شبّاك

مافيش نعمة
بتمشى من ايدين واحد
غير اما يكون
ماهوش شاكر
و انا دايما بكون شاكرة
لرب الكون على قلبك
يادوبك بس من حبّة
نسيت نفسي
تقوم تمشي ؟
أكيد لأه !
تطل الطلة إياها
تزود في القليب دقة
و تضحك لجل ما اضرب
في وشي مية قلم فوقة
و ازعق فيا
حد يسيب مطر ينزل
ولا يحضنش و بشوقة !
أبوس ايدك بقى
نوَّر ،
انا ماعتدتش الهجران
دانا صدري خلاص قّرب
يفكفك عضمُه م الأحزان
انا متلصمة منظر
و رابطة كل وجعاية
بحبل قديم و متَّرب

يا شبّاك الحبيب افتح
و دخل للهوا ضيَّك
يا شابِك عُمري جوا الشيش
و حابس ضحكي جوا الشيش
و حارم قلبي من المية
و انا عطشانة من رمضان
و مافطرتش و لابدّيش!
و بستنى
بإيدَك أشرب الميّة
تشيل لي البذر مِ التمرة
و تِحمي العيش

لو انت حزين يا عين قلبي
فشيّلني هشيل و اديّك
و هغزل جوا حُضن البرد
من صوتَك
قصيدة و جسر لونُه ابيض
على قدَّك و هيعديك
فحمّلني
دموع قوتَك
فحمّلني
هستحمل ..داليا رشوان