متعاطف مع المجلس العسكري

أخيراً وبعد شد وجذب مع نفسي، وصلت للحقيقة، فهمت إيه اللي بيحصل بقاله 11 شهر من ساعة ما العسكر مسكوا البلاد، واكتشفت أنا المواطن أسامة الشاذلي الروائي والصحفي، والضابط السابق في القوات المسلحة انى ظلمت المجلس الموقر، وفهمته غلط.... أنا بعترف احنا كلنا فهمنا المجلس غلط، الامام على قال "خاطبوا الناس على قدر عقولهم"، يعني مثلا يا واد يا ثائر منك ليه انت حتفهم لو قولتلك "انت عيل أدبخانة"، لو فالح قولي يعني إيه.... وأنا مش حقولك غير أخر التدوينة يعني ايه
احنا بقى وقعنا في الغلطات دي
- أول مطلب لثورتنا كان "عيش"، والعسكر العيش عنده يبقى جراية، ميفهمش يعني ايه عيش، فعاش بجد
- تاني مطلب حرية، والحرية في الجيش بتتحقق في حالتين اما النوم في الأحلام، أو الموت، فقتلونا لتوفير الحرية اللي يفهموها
- تالت مطلب عدالة اجتماعية، وال"عدالة" بتتقال على الحاجة التمام اللي زي الفل - انت واد عدالة - وبالتالي حيحقوقها ازاي دي غير لما يحتجزونا كام شهر في سجونهم يشدوا عودنا ويخلونا عدالة بجد.
- 6 ابريل وارد جدا ده يكون تاريخ جواز طنطاوي، تاريخ وفاة الست والدة عنان، تاريخ المراجعة الحسابية للمعونة الامريكية العسكرية، تاريخ مش بيحبوه، واحنا مصرين عليه وكل شوية نقول 6 ابريل، 6 ابريل ، طيب ما نخليها 7 يمكن يرتاحوا، وبلاش ابريل خالص يا جماعة، فين الانسانية.
- تسليم السلطة ودي بقى مشكلة كبيرة جدا، اللي خدم في الجيش عارف ان "السلطة" بتتكون من خيار وطماطم وخس، وكل واحد بيبقى في مخزن لوحده يبعد عن التاني عشرات الكليومترات، موضوع مرهق جدا ان الضابط النوبتجي يجمع السلطة علشان يسلمها للميس، واحنا مصرين نعلنها كل شوية كل شوية، نفهم بقى.
- الاشتراكيين الثوريين، م الأخر دي غالبا بقت شتيمة في الجيش زي يا نفر ويا روش.
وغيره وغيره، علشان كده انا سعيد بأن المجلس العسكري معني دلوقتي بتتبع وفك الشفرات اللي على تويتر وفيس بوك، وقريب حنحتفل جميعا بعودة أول بعثة من الولايات المتحدة بعد دراسة لغة lol، ويومين كده ونبعت بعثات تاني وحيفهمونا وحنفهمهم ومصر حتبقى زي الفل.
صحيح قبل ما أنسى "أدبخانة" يعني دورة مياه ميدانية.