“மீனாட்சிபுரம் கிராமத்திலும் வழக்கமான சாதியக் கொடுமைகள் நிலவின. பேருந்துப் பயணங்களில், தேநீர்க்கடைகளில், பொது இடங்களில் சாதிப் பெயரைச் சொல்லி இழிவுப்படுத்துவது, அதைவிட மிக முக்கியமாக 10-15 வயதுள்ள சாதி இந்துச் சிறுவன் 60-70 வயதுள்ள தலித் மூத்தவர்களையும் பெயரைச் சொல்லி ஒருமையில் அழைப்பது, பணியிடங்களில் காடு, கழனிகளில் பெண்களுக்கு எதிரான பாலியல் தொந்தரவுகள் என்பதான சமூகக் கொடுமைகள் ஆகியவையும் நடந்துள்ளன. இதுவே அவர்களுக்கிடையில் உளவியல் சிக்கல்களாகவும் மாறின. சமூக ஒடுக்குமுறைகள் குறித்து இளம் தலைமுறையினரிடையே பெரும் விவாதம் ஏற்பட்டது. இத்தகைய விவாதங்கள் ஒரு பொதுக்கருத்தை நோக்கி அவர்களைத் தள்ளியது. அந்த உந்துதல்தான் மதமாற்றத்திற்கான காரணியாக அமைந்தது.”