مفيش!

( مفيش!)
مفيش!
غير ورده بيضا
في توبها
والغمازات
بيضحّكوا خدودها
والعقل يتوقع أوام
إنك لو تشوفها
على بعضها
ينجرف في الابتسام
من كل أوصاف الجمال
والكلام
لم ألتمح من حسنها
غير طشاش
ثم تاهت
بين جنوني ولهفتي
عند الترام
والناس تصد
بالجباه الكدابين
رؤيتي
وبالكتاف القاسية
خطوتي
وفضلت واقف
بعد التوهة عنها
زي البجم
مش لاقي جوايا
غير الملام
والشحتفة
والعدم
وفضلت أداوم
ع الحضور ف المعاد
كل يوم
م الشباب
وعذاب الوحدة
زايد كل يوم
حتى الشعر شاب
واتكونت فوق الجبين
شوشة بيضا ملخبطة
زي الحنين
اللي عاش جوايا
طول العمر
لوصفتين
اتنين!
لحد ما اتخيلت إني
لو شفتها
همــوت!
هطب ساكت واتدفن
من وقتها
رغم إني لم أرا
كل الملامح
وإن الذاكرة بعد العَجَز
بقت ضلام
إن سُئلت عنها يوم:
هي إيه؟!
هزيت كتافي
وقلت:
مفيش!!
غير وردة بيضا
في توبها
والغمازات بيضحّكوا
بيضحّكوا خدودها
والعقل يتوقع أوام
إنك لو شفتها
على بعضها
ضروري
ينجرف في الابتسام

#بيومي