தஸ்தாயெவ்ஸ்கி நாடகங்கள்

2016ம் ஆண்டில் தஸ்தாயெவ்ஸ்கியின் வாழ்க்கை வரலாற்றை ஒரு நாடகமாக எழுதினேன். தியேட்டர் லேப் ஜெயராவ் தன் குழுவினருடன் அதை மேடையேற்றினார். ஒரு மணி நேர நாடகமது. சென்னை ரஷ்யக் கலாச்சார மையத்தில் நிகழ்த்தப்பட்ட அந்த நாடகம் நல்ல வரவேற்பைப் பெற்றது.

இதற்கு முன்பு புதுவை பல்கலைக்கழகத்தில் முருகபூபதி நாடகக்கலை படித்த போது அவருக்காக மரணவீட்டின் குறிப்புகள் எனத் தஸ்தாயெவ்ஸ்கியின் Notes from a Dead House யை மையமாகக் கொண்டு நாடகம் எழுதினேன். அந்த நாடகம் புதுவையில் நிகழ்த்தப்பட்டது. பின்பு அது கேரளாவில் உள்ள ஒரு குழுவால் மலையாளத்திலும் நிகழ்த்தப்பட்டது.

தஸ்தாயெவ்ஸ்கிக்கும் அன்னாவிற்குமான காதலை மையமாகக் கொண்டு நான் எழுதிய தஸ்தாயெவ்ஸ்கியின் சங்கீதம் இருபது ஆண்டுகளுக்கு முன்பு சென்னையில் நிகழ்த்தப்பட்டது. இந்த மூன்று நாடகங்களும் தஸ்தாயெவ்ஸ்கியை மையமாகக் கொண்டவை. இவற்றைத் தொகுத்து ஒரே நூலாக வெளியிட இருக்கிறேன். தேசாந்திரி பதிப்பகம் இதனை வெளியிடவுள்ளது .

பொதுவாக ஒரு குழுவினர் நடத்தும் நாடகப்பிரதியை மற்றவர்கள் நிகழ்த்துவதில்லை. ஆகவே இந்த நாடகங்கள் பல ஆண்டுகளாகத் திரும்ப நடத்தப்படவேயில்லை. அத்தோடு நாடகப்பிரதிகளை வாசிக்கும் பழக்கம் நம்மிடையே வெகு குறைவு. ஆனாலும் எழுதி நிகழ்த்தப்பட்ட இந்த நாடகங்களை ஆவணப்படுத்த வேண்டும் என்பதற்காகவே ஒரு தொகுப்பாகக் கொண்டு வர இருக்கிறேன்.

இந்த நாடகங்களை எவர் வேண்டுமானாலும் நிகழ்த்தலாம். நவீன நாடகச்சூழல் மிகுந்த நெருக்கடிக்குள் சிக்கியுள்ள இன்றைய சூழலில் இவற்றை நிகழ்த்துவதற்கு ஆதரவாளர்கள் தேவை. பெரிய நிறுவனங்கள் முன்வந்தால் இவை சிறப்பாக நடத்தப்பட முடியும்

மூன்றாம் அரங்கு சார்பில் கருணா பிரசாத் இயக்கிய அரவான் நாடகம். தியேட்டர் லேப் சார்பில் நிகழ்த்தப்பட்ட பொய் விசாரணை. சிந்துபாத்தின் மனைவி, மதுரை சுந்தர் காளி இயக்கிய சூரியனின் அறுபட்ட சிறகுகள். கனடாவில் நிகழ்த்தப்பட்ட சவரக்குறிப்புகள், புதுவை சுகுமார் இயக்கிய அரவான்.எட்வ்ர்ட் பாண்டின் கல், பிரெக்ட்டின் கலிலியோ போன்ற நாடகங்கள் சுந்தர்காளி, சுபகுணராஜனால் நிகழ்த்தப்பட்டிருக்கின்றன. இதில் அரவான் ஆங்கிலத்தில் மொழியாக்கம் செய்யப்பட்டு ஒரியன் பிளாக்ஸ்வான் மூலம் வெளியிடப்பட்டுள்ளது. அரவான் நாடகம் சென்னை ஸ்டெல்லா மேரீஸ் கல்லூரி ஆங்கிலத்துறையில் பாடமாக வைக்கபட்டுள்ளது.

அரவான், சூரியனைச் சுற்றுகிறது பூமி சிந்துபாத்தின் மனைவி ஆகிய மூன்று நாடகத்தொகுப்புகள் வெளியாகியுள்ளன. இவையும் தேசாந்திரி மூலம் மறுபிரசுரம் செய்யப்படவுள்ளன.