الخطة الذهبية لقضاء الفلانتين

الخطة الذهبية لقضاء الفلانتين
======== :::========
بغض النظر عن ان الكلام ده اجمالا وتفصيلا للمتزوجين فقط اللى هما اصلا طنشوا البوست من اول ما قرأوا العنوان .. والبوست لا يمس من قريب او بعيد اى حد من السناجل اللى هما اصلا بيشبطوا فى اى بوست من هذا النوع زى بالظبط فكرة الافلام اللى للكبار فقط وكل اللى بيشوفها صغيرين.. فانا اخلى مسئوليتى الشرعية والقانونية من أى عواقب لهذا الكلام علشان تبقى فاهم يعنى ..

اولا بلاش الاسطوانة بتاعت عيد الحب حرام والكلام ده لاننا كلنا عارفين انه قصر ديل :) مش عاوز تجيب هدية قولها وانت محترم نفسك انما بقى تقول معندناش تخصيص ايام باعياد فهو اتسمى زى مناسبة كده زى اليوم العالمى لمرضى الغدة النشوية :)

اختار اى يوم .. اعتبرها تذكره ... اعتبرها ريفرش لعلاقتك مع زوجتك .. لا بطلب منك تصلى ولا تزور حد فى اليوم ده زى اى عيد .. انسى خالص الفلانتين واقرا الكلمتين اللى تحت عشان ترتاح :)

عاوزك تنقى اكتر حاجة بتحبها مراتك .. يعنى مثلا فيه ستات بتحب الهدوم الجديدة فيه بيحبوا الدهب (هاتلها دهب صينى) فيه بيحبوا الاكسسوارات فيه بيحبوا الاجهزة الالكترونية .. او فكر فى أى حاجة مراتك نفسها فيها من فترة ..

جهز جو رومنتيكى كده يعنى مثلاً شغل اضاءة جانية هادية مع تراك لعبد الرحمن محمد ولو انت سلفى شغل احمد ابو خاطر "زوجتى" .. واختار اكتر الاوقات رومنسية (غالباً وهى بتحضر العشا) وفاجئها بالهدية ..

انت :حط ايدك على عنيها من غير ما تشوفك ...
هااااا مين ..
هى : هو فيه غيرك فى البيت يا ممدوح انت هتستعبط اقعد بره لحد ما العشا يجهز
(متيأسش ومتخليهاش تقفلك بدرى .. انسى كل الكلام اللى هى قالته )
انت : ميرفت انتى عارفه انك اجمل هدية ربنا رزقنى بيها .. مش عارف من غيرك كانت حياتى هتبقى عاملة ازاى .. بجد انا طول ما انا فى الشغل بتمنى اللحظة اللى ارجع فيها البيت واشوفك .. بنسى كل مشاكلى وهمومى .. ربنا يخليكى ليا يا اجمل ميرفت فى الدونيا.
(بص لعنيها كده هتلاقيها مدمعة وبتبصلك نظرة مشوفتهاش قبل كده)
انت :ايه ده انتى بتعيطى يا ميرفت !
هى : اه يا حبيبى لسه كنت بخرط البصل ..
(امسك نفسك واوعى تتقفل بدرى لسه خطوات كتير يا بطل)
انت : انا عارف ان كنوز الدونيا كلها متكفيش وقفتك جنبى فى حياتى ودى هدية بسيطة بعبر بيها عن جزء ضئيل جدااا من حبى لانى مش لاقى حاجة بالقيمة اللى تستاهل انها تتحط فى ايدك .
(هتلاقيها واقفة مش عارفة تتكلم وعنيها لمعت كده على اللى فى ايدك )

اللللللللله جميل اوى البالطو ده يا حبيبى ... ربنا يخليك ليا يا رب .. جايبه بكام اوعى يكون اتضحك عليك انا لسه سائله عليه ب 450 .. (امسك نفسك )
انت : دى فى نظرى اغلى من فلوس الدونيا كلها لانه هيتلبس من اجمل ست فى الدونيا .
هى : جبيته بكام يعنى !
انت : 600
هى : والله كنت حاسة انه اتضحك عليك فيه .. مش كنت تعرفنى يا راجل ! اتفضل روح رجعه احنا اولى بالفرق ..رجالة آخر زمن صحيح !

========

ساعتها والله مش هلومك لو نزلت قعدت مع اصحابك ع القهوة تقولهم " الفلانتين اصلا حراااااام"

:D