عن مشوار الكتابة وسارقى الحروف - مقال

طبعاً انت مش ملزم بقراءة قصة حياتى فلو مش فاضى اقفل , لو عندك خمس دقائق كمل قراءة ..البداية كانت طبعاً من وانا صغير وكنت بحب القراءة والكلام اللى انتوا حافظينه ده , بس البداية الحقيقية كانت فى مكانين " الفيس بوك " موقع التواصل الاجتماعى اللى غالباً بتقرأ الكلمات دى عليه و" اللجنة الثقافية " بكلية تجارة جامعة عين شمس اللى بدرس فيها ..البداية كانت مقال بسيط جداً بيتكلم عن حال البلد بلغة بسيطة واخطاء ادبية كتير , نزل على الفيس بوك فى صفحة ثقافية لاقى استحسان البعض فاتشجعت ومقال فى مقال لحد ما توقفت واللى عندى قلته , وبدء المشوار الحقيقى مع اول قصة وكان اسمها " مظاهرة " واللى برده لاقت استحسان البعض وقصة فى قصة بقى عندى بتاع تلات اربع قصص وخمس مقالات مثلاً وكان قمة الفخر وانا انتقل بيهم على اللاب توب والناس اللى اعرفهم باخد رأيهم فى القصص " الناس دى تعبت معايا اوى , انا شخصياً بتعب نفسياً لما بقرأ الحاجات دى دلوقتى " وبعدين لقيت اعلان عن اللجنة الثقافية , وبما انى الكاتب الذى لم يجدّ الادب بمثله رحت منتفخ الاوداج- فاصل من الكلام الفخيم - وهناك اكتشفت الحقيقة المرة , لا انت الوحيد ولا انت الافضل ..الامر اللى اتأكدلى على الفيس بوك بعد كدة , ماشاء الله البلد كلها مواهب سواء فى الشعر او القصة او الخواطر ..يمكن فى اللجنة الثقافية كان التميز الوحيد بالنسبة لى انى كاتب القصة الوحيد والبقية يكتبون الشعر , ودى حاجة كويسة لانى كان هيجيلى احباط حاد لو كان فى قاص حقيقى فى اللجنة , المهم نظام اللجنة الثقافية واللى اى حد ممكن يشترك فيها سواء جوا الجامعة او برا - دعاية وكدة - ان الكتاب يجتمعون ويقول واحد العمل بتاعه والباقى ينقدوه ده غير طبعاً ورش الشعر والقصة والنقاشات المفتوحة ..قصة فأخرى بدء الاسلوب يتطور شوية , ومع قراءة الوان جديدة من الادب والقصة كل حاجة بدأت تتغير بسرعة , وكنت بحاول اجرب فى كل حاجة كتبت درامى ورومانسى وكوميدى ومسرحى وفلسفى - فى كلام مهم جى اصبر الرغى هيخلص دلوقتى - يمكن اللى اتعلمته من اللجنة الثقافية على المستوى الادبى كتير وعلى المستوى الشخصى اكترقاعدة ان اى مكان تكون فيه لازم تصارع عشان تحقق حاجة , ويمكن حتى انا لم اكن اتخيل ان ذلك الفتى طويل القامة الذى يلقى باعماله ويرحل - ايوة كانوا بيسمونى كدة زمان فى اللجنة - يقعد فى يوم من الايام على انه رئيس النادى الادبى الحدث الاكبر اسبوعياً او ينظم معرض اللجنة الثقافية وهو الحدث الاكبر عموماً ..وبالرغم من اختلاف اسباب بقائى فى اللجنة مع الوقت الا ان الحاجة العامة هى انى بحب شغل اللجنة ده ولم يكن يوم فرض عليا , وعلى مستوى الكتابة بقى كنت بدأت اكتب الومضات - اللى هى الاقتباسات الصغيرة اللى بتنزل على صورة - وكانت كل علاقتى بالفيس بوك انى بنزل عليه قصة مثلاً وعليها صورة واعمل تاج لاصحابى وشكراً ..لا صفحات ولا كلام من ده وكنت شايف نفسى ان انا لم اصل لحاجة يعنى عشان اعمل صفحة , واستمر الامر فترة على الحال ده لحد ما صديقى" قمر الزمان محمد " واللى بدين ليه بحاجات كتير اوى فى المشوار ده عمل مشروع " ديوان " عبارة عن صفحة لنشر اعمال صغار الكتاب وقالى اعمل صفحة ليك واشترك , فى الاول ماطلت كدة ومكنتش عايز وبعدها اشتركت , فى البداية كنت بنزل الومضات من غير صورة ولا اى حاجة من دى فى ستاتس عادية وعدد الناس كان قليل معظمهم معارف ومعارف المعارف , وبدأت الصفحة مع الوقت تزيد والحاجات اللى بنزلها عليها تزيد , وفى المجمل انا ادين للصفحة دى بايام وشهور من السعادة , وما هو اكثر ..