Sa Pasigan Ng Kamalayan
(Tula)
sa pasigan ng kamalayan
hinihintay ko tsunami
ng ngitngit ng sambayanan…
sa laot ng dagat ng kamulatan
dumadagundong na’t dumaramba
nag-aalimpuyong alon ng dugo’t luha
ng dinustang mamamayan.
daluyong kaya silang dadaluhong
sa pader ng kasakiman
lulunod sa mga eskribano’t pariseo
sa mga hari-haria’t diyus-diyosan
ng lipunang walang galang
sa sagrado nating karapatan?
wawasakin na bang ganap
ng delubyo ng pagbabago
mapanlinlang na mga templo
mapagsamantalang mga palasyo
ng iilang mga tuso’t abusado?
sa pasigan ng kamalayan
nagnanaknak makadurog-puso’t nananangis
na mga larawan ng hubad na kaapihan…
silang hinihilamusan
ng dusa’t luha’t panambitan
silang namamaluktot
sa miserableng mga “condo”
sa ilalim ng tulay ng kabiguan
kaulayaw ng mga insekto’t dagang
ayaw kalingain ng di patas na lipunan
silang araw-araw na sinisinghot
alingasaw ng nagbalatay na estero
sa gilid-gilid ng kalunsuran
silang araw-araw na palaman sa tiyan
“pagpag” mula sa inuuod na basurahan
silang hukot na mga aninong naglalamay
sa mga asyenda’t pabrikang walang humpay
sa kanila’y umaalipi’t nanlalamang.
oo, sa pasigan ng kamalayan
di ako magsasawang hintayin
tsunami ng ngitngit ng sambayanan
parang mga bomba rin itong sasabog
sa mesa ng walang pakundangang kapangyarihan
at walang budhing karangyaan
habang dinarambong ng iilang tulisan
pati barya sa lukbutan ng mamamayan
at magiliw na sinasamyo ng diyos ni mamon
halimuyak ng kanilang hugo boss
miyaki’t bulgari’t pierre cardin
oo, may hangganan din ang walanghanggan
kapag nag-alimpuyo’t nanalasa
tsunami ng ngitngit ng sambayanan
di mapipigil ng pader ng kaimbihan
daluyong ng paghingi ng katarungan
delubyo itong lulunod-papatag
sa nabubulok-inuuod na lipunan!
————————————————————-
condo — mumunti, tagpi-tagpi’t miserableng bahay ng mga naninirahan na lamang sa ilalim ng mga tulay sa kalunsuran.
pagpag — mga tira-tirang pagkain na itinapon na sa basurahan at pinagtitiyagaang pulutin ng mga maralita, huhugasan at muling iluluto upang sila’y may makain.
hugo boss, miyaki, bulgari at pierre cardin — mamahaling mga pabango ng mayayaman, saanman nanggaling ang kanilang kayamanan.
—————————————————————
