“قابل شهيد الثورة ف الآخرة… شهيد الحرب

قالّه يا بختك يا أخي …. عارف بتضرب مين

أنا مُت معرفشي.... كان جاي منين الضرب

كل اللي كانوا هناك شبهي و مصريين

أنا و إنتا مُتنا صحيح....علشان بلدنا تعيش

وانا و إنتا مُتنا صحيح...شجعان...وبنقاتل

أنا جيت هنا علشان...إيدي ما طاوعتنيش أقتل

وانتا عشان…أبطأ من القاتل

إنتا الجميع خلفك.... من ناس و من سلطة

وانا الجميع خلفي...من جيش و من شرطة

إنتا شهيد رسمي.. وانا لسة فيا كلام

دمك بيسقي الأرض .. وانا دمي للحُكّام

يظهر وراهم نور .. فيبصوا فوق ع الضوء

يملا السما ملاكين .. و يقربّوا منهم

و ف أول الرحلة .. الطالعة بيهم فوق

بدأوا كلام... قام دار ..هذا الحوار...بينهم

.....

قال الشهيد للشهيد ف السما الأولى

الطلقة مش طايشة... و الدولة مسئولة

قال الشهيد للشهيد ف السما التانية

الأرض طبّت جنبي مقتولة

قال الشهيد للشهيد ف السما التالتة

الحظ جابنا ...و احنا مش فَلتة

قال الشهيد للشهيد ف السما الرابعة

الدم حيروح فين ... الدايرة مقفولة

قال الشهيد للشهيد ف السما الخامسة

الأرض دي ..متبوعة مش تابعة

لو كان دَعَاكوا نزول وانا لسة وسطيكوا

يبقي ف غيابي تنزلوا ادعى

قال الشهيد للشهيد ف السما السادسة

مين كان من الانبيا مش قلة مندسة؟

و حكي الشهيد للشهيد م السما السابعة

عن ثورة تانية حتيجي .. أقوى م الأولى”