بدأت انزل الومضات مع صور زى بقية الناس ما بتعمل وانزل قصص على الصفحة والحمد لله كان فى قبول, والعمل اللى بكتبه لو وفقت فيه بيكون فضل من الله ولو اخفقت بيبقى سهو منى , بس اكيد مفيش حد بيبقى بيكتب حاجة وعارف انها سيئة او مش هتروق للبعض , اكيد انا عايز اكتب حاجة تلقى استحسان الناس ..كان فى ناس نقدها بيبقى لاذع اوى بس الواحد كان بيستغل ده ويحسن من نفسه قدر المستطاع , الكلام المهم بقى !اول حادثة سرقة لحاجة انا كاتبها ..فى الاول انا كنت مأمن ومش متخيل ان حد يسرق كلام يعنى بس مع اول مرة بتشوف كلامك متبوع باسم حد غيرك بتحس بغضب وحزن واكتئاب , سرقة الاشياء المادية يمكن اهون ..الكلام مبيتكتبش بسهولة كدة , ده انت بتعيش حالة وبتفكر وبتدفع وقت وفكر ويمكن لو القصة حالتها حزينة تكئبك معاها ويمكن فكرة تخليك مش عارف تعمل حاجة فى حياتك لحد ما توظفها صح , وحتى لو الموضوع سهل , ده مبرر لسرقة ؟فكرة انك تسرق كلام من على النت حاجة سهلة مش مبرروان انت تنسب كلام غيرك لنفسك ده ضعف فى شخصيتك , انت كدة بتسرق جزء من شخصيتى انا وبتنسبه لنفسكجزء من الذكريات والافكار , تخيل انك بتسرق من واحد شخصيته وبتنسبها لنفسك عشان ناس لا يهتموا بامرك اصلا يقولك " الله انت كلامك جميل اوى " او تثير اعجاب حد بعينه !رد فعل سارقى كان بلوك ظريف والله اعلم مسح الاعمال بتاعتى ولا لا لانه كان بروفايل شخصى مش صفحة وكان بيسرق العمل بصورته مشكلتى وقتها كانت ان الصفحة عدد الناس فيها قليل ولو كل اللى فيها سرقته صفحة كبيرة هبقى خلاص مفيش امل فى استعاده الحق , انضمامى لقافلة مما قرأت عن طريق صفحة شباب الكتاب " مبدعون مما قرأت " خلى الامر ده يتغيرمما قرأت عاملة زى سوبر مان الادب على الفيس بوك , يمكن لم تتاح لى الفرصة عشان اشكرهم وهما اصلاً مش مستنيين ده بس لازم نقول ان مما قرأت كونت على الفيس بوك كيان رائع للادب ومحتوى يفيد فعلاً ويرقى بالجيل , وكمان فرصة لشباب الكتاب انهم ينشروا اعمالهم والناس تشوفها وهو الشىء اللى حتى دور النشر متقدرش تعمله , باشتراكى فى قافلة مما قرأت وصلت للناس اكتر والصفحة زادت وهو الامر اللى كنت فاكر انه هيمنع موضوع السرقة بس العكس تماما هو اللى حصل , اكثر من صفحة بقت بتنزل الاعمال دون اسمى واحياناً بأسم السارق , وطبعاً الموضوع ده مش بيحصلى انا بس , كتاب كتير بيحصل معاهم كدة , واللى بيسرق مش بيفكر انه ممكن يكسر قلم مبدع للابد لانه خلاه يحس ان تعبه راحمش بس كدة لما العمل يتنشر بكذا اسم او من غير اسم لا انت بتستفاد ولا غيرك بيستفاد , بيبقى عمل ملوش صاحب والمتضرر الوحيد الشخص اللى مسك ورقة وقلم وكتب ..الكتابة لا هيا العمل البطولى ولا هيا العمل المحرم بس الكتابة شىء عظيمومكرمة فى كل الاديان زى ما السرقة محرمة فى كل الاديان , لازم الناس تعى ان لما تسرق كلام وتنسبه لنفسك تحسب سرقة , انت مش بتسرق عشان تسد حاجة , انت بتسرق عشان تغذى غرورك بشخصية وكلام لا يمتوا لك بصلة وحاجة سيئة ان الكتاب يعملوا صفحات وجروبات لمكافحة الموضوع ده , والاسوء انه يقولك انت بتسرقنى فترد عليه ببلوك او تشتمه بدل ما تعتذر وتديله حقه , والساكت عن الحق شيطان اخرس , لو شفت سرقة قدامك متسكتش ..
واخيراً شكر واجب بقى للناس اللى ساهموا فى المشوار ده ..
- الكاتبة المبدعة شيماء على , سواء على المستوى الشخصى او الادبى- الشاعر وصديقى العزيز قمر الزمان محمد , سواء على المستوى الشخصى او الادبى- اللجنة الثقافية بكلية التجارة جامعة عين شمس بكامل اعضائها والقائمين عليها- صفحة المسرح التى اشرف بكونى ادمن فيها- مشروع ديوان- مجموعة العمل القائمة على صفحة مما قرأت والصفحات التابعة لها : جزاكم الله خيراً , شكراً جزيلاً- الكتاب اللى اتحدوا وعملوا جروبات وصفح عشان يرجعوا حقهم -
ودمتم سالمين وبخير ..