توابع ثورة - لكل مؤيدي مبارك

الناس اللي لسه بتدعو لـ جمعة تخرج فيها تضامناً مع مبارك وتكريماً له .. انا مش فاهم على أساس إيه .. احنا هنشتغل بعض ؟


فجأة خرجت بعض الكتابات العحيبة اللي بتتكلم عن تدهور صحة مبارك ودخوله في غيبوبة ، أو إننا كنا ظالمينه وإن ثروته - يا عيني -

بخمسة مليار بس .. مش فاهم إيه الغرض من ده يعني ؟

بس واضح إن ده وجد صدى عند البعض بدليل إنهم عاوزين يخرجوا يكرموه !



ماشي محدش أبداً موافق على شتيمة مبارك أو إهانة شخصه ..
إنما معلش برضه بنظرة كلها حيادية وموضوعية .. ما يتم ذكره من إنجازات على غرار : مترو أنفاق وقضاء على إرهاب وإسكان شباب .. دي كلها حاجات من العبث إننا نحسبها إنجازات .. دي حاجات تتأرجح بين تطورات طبيعية للعصر والزمن أو بديهيات حُكم ..


يعني إيه إني احمي البلد اللي انا حاكمها من الإرهاب وأسكن شبابها وأحسب ده إنجاز عظيم ليا ؟

يا سلام !

الإنجاز هو اللي بعدم وجوده تبقى الحياة طبيعية .. الإنجاز هو التميز مش الأبجديات ..


افتكرت إني قريت مرة مقال او كلمة لكاتب مش فاكر مين .. بيعدد فيها عظائم مبارك ويقول إنه في عهده مصر بقى فيها تليفون وتليفزيون وموبايلات وإنترنت .. والخ !

وإزاي اننا ناكرين للجميل ومش واخدين بالنا من ده كله ..

أياً كان اللي قال كده .. هو أكيد تلميذ ممتاز لـ ممتاز القط !

وبرضه بنظرة حيادية هنبص للراجل ده - مبارك - هنلاقي إنه كان ساكت على فساد كبير قاتل حاصل ، ومشارك فيه ، وطاغية ، وبيخون بلده ومتورط في علاقات مع العدو ، وعايش في بذخ وشعبه مش لاقي ياكل ، وبيصدر غازنا لإسرائيل ، ومبنشوفش منه عائد قناة سويس ، وبيحكم مع عصابة حواليه ، وكان بيجهز الكرسي لابنه على قفانا ، ولما شعبه احتج ضد الفساد قتّل فيه بعميانية شديدة وغباء وصلف .. وحارب عشان الكرسي باستماتة وأزهق أرواح كتير في سبيل ده هو ونظامه ..


حصل ده واكتر وللا لا ؟

يعني إيه بعد ده كله نطلع في مظاهرات تأييد له او تضامن معاه ؟ إيه التهريج ده ؟

احنا كده بنثبت إننا تايهين مش عارفين عاوزين إيه !


الراجل ده كان طاغية ..

ومع احترامي لأي حد .. بس انا ضد المجموعات المزعومة اللي بتعلن إنها هتخرج تتضامن معاه الجمعة الجاية ..


لأني شايف في ده إهانة للشهدا - اللي قتلهم نظام مبارك - اللي ضحوا بأرواحهم وخرجوا عشان هو يمشي ويسيب البلد ، وإهانة لثورتنا اللي أبهرت العالم كله !

اللهم بلغت .. اللهم فاشهد