عاجبك كده ؟ - نقطة توضيح بخصوص .. أمة عربية متحدة

ازيكو يا شباب ؟ كل سنة وانتوا طيبين ..

حبيت - في الرسالة دي - أوضح الهدف من مشروعنا (أمة عربية متحدة) بحيث الموضوع يوصل ببساطة وسهولة أكتر ..
واحنا بنحاول ننشر الموضوع في أكتر من مكان على النت ، أو حتى من خلال مناقشاتنا مع الناس .. بنلاقي طبعاً - ولله الحمد - عبارات استحسان كتير ، ونلاقي ناس متحمسين ومستعدين للشغل بكل طاقتهم ..
بس المشكلة إننا في نفس الوقت قابلنا تعليقات كتير بتستهزأ او بتستخف بفكرة المشروع أو مجرد اسمه .. على أساس إنه مليان خيالية وجموح وأحلام وردية .... الخ

وهنا كان لازم نوضح نقطة !

هل احنا فعلاً غرضنا إننا نوحد العرب - المتشتتين بقالهم ستين سنة - من خلال جروب على الفيسبوك أو منتدى على الإنترنت ؟
هل احنا حتى بنفكر نحقق ده ونجمع كل العرب ونعمل وحدة عربية ولو بشكل افتراضي حتى على الإنترنت ؟
هل احنا من فئة (المصريين أهمه) ، و(وطني حبيبي الوطن الأكبر) ، و(تحيا الوحدة العربية) ، و(الاستقلال التام أو الموت الزؤام) ؟!

لا .. مش ده غرضنا طبعاً .. طبعاً لاشك إن الوطن الأكبر هو وطني حبيبي ، ولاشك إننا بنحلم بوحدة عربية واستقلال تام .. بس احنا لازم نكون عقلانيين ونعرف إننا كشباب على النت مش ده مجالنا .. مش ده محيطنا ولا دي قدراتنا ..
توحيد العرب من المحيط للخليج على اختلاف ظروفهم ولهجاتهم وقلوبهم يحتاج لسبب أسطوري أدينا لسه مستنيينه .. ده بالنسبة للهدف الأكبر اللي احنا مش هنقدر عليه ..

بس احنا نقدر نعمل حاجة تانية ، ودي اللي احنا بنتكلم فيها .. وهي الهدف من مشروعنا ..

إننا نكوّن جبهة تكون بمثابة إعلام عربي على شبكة الإنترنت ..

إزاي ؟ .. نبسط أكتر ..

موسوعة الويكيبيديا وهي تعتبر أكبر قاعدة للمعلومات - في كل المجالات - على شبكة الإنترنت .. فيه نسخ منها للغات كتير جداً وبتعرض ثقافات شعوب مختلفة .. كل شعب بلغته .. طبعاً أشهرها وأغزرها الويكيبيديا الإنجليزية ..
بس تعالى شوف الويكيبيديا العربية كده .. اعمل بحث عن اسم لأي حاجة أساسية أو مشهورة وتعتبر رمز مهم في الثقافة العربية .. سواء اسم كاتب مشهور أو اسم عمل فني أو أدبي معين .. اسم معركة .. حقبة تاريخية .. ممكن جداً متلاقيش أي نتيجة ! .. وإن لقيت هتلاقي صفحة معلومات صغيرة جداً مكونة من أسطر قليلة خجلانة وبعد كده تكتشف ان الصفحة انتهت ..
على النقيض في الموسوعة الإنجليزية لو عملت سيرش عن : (رباط جزمة) هتلاقي معلومات باستفاضة تبهرك !! .. هتلاقي كل أنواع الشركات اللي بتنتج أربطة الجزم ونصايح للعميل إزاي يختار لون رباط جزمته بحيث يبقى لايق مع بوز الجزمة ! .. هتلاقي معلومات تاريخية عن أول واحد لبس جزمة في التاريخ ، واحتمال تلاقي السيرة الذاتية لجزمة منتظر الزايدي اللي انطلقت في وش بوش الله لا يرجعه !

