Se ti non vas á poesía, a poesía podería (inaudible)

Uns poemas pequenos a través dun obxecto poético pequeno cunha tirada pequena para unha idea pequena poderían ser algo que quixesemos probar hoxe.

—Que dis, Samu? Quen é ese “nós”?

Lanzo1 un artefacto poético que consiste nunha edición limitada de postais que no reverso levan un deseño cun texto meu e, no anverso, poemas inéditos escritos a man.

Así de sinxelo! Poesía analóxica directamente á túa casa!

—Todas as postais levarán escrito o mesmo poema?

Non, non. Nada diso.

—Entón cada postal vai levar un poema diferente?

Tampouco nos pasemos.

Están xa á venda en Bandcamp. Comezarán a enviarse a partir do 24 deste mes e cada postal irá en tremendo envelope para que non se escape unha metáfora de camiño ao teu fogar ou residencia habitual. Iso si, insisto en que é unha edición limitada, así que cando se acaben, acabáronse. Mundo finito.

O futuro era o de antes!

1Lanzar poesía como quen, desde unha ponte peonil que permite atravesar unha autovía, lanza un pedrolo a un BMW. É dicir, lanzar cun certo sentido de xustiza, pero con escasa posibilidade de satisfacción a medio-longo prazo.