى
في قلبي لما قريت الجواب
ماكنش في الكتاب
غير خطوط تحت كل كلمة بحبك
قالها بطل لبطلة
ماكنش في جثة
مشاعر ماتت
لما اديتهالي بحساب
ولا كان في قايمة باسباب
مفروض تكون موجودة
عشان تفضل تحبني
ترددك فينا فضل
سؤال متساب
والجواب فضل في مكانه
سراب
لان حبنا راح
وذكرياتنا هاجرت
والجواب اتقطع
وفضلت كلمة بحبك تحتيها خط
واقفة بالعرض
في الوش المتجهم
بتاع الكتاب”