“बाबा, रघूमामा, रखमा- सगळ्यांचा बोलण्यातून एक अंत:प्रवाह वाहताना जाणवत होता. ती रात्रीची टॉर्च घेऊन जाणार ऐकताच रघूमामाची शीघ्र आणि तीव्र प्रतिक्रिया. ती दुसऱ्या घरापाशी गेली होती हे ऐकताच रखमाचे घाईघाईचे प्रश्न- दार - खिडकी उघडली नाहीस ना?- आणि बाबांनी त्या घराबद्दल बोलण्याची नाराजी- त्यांच्या मनात त्या घराबद्दल शंका-भीती-तिरस्कार अशा भावना होत्या- आणि त्या रास्त होत्या- कारण तिला स्वत:लाच एक लहानसा; पण भीतीचा चटका देणारा अनुभव आला होता- वर्षानुवर्षं बंद असलेल्या घरात ते सावकाश सावकाश बंद करून घेतलं जाणारं दार- कदाचित तिच्या भल्यासाठीच ते काही काही गोष्टी तिच्यापासून लपवून ठेवत असतील;”