“Հեծանվի մեջքին տնկված կողովում տոպրակներն իրար վրա դարսելիս Արի միտքը դեռ կրոնը փոխում էր դոլարի, դոլարը՝ դրամի ու նորից համոզվում, որ ապրուստը Հայաստանում, ճիշտ է, էժան է, բայց Շվեդիայում էս թանկ ապրուստն իրեն ավելի թեթև է տրվում, քան էն էժանը՝ Հայաստանում։ Տեսնես ինչի՞ց է։ Տեսնես ինչի՞ց է, որ էժան կյանքը թանկ է նստում մարդու վրա։ Մերս ասում էր. «Թանկից էժանը չկա, բալա՛ ջան։ Էժան բանը յա՛ շուտ կհոտի, յա՛ շուտ կմաշվի»։ Հայաստանի իմ էժան կյանքը ժամանակից շուտ մաշվեց ու դարձավ հնոտի։ Ինչ անում էի, ոնց անում էի, դարն անցած էր համարվում։ Կոմերիտակոմունիստական ոսկե երիտասարդությունս, որ ժամանակին ինձ լիդերության էր մղում, դատարկ թղթի էր վերածվել, որով պետքարանում քամակ էին մաքրում։ Էժան բանը շուտ կհոտի։”