بلاش الويكيبيديا .. أكيد تعرف اليوتيوب !
موقع اليوتيوب أكبر موقع للفيديوهات في العالم ! .. ممكن تلاقي فيه أي حاجة تتخيلها ..
اعمل كده بحث باللغة الانجليزية عن أتفه حاجة ممكن تيجي في بالك .. مش بعيد تلاقيلها سلسلة أفلام أو فيديوهات مخصوصة .. ممكن تلاقي أفلام أنيميشن بطلها رباط الجزمة إياه !

طب تعالى اعمل بحث بالعربي عن أي حاجة مشهورة جداً .. اعمل بحث عن (مصر) .. عن (الأدب العربي) .. عن (العرب) .. عن (المسرح) .. عن فيلم مشهور بتحبه .. عن مسلسل بنعتبره من اهم مسلسلاتنا - بغض النظر عن الشلل التليفزيوني الحالي - .. زي أبو زيد الهلالي مثلاً .. الوتد .. الفرسان .. عن فيلم قديم مهم حتى .. جرب تعمل بحث عن أي حاجة من دول وهتعضّ في إيدك من الغيظ لحد ما تشبع !


وده اللي احنا بنتكلم عنه ..
إن تواجدنا الفكري والثقافي والفني والأدبي والسياسي على شبكة الإنترنت يكاد يكون منعدم لو قارناه بـ(الهيمنة) الضخمة لثقافة الغرب وفنهم وفكرهم وأدبهم !

طب ليه ؟ ايه اللي ينقصنا عنهم ؟ .. بالنسبة للإمكانيات - ولا حاجة .. محتاجين شوية وعي بس ..
خصوصاً إن تراثنا العربي - الفكري والأدبي والفني - فعلاً وبلا مبالغة أعظم من بتاعهم .. عندنا كنوز .. بس مرمية .. مدفونة .. واحنا بمنتهى الإهمال مش بنعمل حاجة بخصوص ده !

بس أعتقد إننا في المشروع ده الحمد لله بدأنا نعمل حاجة زي كده .. وعاوزين الكل يشاركنا في ده ونكثف جهودنا كلنا فيه ..

إن كانت صورتنا في الغرب متشوهة وآخر هباب وإعلامهم بيقولهم إننا مزيج من رعاة أغنام وحثالة البشر وإرهابيين .. فاحنا لازم نرفع تراثنا كله وثقافتنا وحضارتنا وتاريخنا على الإنترنت .. لأن الإنترنت بلا رقابة .. شبابيك مفتوحة لكل العالم .. واحنا لازم يبقالنا شباك يطل على تراثنا وثقافاتنا زي ما هم اهتموا وعملوا لنفسهم شبابيك كتير متزخرفة ..
نعمل كده حتى عشان نفسنا كمان مش عشانهم بس .. عشان الأجيال اللي طالعة جديد دي ومنبهرة بثقافتهم وطريقتهم في الحياة والتفكير ..


سجلوا بس في الجروب والمنتدى .. وهنجمع سوا المواد اللي بتعرض فكرنا وثقافتنا وتراثنا دي وننشرها في كل الحتة .. في الويكيبيديا ، واليوتيوب ، والـ Imdb ، والـ GoodReads ، وفي مواقع كتير تانية .. وفيه أمثلة كتير موجودة فعلاً ع الجروب وفي المنتدى ..

(أمة عربية متحدة) حلم .. بس مش احنا اللي هنحققه في الوقت الحالي .. هو بس مجرد شعار جميل احنا شغالين تحته .. على الأقل عشان مننساهاش كجملة ، والله أعلم ! يمكن من كتر ما ناخد عليها وتبقى مألوفة تبقى واقع قريب وتتحقق !

بس مش ده الهدف : (توحيد العرب) ..
الهدف : جمع اكبر قدر ممكن من الشباب عشان (نثبت وجود للعرب على الإنترنت) !

يا ريت تشاركونا ..

رابط الجروب على الفيسبوك :

http://www.facebook.com/group.php?gid...


رابط المنتدى :

http://www.rewayatnet.net/forum/forum...