و لاقيني

هقول تاني ؟
ماعادليش جوا احزاني
غير اني أسكت
و في سكوتي أجيب
سيرتك
تطبطب على القُليب
اللي من التكسير
هيتفرتِك

يا شمس العُمر
يا ضِلّة
و يا أحلى من الأحلام
طيوفك يا عزيز عيني
تغيب عنّي
تملّي تنام
فوصّيها ماتتقلشي
و خليها ماتتقالشي
لغير قلبي و غير صورتي

و لاقيني
أقولك يا عزيز عيني
أنا ساكنة في أيُها باب ؟
و من أمتى
حبيب ربُّه
بيمشى بخطوة الأغراب
يادوبك خطوة
من قلبك
فهلاتقي الطريق نوّر
هتلقى الدنيا بتنوّر
هشوفك
قلبي هينور
و مش عجبة عليك النور
فلاقيني
لأني بدور
و مش شايفة
غير الدمعة
و حيط مكسور
و لمبة قديمة محروقة
و قلبي بيبكي ع الشباك
فلاقيني
عشان اكبَر
و يكبر فيّا انساني
و اصبُر
زي ماهتصبُر
على القاصي مع الداني
و انوّر
حبّة من نورك
يضووا في قلبي لما تغيب
و لاقيني
و ناديني
و غطيني
و خبيني
و نسيني
دموع محفورة
في سنيني
و عليني
و ملّيني
كلام سُكّر
و خليني
كتير أكبر
و خلّي قلبي دا
يصغَر
انا اكتر
انا اكتر
تعالى
و بس
لاقيني