دفاعاً عن مرارتي

مبحبش..
إوعي تفهمني صح..


مبحبش حاجات كتييييييييير وقبل ما مرارتي تتفقع هقول علي كل حاجه مبحبهاش..لو إفتكرتهم يعني :


مبحبش البنت اللي بتتسهوك,والبنت اللي عامله شيخه طول الوقت وإنها مبتغلطش,والبنت اللي علي طول قويه ومبتضعفش..أو العكس..


مبحبش حد يكدب عليا..ومبحبش لما أكتشف إنه بيكدب وأسامحه يفضل يكدب عليا..مبحبش أقوله إني فاقساه وسيباه يخنق نفسه بالحبل وبرضو بيكدب عليا..ومبحبش أقوله إنه غبي عشان مستمر ف كدبه..والأغبياء بيصعبوا عليا..ف مبحبش أقول لحد غبي إنه غبي لأنه مش هيفهم أصلاً.


مبحبش العناوين..مبحبش حد يحصر أي كائن حي ف صفه..
زي ان الدكتور محترم..والنصاب قليل الأدب..ممكن جداً يكون العكس..


مبحبش الست جارتنا اللي بتقعد تبص من ورا السلك ,يا تطلعي يا تدخلي..,ومبحبش الواد إنها اللي أول ما بتمشي بييجي يقف مكانها..مانا ناقصاك أصلي..!


مبحبش السوبر ماركت اللي جنبنا..كل ما أروح أجيب حاجه ألاقي 3..الجد والإبن والحفيد
الجد يقعد يتنحلي ويفتكر شبابه
والإبن مراته مطهقاه ف عيشته ويطلعه عليا ويكلمني بعصبيه
والحفيد مراهق بيحاول يعاكس ومش عارف !


مبحبش أعمل حاجه مش علي مزاجي..ومبحبش الناس لما متصدقش إن مزاجي له أهميه..مبحبش أطاوع نفسي لأن مزاجي هيوديني ف داهيه..ومبحبش أخنق مزاجي لأن الداهيه أرحم بكتييييير .


مبحبش أقول لحد حاجه وأقوله متقولش..يروح يقولها لحد تاني ويقوله متقولش..وحد تاني يقولها لحد تالت ويقوله متقولش..ونبقي كلنا عارفين نفس الحاجه وكلنا مبنقولش..ليه؟لأنها أصلا بتاعتي..!


مبحبش الحاجات اللي بتتسحب.. سواء بشر أو كائنات تانيه,مبحبش الأسد ولو إنه صريح هياكلني ونخلص..مبحبش الأسد عشان هياكلني من غير ما أعمله حاجه..مبحبش الأسد لأنه فاكر نفسه أسد لمجرد إنه.. أسد !


-مبحبش واحده تعمل صاحبتي وهي مش صاحبتي
-مبحبش واحده تعمل صاحبتي وهي مش صاحبتي
للمره التالته
مبحبش واحده تعمل صاحبتي وتلزق لي وأنا وهيا عارفين كويس أوي إننا مش أصحاب..أوك؟


مبحبش حد يتدخل ف خصوصياتي ..


ومبحبش حد كل ما يشوفني يسلم عليا ويضغط بإيده علي صباح إيدي اليمين ويشوف في دبله ولا لأ؟


مبحبش العنف بكل أشكاله..مسموح بس لو كان دفاع عن النفس.


مبحبش أي حد يفتي ف أي حاجه ملوش فيها..


مبحبش الناس اللي بتظيط ف أي حاجه..




مبحبش بعض مدربين التنميه البشريه لما يتحشروا في اللي ملهومش فيه..ومبحبهمش لما يقعدوا يكتبوا كلام متفائل ويحسسوك إن ف الكورس عصايه سحريه هتغير حياتك وهم أصلا جواهم كلاكيع زي كل البشر..هي الدنيا كده..حبه فوق وحبه تحت..واللي يقولك غير كده يبقي متفائل لدرجه العبط..ومبحبش آخد نصيحه من حد محتاج نصيحه..ومبحبش النصايح أصلاً


آه نسيت..
مبحبش حد يشوف أي دموع ف عينيا..
 

مبحبش أتضايق..بس لما أتضايق مبحبش ألاقي أغبياء ف سكتي..بيعصبوني أكتر..:@


مبحبش أتعصب عشان بخبط ف ناس كتير..


طيب..عشان متعصبش أكتر
هخليها أسئله..


ليه سواق المكيروباص بيصدعني بأغاني لمجرد إنها عربيته؟
ليه التباع بيقعد يبص لكل بنت طالعه ونازله؟
وليه بيرخم عليها لو ليها فلوس باقي؟
ليه البنت لما تمشي ف الطريق أيا كان لازم تسمع كلام ..أي كلام وخلاص؟


ليه في ناس بيشوهوا الحقيقه؟دكتور يدخل طب عشان ياخد اللقب..بنت تدخل صيدله عشان تاخد اللقب..حد يكتب هرتله عشان يبقي واد مثقف وكل البنات بتحبه وكل البنات حلوين..و ليه بنت تدخل مجال مش عايزاه لمجرد إنها تحتك برجاله وتتجوز؟


ليه في ناس كتير باردين؟
وليه مبيظهروش غير وقت ما بتعصب؟
وليه بيعصبوني أكتر؟


إزاي واحد يجيله قلب عشان يحقق مصلحته يدوس علي مليون حاجه ف طريقه؟
ليه أصحاب مصالح المليون حاجه دول ساكتين؟


سؤال بيلح عليا بقاله فتره..هو ليه ناس كتير مبقاش عندها دم؟ولو سألت أي حد يقولك أصل هم..؟ولما هم مضايقين هم..وإحنا مضايقنا هم.."هم" دول..يطلعوا مين؟


صحيح..
مبحبش حد يفتكر إني..مبحبش..