Pulang Bulaklak Ng Mga Pangarap

(Tula)

pipitas lamang ako

ng ilang pulang bulaklak

sa ulilang hardin ng mga pangarap

buong ingat na sasamyuin

sa nakapapasong katanghalian

at paghimas ng dapithapon

at paghalik ng ulap

sa mukha ng nakatulalang buwan

buong ingat kong isisingit

mga petalya ng pulang bulaklak

sa mga pahina ng lumuluhang aklat

supling ako ng aking kasaysayan.

ilang pulang bulaklak lamang

ilan lamang ang kailangan

upang lumangoy ang dugo sa mga ugat

ilang pulang bulaklak lamang

upang sumikdo ang puso

upang diwa’y maglagablab

at ilulan sa pakpak ng hangin

himagsik ng inaaliping lahi

habang mga punglo’y umaangil

sa sinapupunan ng dusa’t hilahil.

ilang pulang bulaklak lamang

aking pipitasin

sa ulilang hardin ng mga pangarap

upang di ko makalimutang

supling ako ng aking kasaysayan!